ديوان الشاعر محمد سعد اليوبي (لافي)

أقبل سهيل وحـل من دون نيسـان= وجات الثريا من سماها.. وحيَّا
وجات النجوم وكونت عرس ماكان=وزفت سهيـل وهنتـه بالثريَّا
وعَقَّب كواكب نيِّـرة كبـر ميسان=بيـن المعـزة والمجـرة ايتفيَّا
ثم انحدر من كل صنوان صنـوان=وزيَّن شعاع الشمس طلع المحيَّا
وبعد اكتمل ثوب القبيلـة بالاردان=وجابت قبايل وامتـلاء كل خيَّا
سارة قبيلة حـرب في كل الأزمان=حـرب الأبية مركسـة كل عيَّا
ولا ذم كـلات القبايـل بنقصـان=نعمين فـي نعميـن ميت وحيَّا
كل القبايل عـز ترجـح بالأوزان=لو كان وزن الناس ماهـو سويَّا
والله يعـز اللي تعلَّـوا بالأركان=آل السعود أهـل الوجيـه النقيَّا
مع القبايل كلهـم جمـع انسـان=دون الشـريعة يطلبـون المنيَّا

الله رمـاني بيـن حارق وحــراق=وقلب (ن) رقيق مجـرب الود توه
مـابين حـر الشمس ياليت ينطـاق=ومابين نور(ن) مصدر البدر ضوه
البدر نوره لاهـوت شمس مـا راق=وحـر نور الشمس يا قـو قـوِّه
وقامت تلاطـم به ملاهيب الاشـواق=والغيث ماشرَّف عـلى وقت نوه
وأمسيت حال اللي ورى الموج ينساق=لازف هـوه يرتمي جـوف هوه
وقمت أتيادا والبـلاوي في الأعماق=نصْبَت عقـال وصالي النار جوه
وأنا سنافي مـن طـويلين الأعناق=غير البلا في اللي بلاني بخـوه
الله يجـازي مـن بـلاني بالاسواق=والله يجـازي كل مخلـوق نوه
ماعاد أميـز بين طـارق وطـراق=ضيَّعت حظي مع قليل المـروه
كل ما لِمَح بـارق يخـايل لبـراق=حط الوطى من خنصره لا علوِّه
قلت افترقنـا ما ورى الحق مـدراق=وكل ما يزهـاك لارحت سـوه