ديـوان الشـاعـر.../ جميل حميدان المزروعي

حدني حادي وحديت سكين القصيد = والحطب طاح الحطب واشتعل واشتب نار
الرصيد الا نهايات مفتوح الرصيد = والمسار السير عكس اتجاهات المسار
الرمي لا من رميت الهدف لابد اصيد = ماذكر اني قد رميت الهدف والرمي طار
الرسايل جاتني دونما ساع بريد = والخبر تفصيله يجيك بعد الاختصار
الرحى دارت على الحب وتحول عصيد = والعرب في ساحة الوهم يرمون الجمار
امة الاسلام تحلم بخالد بن وليد = والسنين تمر والحلم حجزة انتظار
الزمن نفس الزمن ماتغير ذا اكيد = من يقول انه تغير محله في شهار
الطموح يزيد والعمر ينقص لو يزيد = والاكيد الحاجة الحاجة ام الافتكار
استفد واخذ المفيد ومنه للغير فيد = والقناعة كنز قالوا فالامثال ما بار
لاتخيرت استخر واختر الراي السديد = ما يخيب الراي ما دام راعية استخار
العباده كلنا لله الواحد عبيد = والفروض ثنين ليل وثلاثة بالنهار
ماعز من الولد عند ابوه الا الحفيد = والرضا للام والدار قبله قيل جار
الهوى والمي للناس شريان ووريد = والزيارة للمقابر لمن زار اعتبار
العسر من بعده اليسر لابده يسيد = والصدق منجاة والكذب ساعاته قصار
ماحدا عايش حياته على كف الرغيد = ما بها مرتاح لا اغنياء ولا فقار
مايشاء الله يشاء ويريد اللي يريد = كل شي بحكمة الله وقدرته اقتدار
البرد ينزل على الارض ويذوب الجليد = والرياح تهب وتثير فالجو الغبار
التطور والامل قرب الحلم البعيد = والصعب ما سهله غير طعم الازدهار
الذهب يبقى ذهب والحديد اصله حديد = والحذر تخبر يمينك بمدات اليسار
الشعر احساس وشعور والشعر الحصيد = والبحور أوجاج وانت عليك الاختيار