ديوان الشاعر/سند مسند العريمه الحربي

ودي على شويمان في حزة السيل =
=لافاضت إتلاعه على طلعة الشمس
ارقى على هضابه وبالعين دربيل =
=نطلق به الناظر على قبضة الخمس
وأعيد ذكرى غاليه جد بالحيل =
=في وقتها المبطي وكنه تقول أمس
مبعد عن الزحمة وبعض التهاويل =
=وأرتاح لو يومين من عالم العمس
النت نلقابه سوالف غرابيل =
=في واقعه نصف البشر منغمس غمس
وان رحت للشارع بلشت إبهاذيل =
=سرعه على فاضي تحت حامي الشمس
وبعض المجالس تفتقر للرجاجيل =
=تلقى سوالفها من الطمس للطمس
أحدن يسولف هرجة القال والقيل =
=وذاك المقابل في جهازه على اللمس
وأحدن يسولف بالسياسة وتحليل =
=ويقول واقعنا ترى منحمس حمس
وأحدن يسولف بالتجارة على النيل =
=وأحدن يسعر قيمة الجيب والجمس
وأحدن يقول اليوم أطول من الليل =
=وغيره يقول العج بالجو له رمس
سوالفن ماهي سوالف محاصيل =
=والبعد عنها يطرد الهم والعمس
ويا دار وين اللي سكن بك من الجيل =
=حتى معالم نزلهم منطمس طمس
وياما سمعتي من تلاوة وتهليل =
=ويابعد فرق العام واليوم غير أمس
أول جماله صح من غير تجميل =
=ويابعد فرق الحر عن كشرة النمس