ديـوان الشـاعـر.../ مـضـحـي بـن جـمـران الـحـربـي.

يابدو مامثلكم

سلام ينساق سوق مبهرات الدلال=صفرٍ خلط هيلهن مع زعفرانٍ حمر
سلام ياللي لكم في كل جزله مجال=يابدو لو البداوه مابقاء له عصر
يابدو مامثلكم فوق البسيطه رجال=يكود من ساسهم منكم وصارو حضر
ياهل الكرم والشجاعه والوفاء والعدال=هذي بكم كلها وابصم لكم بالعشر
بس التهيتم وراء طرد الغنم والجمال=طافت عليكم دروس وراح بعض النمر
يابدو ياللي فتنكم ربنا فالحلال=لولاه يابدو مبطي واصلين القمر
اهل الشهادات في منصب وتحت الظلال=والمنسدح ينسدح مدري يموت بقهر
تسلحو والعلوم سلاح مثل الريال=من لاصبر للغريسه كيف يجني ثمر
العلم يبني بيوت العز فوق الجبال=والجهل واضح من اسمه واعرفه ماعمر
مع طيب الخلق والعفه وحبل الوصال=لاينقطع لو على شانه وطيتم جمر
والدين هذا سنام العز في كل حال= اطاعة الله واجب ثم ولي الامر
الباقيه باقيه والفانيه للزوال=والثانيه والدقيقه من حساب العمر

البـال لازادت همومـك ازعاجـه=ومن كل صوبٍ قام همـك يديـره
احرف ركابك يـم فزعتـك ناجـه=ودربٍ تيامن فيـه ستيـن خيـره
وعن مجلس به ثايرين اللجاجـه=خلك حشيم وعنه رجلك قصيـره
خذراك من هرجٍ بكثـره سماجـه=ان مانقص راعيـه زاده معيـره
لالجلجو به مثـل لجـة حراجـه=الشلـه الـي دايـمٍ مستطـيـره
الواعي الممرور يعـرف خراجـه=ولاهو بحاجـة واحـدٍ يستشيـره
محلاك ياللي نازح البعـد باجـه=بكس الجموس اللي نجح به خبيره
لاعطيت به جـوٍ يزيـدك بهاجـه=والشوف يطلق فالوسيعه نضيـره
اللي به الجـوال يفقـد ابراجـه=عن مركز الارسال غايب سفيـره
هذي طرات العمر سـاع نتواجـه=على الوعد مع الوجيـه السفيـره
والمنهج اللي مانحـب انتهاجـه=ولا تقـره فالجزيـره عشـيـره
ان الخطا يصير سهـل اندراجـه=مـدام فالاجـواد نخـوه وغيـره
واللي على الفتنه يولـع سراجـه=ماباقي لـه غيـر هـذي ذخيـره
لايكمل الوجعـان باقـي علاجـه=إليا صحا نـادا علينـا المغيـره
لو هو على العدوان صب احتجاجه=ويمثـل انـه للكسـور الجبيـره
اليا انهزمنا قام يضحـك حجاجـه=عيده ليا ناظـر علينـا الكسيـره
واللي تهاون منقـرك يالدجاجـه=الله واعلم ويـش تالـي مصيـره
المـي ماسـاوا قراحـه هماجـه=المسـك مايوجـد بنفـاخ كيـره
للعسر يسـر وللصبـاح انبلاجـه=ولاهان راعي حـق والله نصيـره
ويامن لك الارقاب فيها انعواجـه=ولا يرخصك رجال عنده بصيـره
عليك كـم قلـبٍ تزايـد اخلاجـه=ولا احدٍ يلومه فالهنوف الاميـره
في حبها ماهـو محكـم مزاجـه=صادق وحكـم فالمـوده ضميـره
يافخر من صرتي وسامه وتاجـه=صقر العروبه ابن صقر الجزيـره
لاصار فالاجواء عواصف عجاجه=يبقى ذراء اللي جاه من كل ديـره
لاغبت ثم عودت ماجبـت حاجـه=هـذي بحقـي يالنشامـا كبيـره