ديوان الشاعر ( راشد الزهراني ) المحيط

البدع راشد الزهراني ((المحيط))

يا أهل المعاني ورسم القيل = يامن لكم فن من فنه
من يكثر الظن والتأويل = لا تساعدونه على ظنه
ويخطي على أهل المثل ويميل = ويخلف معانيه عن قنه
ردوه بالنصح والتدليل = ولا تقصرون الجهد عنه

مجاراه من الشاعر الكبير مطوع الحرف

عدي وفي خاطرك لا تشيل = النذل ياما يجي منه
لا تنزعج لا عترضك خبيل = او طفل غره صغر سنه
طايش مايوفي كفوف الكيل = ويظن بين العرب إنه
مافيه مثله في هذا الجيل = إنه وإنه ولكنه

البيت يبنى على ساسه = والمرجله والشجاعه ساس
والعلم معروف له ناسه = والراس من يوم يومه راس
وعمر الردي مارفع راسه = ولا عادته يكسب النوماس
معروف حجمه ومقياسه = مايقام له وزن عند الناس

تمضي لنا بالحياه أقدار = غصبا علينا نعانيها
ويبقى لها عندنا تذكار = واحداث نذكر لياليها

قدام لا ينطق لساني = وتسمع بقلبي صدى الآهات
تحدرت دمعة احزاني = وعبرت عن خفايا الذات

تبرئي يا حروف القاف = من ضعف الأمثال والمعنا
ما احلاك لا قالك العراف = وجادت معانيه وامتعنا
مثل الذهب في يد الصراف = لنا صرفناه ينفعنا
ويسد في ساعة الميقاف = ولا تختلف وزنته معنا

في ملتقى حرب شفنا الطيب = وشفنا الأدب في مجالسهم
لعلها شمسهم ما تغيب = ولا يجف منهل مدارسهم
أهل المعزه شباب وشيب = يأنس بهم من يجالسهم
ويكسب من علومهم تهذيب = ويقتبس من مقابسهم

غصبا على الخاطر المجروح = يقبل بالأفراح ويجامل
لجل الليالي تجي وتروح = وحسابها ما يجي كامل