ديوان الشاعر بدر الهبيري

القلب عيبه طيبته يوم اداري=وان مااعجبتهم طيبته وشيقولون
ما للملامه عند مثلي طواري=ولاني براضي بالقضيه وممنون
لاشك ابحفظ بالمجالس وقاري =يوم ان خلق الله ذهانا ويوحون
ولناقلين الهرج قلنا حذاري=دام الخطر بدري ولاناشه الدون
مير اختلف رغم الحذر كل طاري=والهرج يجرح كان ماهو بمازون
يردني سلم العرب دون ثاري=لو اجهل اللي بالظماير يكنون
حنا عرب لاهل الردى مانجاري=ولانجازي بالردى لو يجازون
ميقافنا دون الصديق انتحاري=والشيمه الشيمه لنا ساس واركون
وعن عرض خلق الله نسن الشباري=لو مالنا معهم نسب قرب مقرون
نبقى بدو لو مستوانا حضاري=ندرى العواقب مير مانقبل الهون
مانستمع بسلومنا لاستشاري=مادام وقفتنا بها العز مضمون
نخشى ملامة كل ناقم وزاري=واهل الخزى لو جابو العلم يخسون
الحر مايذعَرْه جول الحباري=والذيب يبقى ذيب لو له يصيدون
واللي يقول السالفه مايداري=تاه الهدف وامسى على الرف مركون
وان زان ليله واسعدته المساري=لابد ماياطى على الشوك مغبون
واقرب مثل عنها كلام الحداري =( من قال فيه الناس لازم يقولون )

مدري تعرف السالفه زين يمنير=والا جهلت اللي جرى ياغناتي
وبكل حال العلم يحتاج تفسير =مادام حان الوقت ملزوم ياتي
والا انت ماتحتاج مني معاذير=رفيقي اللي في طريقي مرآتي
يوم النوايا في ضميرك مغاتير =غيرك على شتمي لقيته يحاتي
ياصاحبي طالت علي المشاوير=لاشك ماني باطل(ن) في صلاتي
مير الحقيقه غير واللي جرى غير=ولاودي احذف للرفاقه حصاتي
وابو هبال اعمى براسه سعاطير=وانا على اللي قال طوْل سكاتي
علي ّ ركـّـز بالملام النواضير=ويقول بين الناس هذي سواتي
حرّف كلامي بالعرب خايب الصير =واستنكر اللي كد عرف عن صفاتي
اثر الكلام احيان يبغى معايير = واللي بلا معيار ماله طراتي
عذر البليد يغيض روس المشاهير=والعفو دايم هو سبب مشكلاتي
أخطا علي ّ ولانوى بالمعاذير= (بوقان) خان ولاحفظ لي وصاتي
جا للغزير وطبّ وسط المحاذير=شن الهجوم وخصّني بالقضاتي
ماقدّر الجيره ولاساق تبرير=واعلومه اللي قالهن سامجاتي
يبغى يقاضيني بكذب وخناثير = لفق لي التهمه بكل الجهاتي
ماقال غير الزور قدم الخطاطير=واخطى وانا ماهي بتخطي رحاتي
لو درّتها زادت عليه المخاسير=واليا نويته حالف(ن) مايباتي
عندي شطير(ن) مايهاب الشواطير= وعندي على ماقيل رمح الزناتي
مايخطي الاهداف والسر بالبير=واليا كشفت اغطاه جرّ احسراتي
واليا جذبت ارشاي جبت الحذافير=ايه الله الله ماهن بناقصاتي
والله لسوقه لين ياطا المسامير = والليل والله مايذوق المباتي
والصبح يشقى مايلاقي تباشير=حتى يشوف بعينه المعضلاتي
ويضيق دربه مايحصّـل معابير=واليا التفت علباه تشكي عصاتي
من عادتي ماني قليل التدابير=والهامل ادعس فوق خدّه احذاتي
طبعي على القشران سقم وزمهرير =واهل النمايم ماتزحزح ثباتي
وان قيل وان ماقيل دربي تسافير=راسي مثل مرسا جبال السراتي
والا مثل مايرسين ّ البوابير=لو ان موجات البحر كايداتي
ماني غشيم(ن) يصفق الجال ويحير=ويروح من صكات بقعا شتاتي
انا اليا زادت علي ْ العواثير = مااعيرهن دامي مصدّ التفاتي
ولاني خوي (ن) للبنات الغنادير=مااخاوي الا طيبين السماتي
وان ضاق بالي واكثرن ّ الدواوير=عـنـّزت للي ينطح الـموجباتي
