ديوان الشاعر محمد سعد اليوبي (لافي)

،
الله يخارجني .. خلوكم معي .. وأن خليتوني ( بأعود معكم )
،

سمعت كلمة مثل دق النواقيس=كلمة غريبة جات من بنت حوَّاءْ
قالت تعالوا ياعيال المناحيس=أنتم ملامة .. قنكم بير زوراء
أنتم رجال اليوم مثل الأباليس=أما اعتدلتوا بأتخذ فيكم إجرَاءْ
قلت الله أكبر يازمان المتاعيس= تقدمت داحس على خيل غبراءْ
ياليتها لاجات خلف الكواليس=خلف الستارة والإشارات حمراءْ
وألا من العنقاء قُدْم النواميس=ماهي دميمة تختبط خبط عشواءْ
ماتدري أن النطق نطق المفاليس=منطوق دمية من مكاييج وإغراءْ
ولا أذمهن كثير منهن مقابيس=وأكبر مثل من أنجب الروح عذراء
هذي حقيقة ما عليها مقاييس=ودون الثريا .. فيه عقرب وجوزاء

ياذيب لامنك على زيد ناوي=وضاقت بك الطرقة وخفت الملامة
ماكل من هجرس وغنَّا صفاوي=ولا كل واحد يستوي لك عمامة
حذراك من خُوَّةْ كثيرالهقاوي=اللي توَهِّق خُوِّتِه من عدامة
وابعد عن اللي لانصيته سلاوي=وليا نخيته ليت منه السلامة
عندك ينعِّم لوسمع قول غاوي=ولا غبت وجَّه ياعضيدي سهامه
إن كان ثامنته عتيمة لغاوي=وإن كان لازمته لقيته هلامة
خلك مع اللي في النحية نحاوي=زبن الشكية مثل جدك سلامة
عدٍ ركودٍ لا نصتك البلاوي=جزلٍ جزيل الجازية من كلامة
الحلو جابه من عذوب المراوي=والذِّكْر باقي للسميَّة علامة
ياعزوتي ماني كثير الشكاوي=راع الذلول مجوِّده من خطامة
لكن ثمينة من شراها شقاوي=يربط عليها محزمة مع حزامة
دايم حياته مثل زيد الخلاوي=مايفترش ياذيب ريش النعامة
وإن قلت لك وقت النخية نخاوي=المال يذري من غزير الجهامة
من بيت عز لعزوته والعزاوي=بيت الذرى والصايبة والشهامة
غير المثايل جاتني في الحراوي= ممَّ بروحي يابعد كل زامة
هذا كلام الصدق والنور ضاوي=لو كان هيف ما تحجبه غمامة

قال اليتيم اللي فقد والدينه=اللي غدا قلبه من الحزن مقتول
أنا اليتيم اللي هله حارمينه=أمي تخلت والأبو صار مشغول
أنا الذي جارت عليه سنينه=أمشي ضحية بين الاقران مجهول
ماشفت من قدم لمثلي يمينه=ولا شفت لو كلمة من القول معسول
أضحك وأنا للحزن دايم رهينة=الصدر ضاق وسيف الأنذال مسلول
الله من مثلي غدا به حنينه=و في داخله قلب(ن) به الحب مشلول
يصبر على بلواه والله يعينه=الله يعين اللي عن الحب معزول

ياطير ياللي عالي الحيد غنيت=عساك ما أنت معتلي كل الاغصان
إن كان تبغى المدح باقول كفيت= وأطربتنا ياطير من طيب الألحان
وهجرست ثم أسمعت وأخذت وأعطيت=وأنت تعرف الصدق لو كان ما كان
صوت اللحن ماهو كما أنا تمنيت=لاتحسب إني لاعلى الصوت طربان
إحمد رقيبك طيعني لاتهاديت=ترى الليالي مقبلات(ن)بالاحزان
ولاخذت من طيب المعاني وقفيت=بدلنا الاحسان ياطير بإحسان
وإن كان حي(ن)بان مايبني البيت=ويبات في بيت(ن)على غير سيسان
خله يجيله يوم وأنت تجزويت=باللي صفا في الوقت ياصقر شيهان
ماني نديمك كان ليه تحديت=وأنا على ما قيل حاير وحيران
ياليت ماعميت بالصوت خصيت=دامك فهيم وعارف(ن)كل الاوزان
نمشي معك على النقاء لاستحقيت=والحق مثل النور في الكون لابان
أقول قولي وأتعذر ليا أخطيت=وردوا عليه القول لاكنت غلطان
لاهو جزاف ولا في نفسيت توريت=من يشري المعروف ماضن خسران

