ديوان الشاعر \ نافع الحربي

هذه مجاراة لقصيدة الشاعر المؤلف حمود ابن ثمر القصيري الذي مدح بها عايلة العسيلي

هلا هلا مابان مزن مقانيف

مزن يشع البرق بأعلى قنفها

بالشاعر الوافي كثير المعاريف

فضايله كلن سمعها وعرفها

حمود راع الطايلة والمواقيف

ابن ثمر زين المعاني قطفها

يمدح ربوعٍ كاملين التواصيف

حمولةٍ يتبع خلفها سلفها

عيال العسيلي فيهم النذل ماشيف

فصيلةٍ كل السعد في طرفها

اللي يبا الجزلة بروس المشاريف

يتعب عليها ولا يحسب كلفها

قولك يابو رياض مافيه تزييف

جواهرٍ يصوغها من صرفها

دون القبيلة كنك الدرع والسيف

تذود عنها اللي حداها هرفها

تم الكلام وزبدة الهرج تشريف

وناسٍ هواها الطيب عالي شرفها

نافع مطر المرواني

هلا هلا بالعيد هلا هلابه

عساه علينا كل عامٍ يعودي

حييت ياعيد النبي والصحابة

ياللي بك السنة تطيل السجودي

فيك الوناسة واجتماع القرابة

والخير بأرضك كل يومٍ يزودي

عزالله انك من رجال الحبابة

يامذكر الأحفاد سلم الجدودي

كلن بقدومك كاتبله كتابة

قصيدةٍ تأخذ من الجود جودي

أبيات نعزفها بقوس الربابة

وبيات من المسحوب بوتار عودي

نافع مطر

نقا الجمل جعلك مراويح الامزان
غرن من المنشا على طلعت سهيل

ونقا النصور ومرتع الخور والضان
عسى عليها كل ليله هماليل

ليه بها ذكرى قديمه وعربان
يوم السنين الاوله والمحاويل

ننزل ونرحل للحيا وين ماكان
لشيل زمل وللعساسه دواليل

ياما سرحت الصبح ورجع مسيان
عايش حياتي بين ذيك المداهيل

واليوم من بعد الفضا بين جدران
مثل السجين اللي جرت له غرابيل

يوم اتذكر مامضى ياهل الشان
افز من نومي اليا عسعس الليل

عجاب صالح الحنتمي