مهو بساهجني عشير المناعير=هو سيفي اللي في انحور العداتي
مثل مااعرفه بالظروف المعاسير=تاضح علوم مدوّرين الشماتي
وقت الشدايد يثبتون المغاوير=والا على الشردان راحت فواتي
ياطير ياللي تنفش الريش بتطير=بالجو مالك روجة (ن) واشهراتي
إرقى سما ياطير لو كان بك خير=لاتكفخ الجنحان وسط الفلاتي
بالريش مانفرق بعوج المناقير=لاعوّدت للريش متساوياتي
والفرق واضح في عيون الصقاقير=طير الرخم ماصاد طير القطاتي
تاخذ عبر مما مضى يامعيثير = والا رويسك تضربه بالصفاتي
مالك سواهن واعتبرهن مقادير=وارضى بهن يوم انهن واقعاتي
وشلازمك تنفخ على جمرة الكير=واعيونك الثنتين متبلقاتي
وسط البحر لو شفت قرش وهوامير=لاهومهن ّ الحوت حتى الرفاتي
وان مااقتنعت اعطيك حجّه وتنوير=وان مارضيت ارضاك ماهو مناتي
دوك الفريده كان للشعر تآثير=وابعتبرها بالقصايد زكاتي
للقول وقت ولو يجي فيه تآخير=ماهو بعيب العيب مافات ماتي
في مثل هذي ماتموت التفاكير=من قدْح راسي للطلب والماتي
انا اليا من قلت جبت التعابير=ركزة وتد ماهي بمتخرماتي
قولي وانا بن عيد عبره وتذكير=واقوالي اليا جبتهن مثبتاتي
تبقى سداد مخلـّـفات الفواتير= واللي سقط منهن ّ بالمقبلاتي

هاض القصيد وهيْضه قول خناس = وانا مع القيفان فكري سرابي
بيني وبين ملاعب القاف مقياس = وابلغت في قافي وحرفه نصابي
واليا حكمته مايجي فيه الافلاس=لاوالذي ينشي حقوق السحابي
ميثاق والميثاق مبني على ساس=ومعاهده يبقى بعمر الشبابي
مايشيب دام اني معه قاوي الباس=واليا نخيته فزلي واعتنابي
وان وصلت لحلقي خذا دور عباس=بنحور موذيني كبار العلابي
يامشتكي مني وانا منك منحاس = ليتك تميْز وش خطاك وصوابي
خذيتني بالصوت ياطابخ الفاس=واشرب مرق فاسك ومجْ اللعابي
واليا اعتلا صوتك ترى مالك اوناس=مالك شبيه الا نبيح الكلابي
واليا انتبهت اضربها اخماس بااسداس=وانشد عسى عنها يجيك المنابي
فاانه غشى عينك على عرفها انعاس=مااحد (ن) بناشد عنك دام انت هابي
ماني غشيم ولي مع الناس مرواس=ولكل علم مزهب (ن) لي زهابي
ماهو كلام(ن) ينكتب فوق قرطاس=واللي يرده واحد(ن) منه خابي
علم (ن) وكاد ووكده تجربت ناس = لهم مع العهد القديم اكترابي
سلم العرب يوم العرب معجم الناس=مرجع لنا يوم الزمان انقلابي
ورث (ن) حموه ووارثه كل فرّاس = من عهد كعب ابن زهير الصحابي
على النقا واهل النقا در ْ والماس=وامجودين الورث صِلبْ ومرابي
يوم الزمان اللي به تضيق الانفاس = حطو لهم في ماقف(ن) مايعابي
موضع قدم مع لابس الجوخ والطاس=والسالفه ماهي خراص وتغابي
الله واكبر كل ماهب نسناس=على السيوف اللي تقص الرقابي
لنصرة نبي الله وتطهير الادناس= وقفة شرف ماهي نفاق وسبابي
ماهي حروف (ن) تنسفط بين الاقواس= ولاهي علوم اللي يجور ويحابي
والا المثل قالوه قبلي هل الباس=وشهوده اهل العرف بااول خطابي
عش الحديْه ماطلع منه قرناس = والذيخ ماخلـْف قطيع الذيابي
والناس فيها من عديمين الاجناس=وفيها من الغث الوضيع اقترابي
وانا عرفت الساس والساس محتاس=اسود سواده مثل لون الغرابي
الوجه بيْن واللعانه من الساس = خبيث يامال الفنا والذهابي
الله يقطع نسل ميراد الانجاس = ياعلهم بين الثرى والترابي
