ديوان الشاعر الكبير: عضيب بن هليل العلوي الحربي

هذه القصيده مرسله من الشاعر /مقعد محمد العياضي الي شاعرنا الكبير /عضيب هليل بن شلاح العلوي وله رد عليها (((وهذه قصيدة العياضي )))

ياراكب اللي من حفيزه شريناه=أخر موديل وارد البهبهاني
يكحل عيون اللي يناظر مراياه=ويشوق بال مكلفين الاواني
متخالف اللونين سمكٍ زواياه=حلك السواد بحمرة الديرماني
من الرس يسرح قبل تسرح رعاياه =طيور تغرد في ركون المباني
سرح وحط الجدي قدوه لممشاه= وسهيل حطه من خلاف الاذاني
وعبى من اطرف شيشةالجمس عباه=وتفقده وربط حزام الأماني
ثم اتكل ربي عن العوق ياقاه=وخلك من اصحاب القلوب الذهاني
جمسك عن المعقول حذراك تقصاه=خل الكزوز يجاوبن الكماني
يشدي عواء ذيبٍ بغى النشر وخطاه=ذيبٍ حداه الجوع والليل داني
والآ ميراجٍ بالذخاير معباه=بأمر الهجوم وشالت الجبخاني
الجمس سواقه على الكيف ممشاه=وقت الضحى له بالحفر حندواني
الجمس راع الجمس لعضيب عداه=يقوم له من خاطرٍ مرحباني
قدم تراحيبه وهلآ وناباه=من خاطرٍ يفرح ليا جاه عاني
وفنجال بنٍ مجلس عضيب يزهاه=بدلال سانيها من النار ساني
كيفٍ ليا من المسافر تقهواه=عنه العماس يطير بأسرع ثواني
وكبشٍ مربى عند رعاية الشاه=ايا خلو الواجب عيال الحصاني
وكمل مواجيبه ورحب وحياه =على فطاح مكرمات الصياني
وبعد العشاء من صافي الكيف قهواه=ودار الحديث اللي يبي المسمعاني
وقال العلوم ومد خطي بيمناه=يقرأ الكتاب ويكتفي بالبياني
يكفيه مضمونه ليا من تملاه=مع جاري الاحداث مسني وساني
ياعضيب جتني تعزيتكم مفاجاه=وانا بحسرة قبلها اللي فجاني
جتني وخافق مهجتي تثلغ دماه= ومنَ الكريم بمده اللي عطاني
طيرٍ من المجنى تخيرت مجناه=وعوني ليا من المقابل حداني
ياعضيب يطري لي وازريت لنساه=وليا طرالي سو سقمه طواني
مالي جدى غير ارفع يديَ لله=الله يفجع من بطيري فجاني
ياعضيب قاسينا المراره بفرقاه=هذا السبب في ضيقتي وامتحاني
ياعضيب ياكبر المصيبات كبراه=فيه وفي غيري بلاوي الزماني
ياعضيب انا مالي على الرب وقضاه=لاشك أعبَر عن مشاعر كناني
مايفيدني لو قلت لاوا حلالاه=ياعضيب باللي قدَر الله كاني
يابو هليل منك نبغى المجاراه=اغدي يخف الهاجس اللي زواني
في غاية الموضوع لا لا تعداه=سهل ولا تكرب حبال البطاني
إعلاج من قلبه شكى الهم وأعياه =وأونس وخاطب شذرة المكلماني
مثايلٍ لعضيب والرد نتناه=عسى يخفف عني امرٍ دهاني
ياعضيب كل هموم قلبي تدلاه=على فراق الطير جاني ماجاني
ليا شفت انا دمعة عيونٍ ترجاه=لو كنت غافل هزني شي ثاني
واكن ضيقي داخل القلب واكماه=وأخفي عن العالم مشاعر حناني
اضحك وانا اللي في علة مخفاه=ترجمتها لعضيب عن شخص ثاني
ابي ليا منه قراه وتملاه=يجيب داعينا بجزل المعاني
يادافع البلوى عن اللي تبلاه=يارب عفوك ياوسيع الحساني
وأزكى سلامي بالنهايه ومبداه=بسلامٍ أحلى من حليب المقاني
وصلي على المبعوث للدين وأحياه=شفيع الأمه ساعة الامتحاني

