ديوان الشاعر / علي بن زيد الحربي

آه من جرح عقب خف عاودني = حيلتي يا هل الهوى اجر بالونّه
الهوى اللي في شبابي مقيدني = والسهوم اللي لها اسنين عادنه
مار اباشرح شي له عام لاهدني= يافهد دن القلم يا فهد دنه
يافهد وان بان حزني لاتنشدني= دوك جسمي يابس كنه الشنه
يافهد حب الغنادير هددني = مار جعل الله يعوضني الجنه
والعذارى بينهن مبعد ومدني = مبعدات ومن تورّن يدننه
وعذابي من اهموم تراودني = كل يوم هموم قلبي يرودنه
من حكمني بالهوى صار يبعدني=مخلف ظني وان جاهل ظنه
مانكشف لي لين بالحب حددني= والعذارى مكرهن عندهن سنه
والغشيم اللي على الحب حاسدني= ماحسدني لو مشاكيه لاعنه
غير وال العرش ماحد مساعدني = الكريم اللي له الفضل والمنه

اكتب لنا بانصاح وامليك ياصاح = اكتب مادامك بالكتابه نصوحي
قلب العنا منلاح في راس ملواح = ملواح مع لوح الهبايب يلوحي
والسدمني باح واسبايه اجراح = يالله يالمعبود تشفي جروحي
ليا من جسمي راح ماينفع اصلاح = وشلون عالج جرح روحي بروحي
جرح الهوى ياصاح متلف وذ باح = الله يعيدك يالزمان السموحي
وقت مضى بافراح وايام ملاح =واليوم اجاوب كل نايح بنوحي
اجاوب اللي ناح لاارقد ولا ارتاح = من لاهب بين الضماير يفوحي
سهم الهوى ذباح من جرّبه طاح = يضيع بين المرشده والنبوحي
ليا بغى يرتاح باله وينساح = انصاب مخطور بسره يبوحي
في هاجسه سباح ماطاع نصّاح = ويقول هذا اللي كتب لي بلوحي
وانا مثل من طاح بيدين ذباح = افهم واقدر بس للهرج ماوحي

وفّيت لين اوفيت يالجار فرحان = يوم الوفا ماكل واحد ينوله
مواقفك ياجارنا طيب واحسان = فيها الشهامه والوفا والرجوله
وهذى اسلوم اجدودنا يابو سلطان = وحنا ورثنا الطيب على وصوله
مع الشجاعه والكرم صدق وايمان= والحق في كل المواقف نقوله
اقصد قبيلة حرب ياطير حوران = اللي لهم في كل موقف بطوله
من غير قصور بكل سكان الاوطان = وكل يابو سلطان يذكر فعوله
والعلم له مغزى وللعدل ميزان = والرجل وقت الجد نفسه ذلوله
وانته فعولك كلها جزال وسمان = اعطيت كل اللي يمينك تطوله
لاهنت ومن قلدك بالفعل لاهان = واللي مقامه في مقامك وحوله
بالاوله وقفتها وقفة انسان =انسان لكن من خيار الحموله
والثانيه وفيت واكملت باتقان = واهديتها لي يابن عمي نحوله
يفداك من يصرف من الهرج مازان = ونفسه عن الفعل الجميل معزوله
ليا قلت هذي حاجتي منظره شان = وقامت تكشف لي بوادر خلوله
احيان مايقدر ومرات تعبان = والا توارى واختفى عنك زوله
شكرا جزيلا مع تحيه وعرفان = يالطيب اللي فعله يفوق قوله
واسلم سلمت ودمت والحق برهان = ومن مال واخطا مانجامل ميوله

بسم الااله المنفرد في صفاته = اللي خلق دنيا تجدد عبرهــا
ابدا كلام عارف سابقـــاته = وأوآخره عند المقرر خبرها
ابا اشرحه في سيته واحسناته = من غير ذكر امور الله سترها
واسند على نايف واخصّه بذاته =آخذ معه واعطي بامور يخبرها
يابوطلال العلم فيه التفــاته = راجع حساباتك وعدّل صورها
يا لطيب اللي ماتزعزع ثباته = ترى العقول اليوم تسبق نظرها
العلم خلّه في محلّه وهاته = وليا حضرت المشكله لاتحضرها
ولا تأخذ الدنيا بعنف وشماته = اليا كسرها فلان ربك جبــرها
وان شفت رجال تلحف عباته = خلّه ونفسك عزّها لاتحشــرها
ومن دار لك ظهره وغير مباته= لاتناقشه مادام رجله قصرهـا
الرجل يالطيّب عيونه مراته = اشياءتجيك بضر جنّب ضررها
وترى المصلي ماتفيدك صلاته= لوحاول ان الطايله يحتكرهــا
وكم طيب بعض المواضيع فاتـه= الله يعمر الدار واللي عمــرها
الرجل تعرف سيرته من سماته = ولاتقيّم وجيه الرجال بشعـرها
كل رضي ممشاه ومواصفاته = والناس في بعض الامور تعذرها
الا الذي يهوي عليك بحصاته = ذا عقّبه يمناه لين تعسرها
والشي دايم لذته في طــرا ته= واهل العقول اليوم تاخذ حذرها
وصات من هو مخلص في وصاته= فكّربامورك والدروب اختبرها

وهذا رد نايف الجربوع الطريسي

حي الجواب اللي طلع نايفاته = ما قهقره طول الجبال ووعرها
من شاعر مارس وعصر حياته = خطط ووصط غايته واختصرها
من عند ابو خالد لفت مرسلاته = بشذى الزهور اللي شذاها غمرها
مغيب القاموس من معجزاته = وعنده لغة كشف المواهب ذخرها
كلام وافي محكمه مبهماته = وضرب على حساسها مع وترها
حلحيل حل المستحيل امنياته = لين الجزيله بالصقيله نحرها
وطلب احساباته وهن واصلاته = واقفال محروس الخزينه كسرها
وانا رصيدي فيه عندي ثباته = واخشى الخساره واتحاشى خطرها
واما الخبر جمعت باقي رفاته = وميزة بطن السالفه من ظهرها
وخليت اخو مره ضحية خواته = خايف على نفوس الكرام يغدرها
يطرد مجاهيمه على صافناته = وماجاز له من سود نوده عقرها
وترى الحديث وصحته من رواته = والذاهبه تلفى على راس اثرها
وكم عاقل حاول يثبت براته = وادان نفسه مادرى انه عثرها
وكم ميت مات وبقت ذكرياته = وكم حي ضحى بالحياه وهجرها
والرجل حي ليا حفظ واجباته = ويبكي على جثمانها من قبرها