ديوان الشاعر مشعل سالم النويمي

لك طلة حلوة وبسمة جنان = اما البقايا فلا تعليق
كل ماتجي يمنا وتبان = روحي إتمايل طرب وتفيق

حبيبي ليه الاسى منك = مليت من البعد والتعذيب
ارجوك مالي غنى عنك = قمة جنوني فيوم إتغيب

اللي غمرني فحبه سنين = وخلا حياتي هنا وافراح
لازال غرسه لحد الحين = يجني ثمرها بعد ماراح

ياغافل القلب اصحى وفوق = ونظر على ماجنت ايدك
دنياك مهما تعلت فوق = لابد تحت الثرى اتعيدك

ماعندنا للصحب تفريق = كل من عرفته لنا غالي
رجال توفي فوقت الضيق =جعل السعد فالها وفالي

هذا الشعر منبعه احساس = يروي ضما كل عاشق حي
تخرج حروفه مع الانفاس = ماهو حكي ياتي من لاشي

خلك على الحق مهما كان = حتى ولو قولهم سائك
ترى الصراحة فبعض احيان = تخسر بها معظم اشيائك

عاشرتهم فالرضا والود = ولقيت فالطيبه مكسب
حتى اللي كانو علي ضد = اليوم في صفنا تحسب

تبقى فبالي ولكم ذكره = ولا زلت غالي من احبابي
حتى صوركم على فكره = متصدره ابرف دولابي

مافاد كثر الحكي لو طال = مادام قلب الفتى صدّا
شرحت عذري شرحت الحال = لاجاب قولي ولا ودّا