الطيب ندريبه من الراس للراس = كبْ السوالف عنك واسمع جوابي
ذولا بقايا قوم هافي وبلاس = في مامضى يمشون درب الخرابي
والا انت ماهرجك يجي فيه نوماس = ولا وقف شرواك في راس نابي
بين الدحول العمر تقضيه عساس = تعيش عمرك متـْبع للسرابي
وخاب الذي للحنضله بات غراس=لو ظل يسقيها قراح الشرابي
مايجني الا مرْها شرب بالكاس = تاضح لو انه قال مااحد ( ن) درابي
واللي يعاند كلمة الحق ينداس = لابد يطحن بين ضرس (ن) ونابي
واللي غدت له كلمة الحق نبراس = ماهو بضارب للملامه حسابي
ولاني على غلطات الاجواد حرْاس = سواة من في كل علم (ن) يبابي
لاشاف له زله تقل ضاربه ماس = واللوم فاتح له ثلاثين بابي
ماصكته بقعا ولامره الياس = ولاذاق من ميل الدهر سم دابي
واشيب عينه يوم الارياق يبْاس = والا هنا قلبه ليالي عذابي
ماللشدايد كود قطْاع الارماس=والا الرخا كل ٍ يسوق الركابي

طويت الصفحه اللي من سببها شانت اوضاعي = وانا ماني بناوي من بعد بارتبي افتحها
اسنين العمر تمضي مير قلبي تاه ماياعي = ومن تاه الطريق يدل ّ لو رغـّبـَـتــْه يجمحها
ترى نفس الفتى لو تامره سيّـه وينصاعي=تهينه والشواهد ناضره لابد يشبحها
يمر الوقت واظروف الزمان تجدد اوجاعي=واَلوم النفس واحذر كل موجه قبل لـ اسبحها
ولافاد الحذر والموج يلطم واتلف اشراعي=وبحر التيه وامواجه تعيس الحظ كافحها
لفظني موجه العارم على شاطيه واذراعي=تعب .. واظروفي اتعبت الحكي من كثر مـ اشرحها
مكثت وحزني الصارم شديد وبدّل اطباعي=وعيني كل ماتغنم فرح يطغى ويفضحها
على نفس الطريق اللي طويل بسكته باعي=وقفت الحاير اللي حيرته ماطاع يبرحها
واراجع مامضى عـلّ وعسى القى فيه مطلاعي=وابى جور الزمان وشـمّـت العدوان وافرحها
وانا اشوف العرب مصراعها لو فاق مصراعي=تزين اوضاعها والوقت مع دوراته اصلحها
وانا ماطبت وجروحي كثير ومالها داعي = ولا اقسى امن الجروح الا الهجير ان مر يلفحها
غريبه والغرابه كيف صار الجاني الناعي=ولعبة لا تعصب من لعبها اليوم رابحها
وانا الخاسر خساره مايعوّضها تمـنـّـاعي=حقيقه ثابته ماشفت سوْ الضن زحزحها
حقيقه لو يحاول بالكلام الرابح اقناعي=جوابي بالسكوت ابلغ لو اني قادر اصدحها
واذا كان الرعيّه مالها باللي مضى راعي=سراحين الخلا من عادة الجعران تنبحها
حسافه يازماني مدّي اللي جدت مع صاعي=ولامدة صخى بالطيب كود الجحد ينطحها
على قولت لي الله ماعليْ اخلاف يـ ابداعي =مدامي بارع بفكرة عناي وقادر اطرحها
معاناتي مقيضي كم سنه فيها ومرباعي = وابادل كل ورقا بالونين الحزن بدوَحها
سمرت الليله السودا على ضوْ القمر واعي=وحيد ودمعتي ماعاد فيني قدره امسحها
يجيني داعي الذكرى واَلبْي دعوة الداعي= واعيش الجرح واكتم ضيقتي لو فيني المحها
شكيت ولايعود الا صدى شكواي لـ اسماعي=عفيت وزلتي مااحد(ن) قوى في يوم يدمحها
صبرت ولاخبرت ان الشعور بكبته امتاعي=واذا ما للمشاعر محتوي ما لازم امنحها
طغى جرح الشعور وغاضني لين امكن اشباعي=واذا الرغبه عقيم الواجب انسى الجرح واكبحها
رحلت ولامعي غير الوجع والجرح وامتاعي=بعيد ورحلتي لو مااعجبتني لازم امدحها
وانا ابغاها كذا لكن بها مااحقق اطماعي=خذتني للسهاد وحرّة(ن) بالصدر مطرحها
