ديوان الشاعر//غالي ربيعان الحربي

قريت مكتوبٍ على بيـض الاوراق=فالمنتـدى ورسالـةٍ فـي بريـدي
قصيـدة لامـرت اسـمـاع ذواق=للجزل والشعر الحقيقـي يشيـدي
من شاعر قادر على لـي الاعنـاق=واقـل ماينقـال شاعـر مجيـدي
اسم الفريدي بآخـر العقـد بـراق= وجه له الشكوى ويبغـى المفيـدي
لاباس مقرونه بترحيـب واشفـاق=له وعليه اشفق ومنـه استفيـدي
بحر الهوى كلٍ شكا منه الاغـراق=منته لحالك عـل عمـرك مديـدي
راع الهوى لايحلم بحـب واعتـاق=واحد من الاثنيـن والعلـم أكيـدي
لو غالي اربيعان على الخفـا واق=وشاف الطعون وشاف بالرجل قيدي
ارسل لي الفزعة على اجناح بيراق=معبـدي دون الخـوي مايحيـدي
رجل لفعل الخير والطيـب سبـاق=نعم العضيد لمن يحطـه عضيـدي
مادام لك بيرق على الصرح خفـاق=في ساحة العشاق خلـك شديـدي
وابعد شبوحك عن سراديب الانفاق=المظلمات وخـل رايـك رشيـدي
واحكم على باب الغلا قفل الاغلاق=اكيد ذبـح السـر فعـل سديـدي
والصبر دام الصبر يقوى وينطـاق=مذكور غيب الصبر دايـم حميـدي
وارفع يديك لمن رفع سبع الاطباق=الواحد اللي مـن لجالـه سعيـدي