أرسل احد الاصدقاء الاعزاء ابيات واحببت ان امازحه
وجاريته مع العلم انني لا اعلم هل الابيات التى ارسلها لي له ام لغيره
ا
تمنى ان تعجبكم الابيات مع ارق التحايا للجميع
الابيات المرسلة من الصديق العزيز
يا موتري لاضاق صدري من الناس = دقّيت سلفك لين تحمى المكـينه!!
وآدور بك كنّـي على الدار عسّاس = وآهـج فيـك أحيان بـرّى المـدينه!1
انته خـوي الدرب عن كل الاجناس = وانت الوحيد اللي بسـامر حنيـنه!!
الناس ما منـها سوا دوختْ الراس = اللـه يعـين الـخـافـق اللـه يعيـنه
مجاراة ورد مني للأبيات السابقة
يا ضايق الخاطر على ويش محتاس = دنياك ما تسوى به لحظة حزينه
ان كان ما حسيت في دارك اوناس = والبال ضايق والعرب مزعلينه
القلب به جرح(ن) مع الوقت حساس = مع الزمن بانت جروح(ن) دفينه
يصفق على قلبك من الهم هوجاس = موج(ن) تصافق في جوانب سفينة
قم وتعوذ من وساويس خناس = خل الزمن ما بين زينه وشينه
خذ الكلام وخل ما قال عباس = في ضيقتك ترا السبب خابرينه
قم وتوجه لديرة(ن) كلها احساس = الشوق في قلبك تزايد حنينه
ابعد مسافات الوطى مالها قياس = ابعد مسافة تقرب بينك وبينه
يا باني(ن) حبك على وافي الساس = لعل تسلى كل ما شفت عينه
وللهرج بقيه