ديوان الشاعر//فايز المحيسن المعبدي

يامرحبا ترحيب هيلن وبنّا = في حلت معبّد هل الفعل والشور
اعداد غصنن بالثماري تثنّا = وعداد نجمن فالسماء صاطع النور
تنمد لهل الطيب ثمر يتجنّا = في ملتقى شيخن من سلالة نمور
شيخن ولد شيخن قصوره تبنّا = مايختلي قصر الوفا دوم معمور
لنّه على ساسن جويدن مبنّا = فيه الكرم والجود مدهال مخبور
مايوم عن فاقات ربعه تونّا = يفز مثل الحر بالفعل مذكور
ياللي تبي اسمه ولي تسألنّا = اسمه ترى مغبش كمالنور مصطور
مغبش النتاف والعلم عنّا = ينتف رقاب القوم مايولي اظهور
وسموه بنتاف من ماظينّا = من قبل حكم العود لسيف دستور
أيام فيها الخوف ماخلفنّا = والمعتدي من سيفنا صار مدحور
للمعتدي سل السيوف المسنّا = ياكم مره شبعت سباع ونسور
من جيش جانا فالديار امتحنّا = راحو طشاشن بين ميت ومكسور
مايدري أنآ لاطعنا طعنّا = واليا عهدنا نوفي العهد مانبور
ابوك من بايع موحد وطنّا = فبرق الرغامه والمدافع على السور
ويوم بايع سليمان حنا قبلنّا = لنه حكيم الراي وفحكمته دور
لو بمدحك ياشيخنا ماوصلنّا = لو كان أغني أيام وليال وشهور
في وصفكم تعجز حروف المغنّا = من حيث ماجيلك نبي نكتب اسطور
لو قلت ماهما قلت ماتعادلنّا = حتى ولو حايز شهادات دكتور
ولو غنو الشعار أنسن وجنّا = غصبن عليهم ياقف الحرف مجبور
ديوان كامل وصفكم يملينّا= والعذر منكم كان في حرفنا أقصور
وختامها بيتين فيها أتمنّا = ترديد قول امين منكم ياجمهور
ياالله عسا كل عام فيها يتهنّا = ونعايدك ياشيخ والقلب مسرور
ويستر ملكنا ويحفظ الله وطنّا = من كل غادر راعي اللف والدور