ديوان الشاعر/ عوض بن ناصر الفريدي

قصيده موجهة إلى المقدم / نايف بن محسن الفريدي

ســـلام يانايف وبالفــعل نايـــــــف=اسم على مسما تعيش الاسامي
اعرفك قبل اعرفك حاضر وشايف=عنك الرجال يوصلـــــون العلامي
مامات من عقب ســـــواتك خلايف=عقبك بالحر الشـــهير القــــطامي
ماهو غريب ليا رقيت النــــــوايف=مــــعرب جـــــد وخــوال وعمامي
يابن الرجــــــال معديت كل خايف=يوم الفعـــايل بين طـــاعن ورامي
من خصمــهم يروون حد الرهايف=عدوهـــــم ماذاق حــــلو المنامــــي
ربعي ذراي مــــــــزبنة كل خايف=أولاد راشد جمعـــهم مــايضــامي
هيهات يامـــــــا فـرقوا من ولايف=لاثار عـــج الــخيل مـــثل الكتامي
ياما رعوا عشب له الطرش هايف=وياما نحـــــو عن دارهــم كل زامي
يوم المعوشه بالــــكدر والصلايف=عاشوا بنــجد بهيبة واحــــــترامي
من هازهم يرجع كســــير وعايف=بيــــاعة الأرواح دون الـــجهامــي
ستر البنــات المــــترفات العفايف=مرودعــات اخدودهن بالوشامــي
أفعالهم ماتنحـــصي بالصـــحايف=هذا وأنا مـــــانوش حق الكرامـي
نبذه خبر عن دور هاك الطرايف=أيـــام مـــــرت وأنتـــهت كالحلامي
راحت وقلـــنا جعلـــها لــذلايف=اليوم ســــــلم وعايشــــين بسلامي
نخدم وطنا ونتســــلم وضــــايف=نحمي الوطن من كل خـــطة حرامي
وأســــلم وخذ مني علوم طرايف=ترجمـــتها بين القلـــــم والبهامــي
بسمك يابو ركان سقت العسـايف=لولاك مـاسقت الركــايب اهمــامي
لبستهن مــــن كل غالــي كلايف=واليــوم جنك بالرسن .. والخطامي
وأنته مقر لمـوميات السفـــــايف=ماينـــحرن إلـــى عزيز الـــــمقامي
ليا لفنك مابقي لــــي حســـــايف=تقدر تقـــــول أنه تحـــقق مرامي
وسلام احلا من حليب العطايف=في خـــايع عله غشــــين الوسامـــي