ديوان الشاعر/بدر بن عواد الحويفي الحربي

مرحبـا باللـي دفـع يمـي سـوال=فيه صح وفيـه ظـن وفيـه شـوق
شوق مشتاق(ن) حضر فكره وقـال=ويتسـلـى بالمثـايـل والـطـروق
وزارني بابيات جـزلات(ن) ثقـال=وضعهن تاسع له الطـرق وتضـوق
والهـدف مـا لـي بميدانـه مجـال=واحترم سلم العـرب منطـق وذوق
والرفاقـه شمسهـم عنـدي ظـلال=صح تثبيت الغصون مـن العـروق
عادتي ما عاتـب الصاحـب نكـال=لو غلـط منـي مسامـح ومعتـوق
يابن عامـر لـك قبـول ولـك دلال=ابـن عـم وقيمتـك عنـدي تفـوق
منهـج الجـدان بـاقـي مـايـزالوال=رجـل ينهـج مناهيـج العمـوق
والبـروق اللـي تكاشـف بالخيـال=المطـر مامـور والحايـه تـسـوق
والمطـر يومـر وينهـى بامتـثـال=رادة اللـي كونـه بالـجـو فــوق
وانت وضعك بين سيـن وبيـن دال=قصـة الوالـد مـع الابـن العقـوق
ياسعد خذ راي مـن وطـى وشـال=راسه ابيض بالتجارب لـه حـذوق
يعـرف المعبـار لاشـد الـرحـال=والمـلايـا مايعوضـهـن شـلـوق
يشخل الماء عن غثاريـب الحثـال=مع رجال العرف له قيـل معشـوق
احتفـظ بالسيـف مسمـوم السـلال=عنـد حاجاتـه ليـا زام الفـسـوق
عز راسك لااكتـرب حبـل الجـدال=لاحصل بالجمـع خانـق ومخنـوق
درعك اللي ترتـدي وقـت القتـال=مستواه اكبر رصيـد مـن البنـوق
ودرع غيـرك لاتعـده راس مــال=وسايـر العالـم بتقديـر ورفــوق
حد عرفي وانت عارف كـل حـال=خلنـا نرتـاح والهاجـس يــروق
والحصان اللـي مشاويـره طـوال=كيف ينشـط للطـراد بـلا علـوق
والجوايـز بالسبـق تدفـع جـزال=جايـزه للـي تـفـوق باللـحـوق
ذا جوابي وانت خـذ منـي سـوال=عن شقيق(ن) بالرضاء لاصق لصوق
ناسبـه بالمرتـضـى دم الـخـوال=والفصيلـه حللـت قبـل الـريـوق
مابهـا سيـرة حـرام ولا حــلال=ثوبهـا ابيـض لافتـوق ولابهـوق
ويش رايك لوحصـل عنهـا بـدال=علقـت كـل القـرابـه بمعـلـوق
راي ولا مابهـا نـقـص وخـمـال=كل شجـره نبتهـا صنـف العـذوق
واعتبـرهـذا خـطـاء ولاعــدال=ولاتخليهـا علـى الغيـاب طــوق
ذاحـسـب عـرفـي ولله الكـمـال=عالـم الاسـرار واشبـاح الرمـوق
والهدف قفـل علـى حـرزه قفـال=والامانـه يابـن عامـر بالعـنـوق
استلمهـا مـن بلـد شرقـي شمـال=منتهاها الجرف مـن دار الشـروق
عند شبل(ن) مـن شغاميـم العيـال=ابلج(ن) ماهو عن الواجـب نسـوق
واجبـي تقبـل جوابـي باحتـمـال=لايجي فكـرك قضيـف ولاحمـوق
الصبـر والشيـل ماعـاب الجمـال=والجضـر مافـاد هـردان الربـوق