في عيونك يالبرا دمعة برية ( اول مشاركة هنا )

السلام عليكم ورحمة الله وبركاته
هذه أول مشاركة لي في هذا القسم
لذا أتمنى من إخواني الشعراء أن لا يبخلوا علي بإبداء ملاحظاتهم او انتقاداتهم إن رأوا في القصيدة مايستوجب ذلك
وابشركم الصدر واسع والنقد البناء يفيد الجميع ان شاء الله
وهذي القصيدة بقصتها..

كنا في المقبرة لدفن احد الاشخاص رحمه الله ورأيت أحد احفاده الصغار الذي أثـّـر في كثيرا عندما رأيت علامات الحزن وعدم التصديق على وجهه ورأيت مكابرته على البكاء في هذا الموقف فراقبت حركاته لدرجة أنه أشغلني عن المشاركة في الدفن
واسم هذا الولد " البراء"
فقلت :

في عيونك يالبرا دمعة برية = شفت في برّاقها حزن الطفولة
يالبرا لا تحسب الدمعة خفية = لو كسا الوجه التصبّر والرجولة
شفت دمعة فيها عجز المقدرية = وبانت فوجهك تعابير الذهولة
في شفير العين دمعتك الأبيّة = وتنظر الجثة على اكتاف إمحمولة
وشفتك تحاول تطاول لو شوية = البشر حوله وشوفك مايطوله
ثم وقفت فصمت يحكي عن شكية = يوم حانت فالقبر ساعة نزوله
نزّلوه وميّلوه بكل روية = وقيل بسم الله وعلى سنة رسوله
كنّي بك وانته تنادي " وش بيديه" = ودك تفرق جموع الناس حوله
كنّك تقول للملا.. "ردّوه ليه" = والملا تدفنه ياخيّي عجولة
" ردّوا جدّي والله لاعطيكم هدية" = ياطفل كل البراءة في حلوله
وكني اسمع صوت صيحتك القوية = " كيف تحثون التراب بهالسهولة"
إغمضت عينك كما اللي حس كية = وناخ رمشك عقب مازادت حموله
وسالت الدمعة..بعد كانت عصية = إندفن معه الأمل في شوف زوله
عزّي لعينن تمثل مسرحية = فاز فيها الدمع بادوار البطولة
في دموعك ذكريات الجد حية = والحكي صارت ركايبه إمعقولة
ورحت تبكي جنب أخيينك يا أخيّه = وانها الدمعات فأعينهم جفولة
وسرت حاير.. بين روحة وبين جية = ذود فكرك فاقدن راعي رحوله
الخدود بدمع عينك مسقوية = والحزن دِقّت حوالينك طبوله
يعلم الله يالبرا ويشهد عليه = ما ألومك في مصيبتك المهوله
لكن اسمع يالبرا وإحسن إليه = من كتاب الله الكلام اللي بقوله
كل نفسن وارده عد المنية = وكل إنسانن بيُسأل عن فعوله
ماتفيده هذي الساعة حمية = ولا يفيده هو من أيتها حمولة
إدع له يرزق ثبات ومغفرية = حين ما يُسأل عن الشرع و اصوله
منهو ربه ؟ وشهو دينه ؟ من نبيه ؟ = إدع له يحسن جوابه مع قبوله
واعرف إن من راح منها يا هنيه = ريّحه ربي من همومن تنوله
لا يغرك ورد ..هالدنيا الدنية = وردها ماله ضمانة عن ذبوله
دنيتك مضمار وأعمالك مطية = والممات تباري البارق ذلوله
لا تدور تحت شمس الموت فيه = تحت شمسه كل نجم اُعلن أفوله
والله إنك يالبرا أثرت فيه = وانتفض بركان شعري من خموله
والدليل إسهابي فحالتك ذيه = كيف ما استقصرت قافي زاد طوله
كفكف دموعك من العين الشقية = وإرث في حالي بعد حالك رثوله
ضد أمر الموت ما تِرفع قضية = وما تردّه لا وساطة ولا عمولة
وإن تجمّعنا وتآزرنا سويه = محدن يرد المقدر عن حصوله
عظّم الله أجرك ونحّى الأسية = يا جِعل حبل الحزن يِقطع وصوله
والله يرحم منهو ولـّى وغاب ضيه = وعل فالفردوس مرتعه ورفوله

.
.
.
اخوكم \ ابو طلق
.
.

صح لسانك مليون على القصيده
والله يـعـطـيـك الـعـافيـــــــــــة
بيض الله وجهك

لاهنت وصح السانك

تقبل التقدير والاحترام

وفقك الله

صح لسانك يابو طلق لاهنت قصيده رسمت بها مشاهد الموضوع كامله بيض الله وجهك والله يرحم امواتنا واموات المسلمين والله المستعان سلمت ودمت يابو طلق لاعدمناك

صح لسانك يابو طلق

قصيدة ليست من نسج الخيال

ولكنها تصوير لواقع عايشته

وهنا يكون البوح الوجداني

ادق واعمق واتقنت حبكها

لتسرد لنا تسلسلها بكل دقة وإتقان

بيض الله وجهك

جزلة من شاعر جزل

الاخ القديرابوطلق

صح السانك وبيض الله وجهك ودام الله عزك

تسلم ياالذيب على هذي القصيده الجزله والرائعه بروعة حضورك الجميل

تقبل تحياتي وتقديري

اخواني

الحب الباقي
الجرح
مضحي بن جمران
بخيتان البشري
وليف الشوق
.
.
.
صحت ابدانكم
وبيض الله وجيهكم على مروركم وتعليقاتكم
اخوكم \ ابو طلق

صح الله لسانك
ولاهنت
وسلم فكرك وبنانك
دمت برعاية الله وحفظة