والادهى حيرتي من حالتي لاحان مرجاعي=ونفسي طاري المرجاع للي فات يجرحها
يغيض القلب شوفي للشعور بودّي اصناعي= واضيق اليا بدى في كفة الميزان وارجحها

أمس الصباح دموع عيني مجاذيب = وادري وش اللي فوق خدي جذبها
علم (ن) كميته خوفة الشك والريب = هرجة غشيم(ن) كلمته ماحسبها
يطري على بالي وانا ازيد تاديب =للنفس لين النفس زوْد عطبها
لكن على الله يالجروح المعاطيب = مادام نفسي محتفظة(ن)باادبها
هذي ثلاث شهور بالعد تقريب = والعين معسول الكرى ماقربها
وانا برجا الله سامع دعاي ومجيب = اللي جروحي عارف(ن) وش سببها
يالله دخيلك من سموم اللواهيب =اللي تزايد بالضماير لهبها
عيني تشوف ولاعن الشوف تجنيب =والشوف خابر هو سبايب تعبها
سلمت نفسي غصب ماهو على طيب=وشحيلتي مادام هذي طببها
مجبور اغظ الطرف واسمع ولااجيب = واسكت واداري لو سكوتي نكبها
ماهو رضى والا عتب غيْ وامصيب = النفس انا كرْمتها عن عتبها
تفداك ياراسي كثار العذاريب= اللي على النيران تجـْـدع حطبها
ماينتخون الا لشذب العراقيب=قوم(ن) تقطـْـع في يديها عصبها
لامن واحدهم ولـَـتـْه المشاعيب = كب الصحيح وكل موجه ركبها
مايردعه سلم الرجال المناجيب = ولاتمنعه شيمة عرب عن عربها
ناس(ن)مفاخرها بقل ْ المناصيب = واهل المراتب مادرت عن رتبها
لاشافت الطيب صفت له مشاريب = قامت تحك جنوبها من جربها
بيدينهم صرنا سواة اللعابيب= لو كان ماهو ودها ذا طربها
حتى بعد وغدانهم عذبة النيب = اليوم صرنا وحدة(ن) من لعبها
ياحيف والله ياطوال الاشانيب = اللي عريب(ن) فالجزيره نسبها
والله لو لا خوف لايقال لي عيب = اني لااقص بكل مجلس شنبها
حدب الظهور مضيعين المواجيب = اللي على الغرْات يكثر طلبها
واخرهم اللي قدْحته بالمشاهيب = وكل العلوم اللي تنومس عقبها
اللي خذا روحي بليـْا مناديب = ولسوق بيْاع النمايم جلبها
باع برخيص ولاعن البيع تعقيب = قفى مغرْب والخلوج احتلبها
يلقى بوجهه كل هرجة ظهر غيب = لابد ياقع كان عاش بنشبها
واللي خلق موسى وذا النون وشعيب = وارسى الجبال الشامخات ونصبها
ان الجزى لو طالت المده يصيب = واللعبه امسى خاسر (ن) من لعبها
وان صار فيها بالليالي عواقيب = ( كل العقود تعود للي كربها )
دربي سماح وغيرها وش على الذيب = يفنى الحسود وحاجته ماقضبها
ان عشت ياراسي بروس المراقيب=وان مت خليت الشْجَرْة وعنبها
سحمان هز الذيل قدم الرعابيب = وسحمه تلوْح للعفون بذنبها
مااقول فيها كاسب(ن) لي تجاريب = الوقت عني خابره ماحجبها
مغنيني الله والرضى بالمكاتيب = مفتاح بيبان الفرج من ضببها
ماني بعازه لاولا لي مطاليب = ضربت عشر بعشر والله كتبها
في كل ديره لي ربوع ومعازيب=ربع(ن) ينومس بالمواقف شببها

ياطير رفّ الجناح وفارق الديـــره=لاواهنيْك ليا قفــّيت متسامي
ماهوبـ .. مثلي حبيس الهم والغيره= مابين نزف القصيد .. وجرحي الدامي
أنوح نوح الحمام ان مرْت السيره= مير البلا رميتن جتني بلارامي
في وسط قلبي على ماصابني نيره = وقودها من ضلوع الصدر واعضامي
الله واكبر على الشكات والحيره=من وين اسوق القدم تمر قدامي
لكن عساها يبو وجهين لي خيره = وانا عليها مضيت اِبّصّمة ابهامي
ولاني بجاهل حقوق القرب والجيره =لاشك هذي دواها قطع الارحامي.!!
