ديوان كسرات صقر المقرح

من اولي أعشق دروبك= والجرح في خافقي دامي
واليوم متغيّر اسلوبك= وفراقنا صار إلزامي

حمام رفرف على الكرنيش=في شط الأحلام فالدره
ماشفت مثله حرير الريش=يدرج ولا تبان له جره
فالدرّه الناس تبغا تعيش = حياتها فالبحر حُرّه
إبعد ترا فالك التطنيش= حمام ما ينْقرب مرّه

أسمع صدى ذكريات الأمس= تستجذب القلب تستجديه
وتزيد وسط الخفوق الهمس= تبغاه يرجع إلى ماضيه

دام الموازيـن مختلفـه = ويرجح به الهجر ميزانك
أشوفله خافقي صِرفـه = وأجرّعه كاس نسيانـك

قلبي انكوى بالفـراق المـر= وروحي دواها غدى عـنـده
وياكـم علـيّ الليالـي تمـر= أسير شوقي وكثر عنده

الهجر ياصاحبي ذبّاح= لا تزوّد النزف بجروحي
أرجوك هوّن عن المرواح= لو رحْت راحت معك روحي

أشرب مرار الأسى في كاس = واخفيه ما بين جُلاّسي
وادراه دمعي فوسط الناس = مابْغا أحد يجرح إحساسي

جيتك أذكرْك بايّامي= واللي فوسط الخفوق اخفيه
ما شفتلي حلم فاحلامي= إلاّ وطيفك يجيني فيه

يانجم عالي مابين انجوم=ومن حولك انجوم منتثره
تسبح فبحر الفضا وتحوم=ياحر يامعتلي قدره
عساك تسلم لنا وتدوم=تبقى لنا تجبر العثره
لله درك زعيم القوم=اللي نثر بالشعر عطره
والله اودك ولك ملزوم=ماخالف القن فالكسره
راعي الوفا مثلكم محشوم=ومثلك لنا للقيم نظره

!
!

كسبت في الطيّبات اسهوم=تقدير عشره ÷ عشره
غالي وودي لكم معلوم= يا عد نرشف صفا نهره
القيل بين العرب محكوم= من خالفه يجنيَ الحسره
ياكم فبحر الحروف يعوم= أهدافه الكم والكثره
والبعض ما يلتفت لسلوم= عند العرب ، والعرب تشره
كل ما بنا بالخيال احلوم= صارت مع الوقت مندثره

ما دمت تسكن صميم الذات = أبغاك تحرص علـى الآتـي
لاسْمِعت وسط الخفوق آهات= أرجـوك خفـف معاناتـي