لاترتجي شي من انسان=نسي الوفا والقوانيني..

ابومبارك اليوبي=
سلام وين انت ياربان=غايب لك شهور وسنيني
ياصوت الابواء جيت الان=قاصدك وابغاك تفتيني
حمد بن عتيق اليوبي(صوت الابواء)=
يامرحبا يارفيع الشان=ترحيب يشمل محبيني
لو غبت لامثالكم مسكان=فالقلب ياللي تناديني
ابومبارك اليوبي=
تبقى..وماكان فالحسبان=ولاكان فالبال يأتيني
اللي اعده من الاخوان=بالشر اصبح يجازيني
حمد بن عتيق اليوبي(صوت الابواء)=
عفواً.اباسألك ياشيهان=سؤال والقصد تبييني؟
واجهته بفعله اللي بان=والا تركته الى حيني
ابومبارك اليوبي=
بالطيب ياخوك من ازمان=عنته في كل المياديني
ومن بعد ماصار له سلطان=اخلف جميع الموازيني
حمد بن عتيق اليوبي(صوت الابواء)=
هيا اسمع العلم بالبرهان=مني واضن انت توحيني
لاتكون للي مضى ندمان=من عان: ربي له يعيني
ولا ترتجي شي من انسان=نسي الوفأ والقوانيني
انصحك بالترك والنسيان=واحذر منه كل مايبيني