خمّن وتلقى مع العربان تشفيره = واِعرف من اللي بدى تشفير الارقامي
لاماقضيت الحياه بدق تآشيره=محرم من السيل لو ماطفت بحرامي
عشت الحياه التعيسه شبه تصبيره=واخذت درس(ن) جزاه الصبر وايلامي
واطيب من الدرس تهليله وتكبيره=من منطلق ربطها بالدين الاسلامي
ماللشكاوي مجال ولابها عيره=دام الهدف لابخصنا غايته سامي
وبكسر خاطر ترى ماتفيد تجبيره=ماينجبر خابره حتى بالاحلامي
للطيب بيْاع لكن دون تسعيره = والناس قالوا لنا ماطاب مادامي

منجوم واللـــــــي يطردك فيك منجوم=لاعادك الله ويــــــن طردك رماني ؟؟
الـظـــــــاهر اني كنت ساري بجاثــوم=ضـــــــــيـٌعت وقتي لين قفـٌى زماني
واضعت نفسي بين حسرات وهـــموم=وارخصتها لرضاك وارخصت شاني
ولااضن يلحقني عــــقب هذي الــلوم=حـــــان الفراق اللي عليه الضماني
طوٌفت لك ثنتين مـــــــــاتقبل الــسوم=والــثـالـثـه مـــــــــــالله عليها هداني
ماني بتطويف التصاديد مـــــــــلزوم=شــــــــــــاورت قلبي مير قلبي نهاني
في حل وانساني ترى الوصل معدوم=وانــــــــــسى زمان ٍ فات يامودماني
مااتبعك لو اني من النوم مـــحروم=أطيــــــــب على قلبي من الزعفراني
إن رحت مالك كرت ياراعي الزوم=وان جــيت مالك بالمواصل مكاني
نـــهجت لي درب ٍ عن الذل مفطوم=يـــــــــوم ان قربك للمذله حداني
قربــــك خرابه قام يلعي بها البوم=من عقب كانت من خيار المباني
واصبحت ماتسوى بعيني ثمن ثوم=مـــن يوم صار يطيب عندك هواني
جيتك وانا من واقع البعد مهزوم=واقـفـــــيت عني يالخسيس الهداني
أنكرتني ماكن ماضيلنا يمـــــوم=وانـكرت عرفي والوفا والحساني
بــدلتني ياشين بهتول وارخـــوم=واغــــــروك بالسجٌـات يالمشبهاني
لقيت معهم يااسود الوجه معلوم=واصــــبحت عايف شوفتي ماتباني
ومن عافني ماني بلقياه محكوم=بـــــــــــــــلقا بداله واحد ٍ مانساني
ماعاد حبل مواصلي فيك مبروم=والله مـــــــاارجي جاحد ٍ مارجاني

وين الوفا .. هذا جفا .. ماعاد به شي ٍ يعيد=وقت ٍ مضى .. عهده قضى .. مااضن بيفيد الكلام
دامك نسيت .. اني شريت .. ودك ولاردت الجديد=واني وفيت .. صدق وصفيت .. لك انت وحدك بالتمام
لابد اقول .. قول ٍ عدول .. مايهم لو شفت المزيد=من كل ذم .. وكل هم .. مايهم لو زاد الملام
انا صريح .. هذا الصحيح .. ان ردت ولا ماتريد=انت اهتنيت .. وانا انكويت .. بالليل عيني ماتنام
عشت القهر .. طال السهر .. وش حيلتي بك يالعنيد=مات الهوى .. يوم انكوى .. قلبي ومليت الغرام
شفتك غدرت .. ولاذكرت .. إني من اسبابك وحيد=واني سهرت .. ولااشتهرت .. الابشي اسمه خصام
ماهو عشان .. جور الزمان .. انا شقيت بيوم عيد=أنت السبب .. منك اغترب .. قلبي وصابه إنهزام
اناوين اروح .. كلي جروح .. بااسبابك همومي تزيد=كلك غرور .. كلك سرور .. تضحك وانا د ربي حطام
