ديوان الشاعر الكبير: عضيب بن هليل العلوي الحربي

هذه القصيد بمناسبة الاحتفال اللذي اقامه الشاعر لشيوخ القبيله وشعرائها وجمع ٍ كريم من افرادها بحفر الباطن بتاريخ 14/04/1431ه

يامرحبـا عـداد مـزنٍ ليـا هــل=مـن مدلهمـن راكداتـن مـزونـه
مزنٍ من المنشأ يعـل الوطـن عـل=حتى تساقى و ارتوى من اغشونـه
ترحيبةٍ بأهل الوفـاء تشمـل الكـل=حي الرجال و حيهـا مـن نمونـه
من خاطـرٍ لاضـاق بالـه و لامـل=أكبر فخـر يـوم النشامـا يجونـه
بحضوركم عيد الفـرح عندنـا حـل=مرتاح لو بعض النفـوس امغبونـه
يامرحـبـا ترحيـبـةٍ دلـهـا دل=بالعـزوة اللـي جارهـا ماتخونـه
قصيركم دايم عن الشمس في ضـل=غصبن على اللي سلمكـم يجهلونـه
قصيركـم ياحـرب يمشـي مدلـل=علـى كرامـه ماتمسـه مهـونـه
يوم المطوطح فـي قصيـره تمثـل=أثنى على حـرب بطرايـف لحونـه
الوايلـي قــال الحقيـقـة و لازل=يـوم ان ربعـه كثـروا ينصحونـه
رسم لكم بيضاء كمـا عالـي التـل=واكبر شهاده عبـرةٍ مـن عيونـه
قالوا بكيـت و قـال مابكوتـي ذل=ابكي على اللـي جارهـم يكرمونـه
وشلون ابا انسى فضلهم و اتجاهـل=يـوم الزمـان مكشـراتٍ اسنونـه
و دخيل يوم ان القدر صار ما ابتـل=فدى قصيره و ارخص الروح دونـه
وصِي على ورع القصيـر وتزهـل=شال الأمانـة عقدتـن فـي ردونـه
قال البلالي كـل عقـده لهـا حـل=واكمل وصات ام الجنين الحنونـه
و نويشـي اللـي لاتـوانـا ولاذل=بيته عزيـز و شامخـاتٍ اركونـه
حق الخوي جابه على الوجه الأكمل=أصبح مثـل كـل البشـر يعرفونـه
ماهي علومٍ بيـن تزويـر وهـوَل=لبس الشرف لبس الغـلام لزبونـه
و ان جاء النهار اللي به الناس تذهل=يومـن صناديـد البشـر يكرهونـه
الشاهـد الله كـل وقفاتكـم جــل=قبيلـكـم ماتنتعـالـج طـعـونـه
تفرح بكم وضحن بها ودع وكثـل=الريف لـو هـو بالخطـر تنزلونـه
ليـا تخالـف نبتهـا كنهـا الـزل=نوار عشبـه يبهـج الصـدر لونـه
تمـت عسانـي بالمثايـل مجـمـل=وصلاة ربـي عـد نجـمٍ ترونـه
على نبيٍ وضح الحـق والـدل=بيّـن طريـق الرشـد للـي يبونـه

الشاعر الكبير/عضيب هليل بن شلاح العلوي