ديوان الشاعر محمد سعد اليوبي (لافي)

أرسلت من مدة تحية وترشيح=ترشيح شايب محتزم له بشايب
أرسلتها وأقرنتها بالمفاتيح=وسلمتها للي عن القوم نايب
ذخر القبيلة والرجال المفاليح=أبو طلال اللي ليا قال صايب
وللآن ما جاني من الحر تلميح=يِسَكِّت اللي يلمزون الطلايب
ولا ضنتي محتاج للذيب تصريح=الدار داري يازبون الغلايب
مثله عزاوي فيه نهارة أصيح=ونادى المنادي وأزفرن الترايب
وأنا رجاوي كل ماهبت الريح=وهبت علينا من شمال الهبايب

ياهيه .. ماني منتظر طلة النـور=ولاني طويلب منتظر له شهادة
أن كان ما تقدر على الدين معذور=المـال وافر والمـلا في سعادة
يالصاحب اللي لا مكلف ومجبور=ارتاح في نومك وحط الوسادة
أنا ليا سامحت في الدين ماجور=من واحد(ن)يعلم خصايص عبادة
لكن حسابي وقت الأيام ما تدور=وقت الدوايـر والبـلا والنكادة
وايضاحسابي جيت في علم مقدور=ماني خـوي للي يكسِّـر شدادة
ومن قبل لايسمع بهاضايع الشور=ويفرح علينـا لاتركنـا الريادة
وأصير مابين النواميس محصور=كل (ن) مزهب بندقه مع زنـاده
أما حميت العلـم والدار معمور=في دارربع (ن) يوردون الشهادة
وألا رميت العدل والقول مخبور=ويدفع ثمنهـا من عليه الزياده

يا شين رجلٍ لا نحى عن فريقه=وأقفى عن الديرة وخلَّى عياله
إن كان حظـه وقعـه في رفيقه=والجيب خاوي تابع الناس عاله
لا قام يطلب جف في الحلق ريقه=وقامت تصافق أيمنه مع شماله
الوجـه ذابل وابتلى القلب ضيقه=لا قرش في مخباه والظيم فـاله
وصار يتعثر مايذمـر طـريقة=أمسى قطاره ولضِّعِينه كماله
الرجل لو قالوا وسيـع البنيقة=وممدوح بين الناس مستور حاله
لاخير في مِنَّه ولو من صديقه=إن كان ما قله عن الأرض ماله