ديوان الشاعر/ سعد المحمدي

ترسل علي الفارغه من فراغك
وانا ماعندي للفوارغ فراغي

خذ شور راعي شور ريح دماغك
ان كان ماماتت خلايا الدماغي

لاصار فاضي مايضمه شماغك
ماقول غير الله يعين الشماغي

ادري مسجل عند صالح بلاغك
والشعر عندي فيك سجل بلاغي

ماهو صميل تنقعه في دباغك
قطعا النكوث وقطع راعي دباغي

رفعت سقف السالفه من مزاغك
وانا ماحب اللي عن الدرب زاغي

جنب طريق مفوهِ ماستصاغك
واسكت بمجلس مابه انسان صاغي

سعد ليامنه هبا كل هابي
دون السوالم تاجده والمساريح

مايعطي العدوان مقرن علابي
شلفاة تسطح ثومة القلب تسطيح

والا انت شعرك ماتعدى السنابي
وبثِ مجمع فيه عجز وسلاتيح

غيره علومك مثل وصف السرابي
مانته معودها على هبت الريح

وان فك لتاريخ سيره وبابي
عندي لبعض علوم الاسلاف تصحيح

خل المزايد والغبا والتغابي
لاتقوم تلعب فيك لعب المسابيح

نفس ٍ تردك للخطا والمغابي
ارقب بها فوق الجبال الاحاليح

ان طعتها فاخت رشد وصوابي
وفي كبحها ياقرب درب المفاليح

حسب كلامك فيك ريشة غرابي
ماعاد عن ماقلت صده وتصفيح

تقول ماتاعيه ياب الشبابي
فتش مصرك يتضح تون توضيح

جمعتها تجميع هندي مرابي
ونسيت ماقفلتها بالمفاتيح

خلطت زاد بزاد وصبح زهابي
وبعض الزهاب يجرح الحلق تجريح

عسى المطر يسقيك ياقبر نواف
يسقيك من غر المقانيف ساقي

حارس ثغور الدار من كل الاطراف
ماهو من اهل الميسره والمتاقي

حرٍ كفخ وشرف على راس مشراف
ياليت ماقصاف الاعمار واقي

رحل عسى الجنه له افراش والحاف
بعده سمعت علوم خبلٍ يقاقي

سولف قليل العرف بعلوم الاسلاف
شايب كذوب وبالمجالس يخاقي

لاسيف يغزابه ولا فك مضياف
البيت لايذ ماتمره طراقي

دايم مع الطيب على غيض وخلاف
ياناس مدري بالردا ويش لاقي

ياليت لنصاف الرجاجيل سياف
حتى مايبقى لدنافيس باقي

انا صريح بكل حاجه وشفاف
وكره مقابيس الفتن والنفاقي

ماحب لاما كل حاسد ومزهاف
افرق مابعده صلاح وتلاقي

طلوع سهيل مثر ياهل الديره على العرجون
تبيه اهل المواشي واهل العجوى يسبونه

لو انيه في شمال الدار مايثر على الزيتون
يشوف الجدي ويشوفه وكلن حسب قانونه

وانا عندي سوال لصاحي الديره مع المجنون
سوال الشاعر اللي بندقه والعين ماتخونه

عن اللي مايبي من غير شونه للمطيه شون
يعرف العلم لكن ينثني بالدرب من دونه

نصيحه والنصيحه صادق النيه لها عربون
تصحي جاهلن دنياه تلعب في دركسونه

ترى يمنى بلا يسرى ماتسوى بالشدايد لون
على قول المثل وراس عزه قوة متونه

ياخراف النخل بشر وعلمني عن المضمون
عسى تمره بعد جديت قنوه ملي كرتونه

ياحضك يالشمالي في سعة صدرك بهذا الكون
عطاك الله صدرن مايبيح الوقت مكنونه

وانا صدري من الضيقه
وصكات الزمن مشحون
تقل وسطه مفاعل يالشمالي وسط ديمونه

يابو فرح يوم الضريغط دعاني
جيته بعصما فارقه عن سواها

تليق في حضرة عريب المجاني
الصبح يسمع بالمجالس صداها

والله لو ماطيب راسه شعاني
وحرك هواجيس القصيد وشعاها

ماجبت من خلف الضلوع الحواني
فارع تنال اعجاب منصف قراها

سلام مثل الهيل والزعفراني
في دلةٍ نقع الشهاليل ماها

منوة معومس من غثا الوقت واني
بعد الديار بخف رجله وطاها

مدح الكريم الوافي المرحباني
النفس يالحضار غاية مناها

عبدالله العوده مكانه وشاني
الطيبه من طيب راسه خذاها

مجالسه تجذبك بين المباني
لضيف والجيران شيد بناها

مدهال للوافين قاصي وداني
وان مر هتاش الصحاري نصاها

سلايل اللي بالرصاص العماني
تكسر صليب عظام شيخٍ غزاها

عنوز لاركبو بنات الحصاني
سقم الحريب وسعدحين رجاها

واهل وفى وكبار قدر وصياني
منهم مصوت بالعشاء في دجاها

ميت وذكره حي عبر بالزماني
مرحوم يامن فيه ربعه تباها

جمع العنوز اهل النمش والعناني
عزوه يذري بالمخاوف ذراها

وقصيدهم يسمو بجزل المعاني
ثلاث شيخات القصايد حواها

ليه بهم جار وصديق وعواني
وخوه على طيب الفعول ونقاها

قلت الصحيح اللي حكابه لساني
شاعر وكلمة حق مبغى جزاها

النفس ماهي ضاريه لطماني
اعزها وردها عن خطاها

رجال عن درب الردى والهواني
ابعد من نجوم السماء عن ثراها

الميت اللي عليه ترسل ابياته
تبي عليها بعد موته تضيرها

الله عليم بسيائته وحسناته
خل الجنايز تريح في مقابرها

لاتظلم الناس دام الناس مواته
ماكل سيه عظيم الشان يغفرها

ولو صار بيني وبينه وقت جولاته
سمعت صمخ البيوت بصوت شاعرها

الله يبيحه ويغفر كل سيائته
ان ماجمعها بحكمه مايبعثرها

والا انت ياللي متخفاني حركاته
ان طعتني ياكثير الهرج قصرها

جنب مفوه متاقف ربع وقفاته
خذ العلوم الصحيحه من مصادرها

قناعتي لو مزجت النيل بفراته
نجاسة اهل النجاسه مايطهرها

يقطعك يارخوم كذابه وقتاته
يامضيق صدورها موسع حناجرها

يزعلهم الطيب والطيب وهوماته
مني تقرب وانا ماني معبرها

انا رجل لاسكت يعجبك بسكاته
واليا هرج مايفتش في صرايرها

والخصم ماجيه غره وقت غفلاته
حتى مزاياه لاخصمت منكرها

الشعر خله لشعاره وسداته
ورجع على التجره اللي كنت تاجرها