الشاعر/ مقعد محمد العياضي
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــ
وهذا رد الشاعر الكبير / عضيب هليل بن شلاح العلوي

بديت باسم اللي على الناس حسناه=قدام لأبدي بالمثل والمعاني
الخالق اللي تسجد الناس لرضاه=الله ولا غيره على العرش ثاني
وسار القلم ياطيب الفال بسراه=الله على قول الصواب يهداني
يوم العياضي يمنا الجمس عناه= فزيت يوم ان الخبر منك جاني
وصلك وصل وانا انتظر واتحراه= وهليت في مندوبك اللي نصاني
وعطاني الخط العزيز وقريناه=ولي الشرف في خطك اللي لفاني
وقريت مايجرح شعوري برؤياه=مار القدر ياكامل العرف كاني
طيراً نعيته يالعياضي نعيناه=لاشك ماتنفع كثير الأماني
ارجي عسى المعبود يمحي خطاياه=ويجبر عزا اللي من فراقه يعاني
يالله عسى في جنة الخلد مأواه=ويسكنه ربي فسيح الجناني
وانته يعوضك يالعياضي بلاماه= ابحسن الجزاء من ربك المستعاني
لوله عدواً تاخذ الثار بثراه=غسلت عن كبدك كثير الحزاني
عين العطوف اللي تحنه وترثاه=تنعي ثمر قلبٍ عليه المحاني
عسى البقا باللي تبقو لها حضاه=ويعوضها الله في فقيد القراني
قبلك ترى صاحبك وقته توطاه=شربت من مر الزمان وسقاني
امشي كما منجوم ليلٍ بمسراه=من حر ماساق الضمير وسباني
صاحبك لاتشمت نصيبك وتشناه=ترى القدر مقسوم يامودماني
نبينا المسلم على الصبر وصاه=بالصدمه الاولى يحوش الحساني
ومن تمت ايامه تهيت مناياه=تحصل له الاسباب والاجل داني
ماكل حياً دام عزه بدنياه=دنياك ماتعطي الاوادم ضماني
كم واحدٍ يضحك له الوقت وابكاه=كلٍ لك الله من زمانه يعاني
اللي كتب ربك على العبد يرضاه=مافيه شخصٍ عاش عمره تهاني
مخافة الله يالعياضي وتقواه=هي راس مال العبد والعمر فاني
انته تشير لوضعنا لاتعداه=وتقول لاتكرب حبال البطاني
الراي رايك وانته اللي توراه=انا اتصرف قد عرفي بشاني
عندي نصيحه لابيض الوجه مهداه=من صالحه مالي بها شان ثاني
وراس العلا مثل العياضي تعلاه=انته رفيع المستوى والمكاني
انتم هل المعروف والعرف والجاه=من روس ربعاً ذكرهم بالبياني
وطيب الرجل يرفع مقامه بطرياه=ياحلوها من دون شرط ومثاني
نصيحتي مابي وراها مكافاه=ونصيحة المعروف ماتستهاني
تعفي شريكك بالأسى والمؤاساه=أجر وغنيمه كان ماأنت تعصاني
تفوز عند الله وتكسب بها رضاه=وتشتد بحبال العزيز المتاني
يشره على مثل العياضي وشرواه=وإلا الردي دايم طريقه طماني
على حسب عرفي عطيت المجاراه=وانا ترى بعض العلوم تخفاني
اقسمت لك باللي بنا العرش وارساه=انه فلا جاك الغشش من لساني
والوقت مايعطي سراير خفاياه=لك راي والعالم لها راي ثاني
كلٍ حسب عرفه عطى وجهة ارياه=وانا اتبين قد عرفي بياني
يابو محمد يازبون المخلاه=ياريف راعى الواجبه والعواني
إن شفت شي من الغلط ماقصدناه=عفوك عن الزله يزيد امتناني
السيل مايمشي على غير مجراه=وانت الحكم ياشوق صاف الثماني
وذكرت ربي بأول القاف واتلاه=ختمتها بسم الكريم وكفاني

الشاعر الكبير/عضيب هليل بن شلاح العلوي الحربي