بيني وبين زامل العوفي الغاز

زامل بن علي العوفي من الاصدقاء الذين اعتزبهم وجهت له لغزين
قال واحد ماهو وارد قالوا الحاضرين عوضه عنه ار سلي مرزو ق
مبشر قال عطه عشرين لغز والرجل ذكي وناقد وشاعرفكتبت له
الآتي:.
ــــــــــــــــــــــــــــــــــــــــــــــــــ

بديت باسم الله جلت قدرته= الوحد اللي من لجا له ماندم
يابوعلي جعلك بخير ونعمه = يالطيب اللي كل علمك محترم
فيك الصراحه والمروه والوفا = مع المعرفه والشهامه والكرم
يا مفسر المعنى بتحليل الذكـا = وتصدّره واللي جهل به يحتزم
ابا اسالك حيثك فهيم وعارف = ومثلك ليا سمع المعاني يفتهــم
عندي لك الغازعساك تحلـها = على الرخا ماقول سلم وستــلم
1) انشدك عن جاهل يسوقه عاقل = يمشي وراوقدام مشي منتظـــم
يفتح طريقه ون مشى بسنونه = وليا فتح درب بلا خوف انهـزم
2) ونشدك عن شي حرام طــاهر = طهارته تطهر بها كل الامــــــم
3)و وشماشيه لو طوعوها وسرعت = ممشى ثلاث اسنين مايعادل قدم
لاتاكل التمره ولاتشرب لبن = ولاتاكل الخضره ولاتاكل لحــم
تاكل ولاتشرب وفيها فايــده = ولااظنها تطعم لماكلهــا طعـــم
4)وانشدك عن شي لقيته يـاكل = ياكل رضم ولاشبعوه من الرضم
5)وانشدك عن حاكم بدبرة حاكم= يحكم على الحاكم ويرضى به حكم
6)وويش الذي حمّل بتهمة قاتل = وجيب الدليل وقيل هذ المتهـــــم
لكن براته قالها بلسانــــــــه = لو كان ماينطق بلفظ ينفــــــهم
7)وانشدك عن بحر تعب به سبح = لويبتديه من الطفوله للهــــــرم
كل البشر يابو علي ما تقطعـه = ماله نهايه يا طـــــويلين النسم
8) وعن من توفى مرتين من البشر= عبره بدت للمعتبر منذ القــــدم
9)وعن من نذر نذرووفّى نذره = مانفذه لاشك حكــم الله حكـــم
نذر صبر حتى تحقق مطــلبه = ون ما عرفته فاذكر اصحاب العزم
10)وانشدك عن شي خفي واضح= منشاه مايعرف ويخلق من عــدم
ولو تطلبه في كل ساعه حاضر = ردد مثل ما قيل رفرف ياعــلم
11)وانشدك عن حاجه تضروتنفع = لكن على نوعين يمكن تنقســم
النوع الاول في الشريعه جايز = والنوع الآخر به مضره ويحرم
يضيع به حق ويثبت باطـل = والظلم نار الله يجازي من ظــلم
12)وانشدك عن بيت ضعيف ساكنه= بيت ضعيف ومن سكن به ينرحم
ماتستطيع بناه ونته ماهـــر = واللي بناه بدون لحم ولاعظــــم
13)وانشدك عن رجل تحكم بجرته= يمشي على راسه وفي راسه سهم
14)وانشدك عن رجل قليل خاتمه = الا ليا منّك حكمته وانخــــــــزم
يقذف بناته من امام ومن وخـر = ليا ذبحهن خيرهن معه انعـــدم
15)وانشدك عن رجل تجيبه عندك = حارس على بيتك وهو مثل الصنم
يصرف حسابه من حسابك بالرضا= يعمل لغيرك وانت بامره ملتزم
16)وانشدك عن شي مشى قدامك = ونته وراه وهوكريم لمن حــلم
لولاه ضاقت بالعباد الدنيا = لكن صحيح العزم يبراه النجــم
17)وانشدك عن شي تحسب حسابه = غايب وهو ياصل ان كان الله قسم
يقل يكثر نعمة الله تنذكر = اصبر على شانه وجامل واستقم
18)وويش الذي جبته بعشق ورغبه = وضيّق عليك وصارشر يحتدم
اما تحيزم واقلعه عن دارك = والاتراه يصير في جسمك ورم
19)وويش الذي ياكل ولايوكل معه= ياكل ولايشبع ولايحس بألم
20)وويش الذي كل الخلايق تكرهه = وتمشي له الامه على ساق وقدم
تم الكلام وباق اللـــي عندك = واقبل تحياتي وهذ ما لـــزم

فرد ابو علي بالابيات والحلول التاليه:.

