ديوان الشاعر فواز العمري

الي كل من شرفني بالمرور مع التحيه والتقدير

سـلام الله عليكـم دار قـومـن آمـنـو بالله=عسى الحي الكريم بجنـة الفـردوس يجزيكـم
رجالاً عاهدوه وصدقـوه وناصـرو دعـواه=علـى وحـده مـن الثنتيـن لبيتـم مناديكـم
على عزن يلوح ومجد دينه وانكسـار أعداه=أو الموت وممات العـز مطلبكـم ويرضيكـم
هنا من قبر حمزة ساقني وجدي علـى ليـلاه=هنا من قبر مصعب ناح شعري لجل يرثيكـم
قصيداً مايجي في سيرة أصحاب الرسول أبلاه=بلاه أن كـان لامنـي كتبتـه مايجـي فيكـم
اجل وشلون وانتم يوم جيش الكافريـن أغزاه=قضيتم نحبكم فـي طاعـة الرحمـن واليكـم
اجل وشلون وانتم عن حياة الزخرفة لرضـاه=تركتـم كـل ماتملـك مـن الدنيـاء أياديكم
اجل وشلون وانتـم ماتمنيتـم وجـاه .وجـاه=مصارعكم تحت حد السيوف اقصـى امانيكـم
قرينا ما انكتب لاكن على بيض الورق ننسـاه=وجهلنا مـن جهلنـا ليـن ضيعنـا مباديكـم
سقاك الله من غـر المـزون وسلسبيلـن مـاه=من الله يرسله يـادار قومـن لجـل يسقيكـم
من البارحه وانا اهوجس وطال بهاجسي مسراه=ونوخت الركايب يوم جيـت بحـد اراضيكـم
لقيت الناس واجد لاكن اشبـاه وشبـه لشبـاه=ولقيت ولا لقيت الا صويـب وبـات يبكيكـم
ولقيت ولا لقيت الا حزين يقـول واااااعـزاه=مكانً مابقالـه فـي مكانـه غيـر اساميكـم
وسـلام الله علـى سبعيـن مسلـم قاتلـو لله=رضى الرحمن عنكم والكريم الحي يرضيكم