ديوان الشاعر عجاب صالح الحنتمي المزيني

يابدر فينا لو تطول اليالي
لابد مانمشي طريقٍ مشيته

عمر الفتى تاليه عجز وزوالي
اما بكاني حي والا بكيته

مرحوم ياحلو النباء والقبالي
ياخيرٍ باقي مع الحي صيته

رحلت عنا ياكريم السبالي
حزنك يابن ناحل بقلبي شكيته

يابو فهد بعدك ترى ضاق بالي
لو اقدر المرقاب قمت ورقيته

عسى يخفف ضيقتي راس عالي
ورتاح في عاليه ساعة بديته

ادري ماعمره رد غالي لغالي
لكن من مافي ودي نصيته

اهبي يادنيا قصيرة حبالي
كم حي قفت فيه من وسط بيته
عجاب صالح الحنتمي

شايب لسانه طول حبل المحاله
ويديه عن كل المراجل قصيره

على الردى كنه موكل وكاله
حقير والنفس الخبيثه حقيره

ياعل مافال الرجاجيل فاله
به من صفات البيض خسه وغيره

نمام جعل الموت يقصر حباله
وان عاش جعله بين هم ٍ وحيره

هرج القفى والنمنمه من خصاله
مفضوح مابه طيب راس وستيره

تكرم رجاجيل الوفى عن قباله
شرواه حطوله علف بالحضيره

تقول عشبه طالعه بالدماله
لو اثمرت ماعاد فيه بريره

عجاب صالح الحنتمي

يناشدن عني ومنهو خوالي
عجاب ابن صالح خوالي رحامين

حمود ومحمد بعاد المدالي
وصلاح مع صالح رجالٍ عزيزين

اكرام ساس اكرام باول وتالي
نعم الخوال مرجحين الموازين

اولهم اللي في نهار القتالي
ماينكسر بالكون وسط الميادين

وحفادهم كلن يروم المعالي
متعلمين وفاهمين القوانين

ارجال مافيهم قصور وخمالي
للضيف دايم فاتحين الدواوين

مع الشبب حلو النباء والقبالي
وفنجال للعمسان يشفي من البين

عنهم لو اكتب كل ليله مقالي
قليل في حق الخوال الوفيين

عجاب صالح الحنتمي

يالموت خذ خبلٍ كبيره علابيه
يميل المعلوق لوهو ذبيحه

الله سبحانه من المال معطيه
ويديه عن فعل الجمايل شحيحه

يامكثر علومه وماكثر دواديه
ماغير تسمع بالمجالس فحيحه

ومهل لقرم ٍ تعتزيبه بنيخيه
صحريح ويحب العلوم الصريحه

كريم مايملك من المال يعطيه
محشوم عن كل العلوم القبيحه

رجال عرفه في حياته يقديه
نصيح ويحب الرجال النصيحه

سواة سلمان الوسيمه وطاريه
كريم سبلا والسوالف مليحه

ياعل تبطي يالعوارف لياليه
افخر بمثله وتعمد مديحه

ورجال ماودك دقايق تخاويه
مامن وراه الا الندم والفضيحه

تم الكلام اللي ثمينه معانيه
ومن لابغاه الدار قدمه فسيحه

عجاب صالح الحنتمي