مايزت مابين النعايم والأهوال=وخايلت مابين الندى والغمامة
وشفت الشبه مابين رجلٍ ورجَّال=مثل الشبه بين الجمل والنعامة
الرجل زينة في ذراعة ليا مال=ماهو كما اللي زينها في اللثامة
ياربعتي مازدت عنكم بالافعال=أنتم سلايل مركسة .. كل زامة
يوم الردي ماله مع الناس منزال=منزالكم بين الكرم والشهامة
قال من قبلي تمثل بالأمثال=الرجل ربعه يارفيقي حزامة
وياربعتي والله نحية من البال=ماهي نزية من قرين العدامة
أفعالكم تبقى من الجال للجال=لاهل الحمية في الحمية علامة
ولعل راع الطيب دايم لكم فال=وقصيركم وقت السلامة سلامة
أقولها وأنا موثق من الخال=ومابين عم موثقينه عمامة
وأثني بها لاجات من ذيب شيال=والقاصر اللي ما يثمن كلامة

الزم مكانك فالتغرب مهانه=وقِيم حقْ الجار لو كان لك جار
وأحفظ لسانك فالدنيه مدانه=والعبد يبلى والزمن قيل دوَّار
وخذْ من راع الجزايل سمانه=ترى الهفية ماتسعر بمسعار
وإن صاح صايح يازبون الأمانة=حذراك من دون الملازيم تحتار
ولد الحمولة ما يعرف الخيانة=وإن جات من خاين شقاه على النار
الرجل قالوا .. مايخلي مكانه=مادام له حشمة ولزمة ومقدار
ألا ليا شاف الجفا من زمانه=واجب عليه يغير الدار بالدار
عزيز من سيفه بَرَى له سنانه= ولايجلس الا مع طويلين الاشبار
لاحتاجهم في حاجت(ن) زاد شانه= ولا يساومه نذل(ن)على راس مسمار
ومن غرته نفسه غرق في هوانه=ودارت به الدنيا على كبار وصغر
قامت تصافق به على كل خانه=وضاعت حياته بين خاين وغدار
وأمسى يردد صاحب الأسطوانة=( الله يعين اللي على الغبن صبار)

مني على منصايه أبن هديبان=أزكى تحية بادية بالسلامي
الحر الاشقر مقري الصقر شيهان=راع الثمينة من جزيل الكلامي
أعداد ما يهدل ويهدل بالافنان=طير الحمام وهل وبل الجهامي
الناصح اللي لابدا ميل الاغصان=جاب النصيحة وافية بالتمامي
ولا ساق قول المدح من دون برهان=وخلا البرية غارقة في الظلامي
يالربع ردوني ليا كنت غلطان=أنتم ذراية في الذرى ياحزامي
راع المثايل قال مافيه دخان=من دون نارمولعه في الحطامي

هجرست من ذاتي وأنا دون ذاتي=وحاولت أعرِّف من متون التعاربف
وهميت أصنف في البحور العواتي=وأحترت بين أصنافها والتصانيف
ولياي مالي في صنوف الذواتي=ولاني من اللي يقدرون التحاريف
ولاني غريبٍ من فلول الشتاتي=لجَّوا عليه المرجفه بالغطاريف
ولاني سميجة غارقٍ في سباتي=آميز بين الصادقة والتخاريف
أنا وزاني ثابت النايفاتي=لاجاتني من رأس راع المعاريف
أعرف محلي حزت النايباتي=ماني مكلف ما يعرف التكاليف
وإن طاح رمح ذياب دون الزناتي=وصارت قضية للصفوف الطواريف
أعرف جزاهم والجزاء من جزاتي=وأقصر عن اللي ما يطول التصاريف
وياهم قلبي هم من هم آتي=لاهم بالمثلوث بعض التناتيف
الغدر ما رومه ولا من صفاتي=ولاني مكسر للجموح المجاديف
لكن شقاها حزت المثمناتي=ساع الجدايل ميَّلن بالمغاديف