بالله شقول .. مابه حلول .. الا بأشعاري أزيد= شح السلام .. ضاع الغرام .. قلْ حتى الإحترام
لاشك اشوف .. ان الحروف .. بها يجي معنى أكيد=مما حصل .. قلبي وصل .. لدروب مليانه ظلام
بس انت ليه .. تقسى عليه .. وتحده لضرف ٍ شديد=خلاص فات .. وقتك ومات .. حبك بقلبي ياحرام
انسى وفاي .. وانسى هواي .. الوصل اشوفه مايفيد=حتى القليل .. ذا مستحيل .. ماعادابي حتى السلام

رصيدك المليون والعشر مليون=وانا رصيدي في حياتي قصيدي
ولااملك الا كم طواريق والحون =وانضم على معناي قاف(ن) مشيدي
هي حيلتي يوم الهواجيس يطرون =وادوايْ يوم ان الدوى مايفيدي
العيد حل ّ وفي ضحى العيد محزون=نمشي بنار وغيرنا في جليدي
ولهو حسد عل ّ الحواسيد يفنون =ربك يدبْر مايراه ويريدي
أرزاق دبْرها لنا خالق الكون =مكتوبة(ن) من قبل ماني وليدي
لاشك اعبْر عن خفى قلب مكنون =تعبير عن مبدى الشيَم مايحيدي
ياصاحبي يانقوة الناس وشلون=عنك ابتعد وانت بحياتي رصيدي
حتيش لو تملك مثل مال قارون=قدرك بقلبي كل يوم(ن)يزيدي
والله لولا خوف ليقال مجنون =لااشق جيبي واعتزي ياعضيدي
لاشك هذا سلـْم والسلـْم قانون=قديم ماهو في عربنا جديدي
الله يساعدني ومنه اطلب العون=عسى نهار العيد عيدي سعيدي
والفقر ماهو عيب والناس يدرون =والمال خير وشر علم(ن)وكيدي
المعطي الله والعرب له يدينون=وحده يَهبْ رزق الدبش والعبيدي
مفتوح بابه كل ساعه ومضمون =يسمع ندى اللي يندبه يالمجيدي
ماحط دون الباب حرْاس واحصون =ولاوسيط ولاتلكس وبريدي
ملاذ للخايف وملجا لمغبون =عز الضعيف اللي اهيامه شديدي
لاكبر ت الدعوى له الكل يرجون=واللي نصى غيره يخيب ويبيدي
ولو يملك المخلوق مهما ,, يجي دون =ملك الكريم اللي بحكمه فريدي
كل الملا في حكمته غصب يمشون =اللي رضى واللي برايـــِه عنيدي
هذا الصحيح وقولوا اللي تقولون =والحق مايشناه غير البليدي

ياجارنا لاهنت والله يعافيك = واللي جمعنا فيك لله درْه
الله يسمّح يالنداوي خطاويك = والله يبارك فيك مليون مرْه
هيضتني للمدح والمدح زاهيك = وتستاهله مادام جا في مقرْه
وان جيت ابمدح فيك ماني مخليك = ابمدح آل بريد وابمدح المرْه
ربعك هل العليا ولافيه تشكيك = تاريخهم معروف مابه مغرْه
مادحهم الله مير لاحل ْ طاريك = يعم خيرك ذكرهم بالمبرْه
يابو حمد ياريف ربعك واهاليك = والاجنبي والجار طبعك تبرْه
منك الكرم بادي وانا شايفه فيك = مااحد ٍ حكالي يوم دربي يمرْه
بالعين شفت اللي تخمه بااياديك = هاك الجزيل اللي يدينك تجرْه
والطيب طيبك ورثة ٍ من دناويك = طيبك ثبوت بخير وقتك وشرْه
والضيف تفرح فيه لو هو بناخيك = راعي هلا والمرحبا والمسرْه
والاجنبي لامر دارك واراضيك = يبرد بقلبه كل لاهب وحرْه
يشهد علي الله ماانا يوم ناسيك = لك منزل ٍ بين الجدي والمجرْه
والقرم مثلك بالمنازل يساويك = مانبخس الطيب حقوق ونضرْه
والاالردي حطه مداس لمواطيك = مايستحق انــْـا عليه انتشرْه