يامرحبا ترحيبة ممزوجه = بدهن عود وللعسل فيها طعم
برسالة جت من رفيق وافي = في كل حال مدرك قول ونعم
ليا عدوا اهل العرف يحسب منهم = شاعر وله هيبه ويحشم ويحشم
ارسل علي ارسالة مرفوقه = بعشرين لغز وكل لغز له خصم
وسميت باسم الواحد الفرد الصمد= وفيه اتكلت ومن توكل به سلم
وعطيت رمعاتي حسب مفهومي= عساك يابن زيد يقنعك الحسم
نشدت عن جاهل يسوقه عاقل= يمشي ورا وقدام مشي منتظم
هذا هو المنشار مابه غيره = يفتح طريقه دام سنه ما نثلم
ونشدت عن شي حرام طاهر =طهارته تطهر به كل الامم
هذا هو البيت الشريف بمكه = مابه حرام طاهر غير الحرم
وعن ماشيه لوطوعوها واسرعت =ممشى ثلاث اسنين مايعادل قدم
ذيك الرحا والحب هو مطعومها = ون حركوها ما تقدم تبترم
ونشدت عن شي لقيته ياكل = ياكل رضم ولااشبعوه من الرضم
هذا حسب ظني هي الكساره = يرمى الحصى فيها وهي تفضم قضم
ونشدت عن حاكم بدبرة حاكم = يحكم على الحاكم ويرضى به حكم
هذ هو الميزان حكمه عادل =ليا حكم ماحد بحكمه ينظلم
ونشدت عن متهم بتهمة قاتل =جيب الدليل وقيل هذا المتهم
الذيب يوم اتهم بقتلة يوسف = واثبت براته باليمين اللي قسم
ونشدت عن بحر تعب به من سبح = لو يبتديه من الطفوله للهرم
هذاك بح العلم وانت ادرى به =كم واحد رقاه عالية القمم
وعن من توفى مرتين من البشر = عبره بدت للمعتبر منذ القدم
هذا العزير وقصته معروفه = احياه من يحي العظام وهي رمم
وعن من نذر نذر ووفى نذره = مانفذه لاشك حكم الله حكم
ذاك النبي ايوب في ساعة غضب = نذر ولا وفى النذر حيثه ندم
ونشدت عن شي خفي واضح = منشاه ما يعرف ويخلق من عدم
ذيك الهوا منهية ماموره = يديرها اللي بالسراير معتلم
ونشدت عن حاجه تضر وتنفع = لكن على نوعين ممكن تنقسم
ياعلي ذيك الواسطه معروفه = لاتعتصم فيها وبالله اعتصم
ونشدت عن بيت ضعيف ساكنه = بيت ضعيف ومن سكن به ينرحم
هذاك بيت العنكبوته ظني = لعل بيت ما يذري ينهدم
ونشدت عن رجل تحكم بجرته = يمشي على راسه وفي راسه سهم
هذا يا بو خالد جوابه واضح = اسمه قلم ياللي بخيص بالقلم
ونشدت عن رجل قليل خاتمه = الا ليا منك خزمته وانخزم
هذا المسدس جارك الله شره = لاتنقله ياغير في وقت مهم
ونشدت عن شي تجيبه عتدك = حارس على بابك وهو مثل الصنم
هذا هو العدّاد حسب اوصافه = سدد فواتيره واضافات الرسم
ونشدت عن شي تحسب حسابه = غايب وهو ياصل ان كان الله قسم
هذا هو الراتب ولغز وارد = جد بعملك وراتبك لاينخصم
وويش الذي بعشق ورغبه = ضيق عليك وصار شر محتدم
ياعلي هذ الدين حمله جاير = من يبتلا به في سداده يلتزم
وويش الذي ياكل ولايوكل معه = ياكل ولايشبع ولايحس بألم
النار تقصد عاذنا الله منها = تاكل ولاتشبع ولكلش تلتهم
وويش الذي كل الخلايق تكرهه =وتمشي له الامه على ساق وقدم
الموت جعل الله يطول عمرك = لابد منه ووعد خالقنا يتم
ماسلت عنهن بالاجابه جنك = مفسرات موضحات بالاسم
تمت واختمها مثل مبداها = في دهن عود ودمت يالرجل الشهم

بيض الله وجه ابو علي

شعار كبار لهم وزنهم
صحت السنتكم
والله يـعـطـيـكم الـعـافيـــــــــــة
بيض الله وجيهكم

صح لسانك ابو خالد وصح لسان زامل
الحقيقه بدع ورد في غاية الجمال والروعه
واللغازك ممتازه وافيه ورد بكل اقتدار
كلاكما ما فيكم حيله عباقرة شعر واللغاز
اسجل اعجابي وتقديري لشخصيكما و لما سطرتم
الله يعطيكم الصحه والعافيه
وتقبل ودي واحترامي

ابو خالد الفريدي

صح لسانك وصح لسان زامل العوفي

وماشاء الله عليكم وياليتك جبتها لقسم الالغاز قبل النشر والله الغازها رائعه

صح السانك يا بو خالد وصح السان زامل العوفي


شعرا كبار ماشالله عليكم وطرحكم جزل لا هنت على هذا

صح لسانك يابو خالد وصح لسان زامل العوفي
الحقيقه الغاز استفدنا من الله يبيض وجيهكم

صح لسانك ابو خالد وصح لسان زامل
الحقيقه بدع ورد في غاية الجمال والروعه
واللغازك ممتازه وافيه ورد بكل اقتدار
كلاكما ما فيكم حيله عباقرة شعر واللغاز
اسجل اعجابي وتقديري لشخصيكما و لما سطرتم
الله يعطيكم الصحه والعافيه
وتقبل ودي واحترامي

قمة في الروعة


ابداع بحق والكلمة قليل لوصفه

لكلا الشاعرين جل احترامي

صح لسانك ولسان الشاعر زامل العوفي وعلى القوه

الحب الباقي
ابوعادل
خالد اللهيبي
خالد الحصني
سعد المحمدي
مضحي بن جمران
بنت المعلا
شعيب الحربي
اولا اعتذر عن تاخري في الرد وبكل اسف
ثانيا اطلاعكم وتأييدكم وسام افتخر به لانكم من اصحاب المعرفه
لكم جزيل الشكر وعاطر التحيه مع المحبه الصادقه