مع محمد العسيلي رحمه الله

محمد عبدالله العسيلي المرواني رحمه الله رحمة واسعه
كان يحب المداعبات وهوخلوق صافي النيه ارسلت له
الابيات التاليه:.

سر ياقلم واكتب من الفكر منظوم = ابيات في مضمونها مستقيمه
قول نظيف من اطيب القول محكوم = مثل النسيم اللي عليل نسيمه
لاهوعتاب ولامعاتب ولالوم = ولارد فعل من خصيم لخصيمه
بعد التحيه نبتدي قول مفهوم = يحمل معان اجداد ماهي قديمه
لعلها تاصل عزيز من القوم = وقلبي يحب اهل النفوس الكريمه
قل يالعسيلي مرسل الخط ملزوم = يبلغك حيثك بك سياسه حيكمه
عن الوكيل اللي يبي يبعد الحوم = وابعد ومعه محاولاتي عقيمه
من ضلع دخنه راح بي يم بلعوم =متجاوز وادي القصيم وقصيمه
والهرج فيه بكل الاحوال مسموم = ادخل على الله من كلام النميمه
ولوجيت بالفرس مع عسكر الروم = صيطر عليهم وانكفوا بالهزيمه
ومع قو باسه به حيالات وعزوم = ما قدر عليه ولونهضت بعزيمه
فيما ذكرته فيه ماهو بمظوم = وتراه مثلي مايحب الظليمه
ابلغني انك جيت للخرج معزوم = مار العزيمه كد سبقها عزيمه
لاشك انا ابافصل وكيلك من اليوم = وعسى العوقب يا العسيلي سليمه
وكان المسايل جابها لمسة اخشوم = قلت الكفيله في ضروف حشيمه
حيثه برغم اللي ذكرته من علوم = عندي حشيم وله معزه وقيمه
انا هدفي شوفك عسى عزك يدوم = وشوف الرجال هل المعرفه غنيمه
وحنا يد وحده بعادات وسلوم = والرجل له عند المحبين قيمه
والرجل ماله غير ماكان مقسوم = والعلم يعرف صايبه من صميمه
وعن الخطا مايوجد انسان معصوم = الا لنبي موهوب سيره عظيمه
وعلى النبي صليت وانهيت منظوم = عداد ماحطت على الارض ديمه

هذه يوم عيد رمضان عام1408 هـ فرد عليه رحمة الله بالآتيه:.
الابيات تهدى للاخ علي زيد الحربي ارج ان تنال اعجابه:.

ارسالة جتني بها انذار وهجوم = وسميتها من باب فخري يتيمه
حي الجواب الل على الخير مرسوم= تحية عن الخطا مستقيمه
من خاطر عن منطق الشين مفطوم = ويشفق على الطيب ونفسه رحيمه
خص ليا من الخبر صار معلوم = ومتجنب درب الخطا والشتيمه
خط وصلني به عبارات ورقوم = من غالي يشكي علينا نديمه
مناوره لكن تقل مابها اسهوم = تمشي على اصحاب العقول السقيمه
ياعلي لوان السما دونه غيوم = افهمك ياكيد النفوس المزيمه
عوق الخصيم اللي ملا نفسه الزوم = تحطم عناده وتمهن رسيمه
ليا مايبيع بضاعته بارخص السوم = ويبني على راسه من الذل خيمه
لعل من خلفك ياعلي مرحوم = ياقايد المركب رفيقك زعيمه
اما الوكيل اللي وصل راسه الشوم = ماني مسئول ليا عطيته قسيمه
جعل عدوه يابيض الوجه مايقوم = طبعه عنيد ولايوفق غريمه
يبي يوهقني وانا ماقدر اعوم = في عاصي يركب عميمه طميمه
في حندس كن القمر فيه ملقوم = لاتشاف به نجمه ولاتشاف غيمه
ونته تقل تضفي على المجرم هدوم = تمشي على الجره وتخفى الجريمه
ابراي لله من مسلم وسلوم = كفيت حبلي لو ورودي محيمه
ماني مباريكم تقل مشي منجوم = ونتم علي تغيرون الوسيمه
ليا صار سلاحي بس خنجر وقدوم = اخشى من اللي دمرت هيروشيمه
ياعيال يوم انتم مناعير وقروم = ومن لابة لها مواقف عديمه
قبيلة ماتقبل الحيف والظوم = وبين القبايل منزلتها كريمه
لها بنجد اوطان وتراب وارسوم = ولها وفا كلمه وقوة شكيمه
لاتواخذون اللي قطع وقته الصوم = يطلب من المولى رضاه ونعيمه
بشهر مبارك فيه معطى ومحروم = الله لايكتب علينا الجريمه
لنا بها الدنيا مطاليب وهموم = والعمر راحل والليالي مقيمه
لابد من يوم على النفس محتوم = والخطب فادح والمصيبه جسيمه
ياعلي ماعنكم من السر مكتوم = كان الله احيانا قطعنا الخريمه
يمك مسايير عسى عمرك يدوم = شوفك شرف ماهو طمع بالوليمه
وتم الكلام وكل موجود معدوم = الا الوجود اللي وجوده يديمه
الله تعالى جل شانه عن النوم = واجاب في صعب المواقف كليمه

تمت في 3/10/1408 هـ مع تحيات /محمد العبد الله العسيلي

الاخ ابو خالد صح لسانك وصح لسان الشاعر محمد العسيلي رحمة الله عليه
الله يعين الوكيل راح فيها

بيض الله وجهك يابو خالد صح لسانك ولسان محمد العسيلي الله يغفرله
شكرا لك على هذه الدرر لاهنت

صحت السنتكم
والله يـعـطـيـكم الـعـافيـــــــــــة
بيض الله وجيهكم

لنا بها الدنيـا مطاليـب وهمـوم
والعمر راحـل والليالـي مقيمـه
لابد من يوم على النفـس محتـوم
والخطب فادح والمصيبه جسيمـه


رحم الله شاعرنا العلم الشاعر محمد العسيلي رحمه واسعه


ابو خالد بيض الله وجهك على النقل الرائع

صح لسانك
..
..
أسجل اعجابي بالقصيدة
..
ويعطيك العافيه ..

قصائد جزله الله يبيض وجهك
وصح السانك وصح السان الشاعر : محمد العسيلي رحمه الله

بيض الله وجهك يابو خالد صح لسانك ولسان محمد العسيلي الله يغفرله
شكرا لك على هذه الدرر لاهنت

رحم الله الشاعر محمد العسيلي ولاقصرت يا ابو خالد

صح لسانك



شاعر جزل



لك تقديري