قصيدة من سليم الجابري وردها من اسامه الحربي

بسم الله وعلى بركة الله وبناء على طلب اخي العزيز محمد بن معيض العجي الذي طلب مني قصيده من الارشيف لي وللاخ منور فضي المعمري فايليكم اخواني هذه القصيده وردها الاولى لي وهي معبره عن نفسها والثانيه للشاعر أسامه مساعد الجابري ابن اخي ارجوا ان تنالا استحسانكم وبالنسبة للأخ الشاعر منور المعمري فسوف أزودكم بقصيدته حال وصولها لي لاحقا0

يقول سليم الجابري


البارحه مانمت جالس على الكوع === اسامر نجوم السما في سماها

اطير من مشروع وادخل بمشروع ==== وجربت في مر الامور وحلاها

وحللتها تحليل بالشكل والنوع ==== ولقيت فيها علوم محد(ن) لقاها

وابحرت احاول عشرة ايام واسبوع ==== لكن جات الثانيه في سراها

جتني علو تهد بالحيل وتروع ====== تبغى تنوشني وتدرج رحاها

قلت ابعدي ياعلوم والحبل مقطوع ==== يكفي من النار السعيره سناها

قالت جميع الهرج يكتب ومجموع ==== واللي يدور للمشاكل لقاها

قلت الغلط لاهله مرجوع مرجوع ==== واللي ظلمني كلمته مارعاها

لو الظليمه جات من شخص قابوع === والله ما اتبعها وادور وراها

مير الظليمه جات من شخص قاطوع === وهذا سبب عيني وهذا عماها

ضحك علينا بليس وابليس مسلوع ===يدخل مع الحبه ويخرب ذراها

انصحك ياللي تفهم الهرج لاتوع ===== لاتفرح ان العين ينهل ماها

والشجره اللي مالها جذع وافروع ==== ماتذري اللي يلتجي في حماها

ودك لها بمنشار قاطع وفاروع === اسرع بقطعتها وقطع نماها

والكلمه اللي مالها راي وسنوع === اقرص عليها بالسنون وجماها

قلته وانا في قلبي الهم مطبوع === من ناس اقدرها واقدر نباها

لونها من غير فالحبل مقطوع ===== والبايره ترجع على اللي شراها

وان شفتلك نمام يلهث من الجوع === ابعد عنه والبنيه اللي بناها

والحر مثلك مايعلم وهو طوع ==== والنار ماتحرق سوى من وطاها



الشاعر سليم بن سعود الجابري



الرد من أسامه


البارحه بالليل والخلق فهجوع ====== عيت عيوني لا يجيها كراها

قريت لي مكتوب والقلب مشلوع ===== كنه على نار تزايد صلاها

ماكني الا بكهرب الماس ملذوع ====== ماترجمه عقلي لساني قراها

حنا عيال سعود والراس مرفوع ====== راياتنا بيضا وكلن يراها

الطيب فينا كنه النبت مزروع ====== في روضة يشتاق منهو مشاها

حنا الوفا فينا على القلب مطبوع ====== والطيبة يسعد بها من بداها

كلامنا كالسيف والراي مسموع ====== هاذي سجيه ما ندور سواها

وبعض العلوم تغث للقلب وتلوع ====== ونفسي من الصده يجيها بلاها

الناس مجبوله على كل موضوع ====== والناقصه مسكين منهو تلاها

واللي ينم بصاحبك ذاك مخدوع ====== ولاهو يثمن هرجته لا بداها

ودك تقدمله من السم قرطوع ====== حتى يموت وحاجته ماقضاها

أنتم لنا قدوه ونافع ومنفوع ====== كيف الزعل ياعم شوش صفاها

والهجر بين الناس ماهو بمشروع ====== يقطع قلوب زايده في غلاها

خل السعه فالبال والصدر موسوع ====== خلوا محبتكم طويل ٍ مداها

والكل للثاني كما القلب وضلوع ====== ولا يستمع للي قليلٍ حياها

وحنا الغلا له داخل القلب ينبوع ====== يجري واحسه زال عني غثاها

الله يديم الحب وفراحنا تشوع ====== حتى الوجوه يزيد فيها بهاها

ختمت بالرحمن ماهب ذعذوع ====== وما حنت العوجا تدور نماها

الشاعر : أسامة مساعد الحربي