ديوان الشاعر عجاب صالح الحنتمي المزيني

سلام يالشافي ذرى كل منظام
ياهل الكرم والطيب واهل الاشده

كرام والدعوة على صدري وسام
زادة مودة درع جنبي موده

والله لو ماحس خله بالاقدام
وحيلي مرض جسمي مع الوقت هده

مايردني عنكم مسافه ونمام
لو دونكم درب الخطر مجرهده

البعد بعد القلب ماهو بالاجسام
والطيب منهل له مجم ٍ وعده

لابد ماتزين اليالي والايام
وتزول باذن اليلاهنا كل شده

وانتو على قلبي قريبين وحشام
دايم ورفقتكم معي مستجده

عجاب صالح الحنتمي

يامل قلب ٍ كل مايقبل الليل
قامت تجيه من الهواجيس زافات

يردن عليه هموم وقته زعاجيل
ويطوقنه بين ضيقه وحسرات

اليا عدلت حمولها قامت تميل
فوضت فيه الله رب البريات

ياقوم قيل وقال مانتو رجاجيل
لو تلبسون شياب بيض وجديدات

ياراعي النمه وراع المهازيل
يكفيك مني يالردي سبع رجمات

بين العيون اللي سوات ادرابيل
ياعلهن باقي حياتك كفيفات

وتعيش عمرك بين هم وبهاذيل
وغلب الرجال ودين واجد ونكبات

عجاب صالح الحنتمي

عسى السحاب اللي مراديف وثقال
يقبل من القبله حقوق ٍ خياله

ياخذ ثلاث شهور بالوبل همال
على مدرج لين يشبع حلاله

يسقى ديار مسرحه كل مشوال
عيال ضاهر بعد شوح ورجاله

اهل البيوت اللي بها فال وعقال
قبل يسود الدار حكم العداله

لطيب عشاقه وللخصم سلال
يوردون اللي قصيره حباله

ارجال مافيهم منافق ودجال
ويحاربون اهل الردى والحثاله

يستاهلون المدح ماضين الافعال
اهل الكرم والطيب واهل الشكاله

ربعي وانا معهم على كل الاحوال
من لامني فيهم عسى الشر فاله

عجاب صالح الحنتمي

سريت في وقت التهجد بالاسحار
قدام مايضهر لصبحي شعاعي

من الرياض لدار وافين الاشبار
عيال حنتم طيبين المساعي

العيد مع ربعي بعيدين الانظار
هواي والدنيا عبور ومتاعي

ابغى اتونس قبل قصاف الاعمار
لابد مادنياي تطوي شراعي

يالله يامغيث الصحاري بالامطار
يارازق الداب العمى والسباعي

عفوك ياعلام الخفايا والاسرار
في يوم عنا الشمس طول الذراعي

دنياك ياغافل تقل حد منشار
اذخر لما بعد الموادع متاعي

عجاب صالح الحنتمي

الله يامحمد من الشر ياقاك
ويكفيك شر ايامنا واليالي

دايم ويضحك في قبالي محياك
معي على طول السنه بتصالي

ياقل مثلك يامحمد وشرواك
في وقت لا مكسب والا راس مالي

قال الشريف ان كان وقتك توطاك
قبل البعيد ايصد عنك الموالي

وعسى خلف تسلم يمينه ويمناك
انشهد انه من كرام الرجالي

لاقبلت رحب لو على حوض الادراك
ويفرح اليا صكو عليه الرجالي

جعله مايشكي من عنا الوقت وعفاك
وماقل يكفي ياكريم السبالي

عجاب صالح الحنتمي

لاضقت سجيت القدم لبو راكان
ماعده الا واحدن من خواني

انسا الهموم ماجرالي احزان
ياقل مثله بين قاصي وداني

يفداه من قلبه من الحسد مليان
بالوجه زين وبالقفى عقرباني

مايجازي الاحسان مثله بالاحسان
لطيب واهل الطيبه مايداني

لاشاف له مجلس نشاما وضيفان
حث القدم يمه للبيض الصياني

واليا شبع من خير ذربين الايمان
غسل يده وقفى عساه الجناني

صحيح من قال الردى ياهل الشان
يرجع على راعيه لو يوم زاني

قلت الصحيح اللي معي فيه براهان
ماني وانا عجاب راعي هواني

عجاب صالح الحنتمي

وجدي وجود اللي من اول حياته
تقول حاكم دولةٍ مستقله

الوقت حقق رغبته ومنياته
المال واجد والسكن وسط فله
امسى غني متبجحٍ في غناته
وصبح فقير ودمع عينه يهله

حاول يجمع بعد صدمه شتاته
مقهورماصابه يالاجواد شله

نادا العيال وقام ينخى بناته
وقالو مناسب بالرعايه محله

شالوه رديان العمل في عباته
وحطوه في منزل هوان ومذله

قام يتوجد هيبته وحركاته
يمشي سلم مايشتكي كل عله

وانا وجودي وقت زلت طراته
وانا شباب وماب الاقدام خله

مافيه وادي مارعينا نباته
كلن حسب مشهاة ضينه وبله

هذا منا قلبي وهاذي هواته
ورجواي باللي كل عقدٍ يحله

عجاب صالح الحنتمي

ماشب نار وماقلط عنده الضيف
وان شاف عند الناس ضيفه نصاها

وتصدر المجلس وجابو له الكيف
وجميع تمره بالمقادع كلاها

وضايق ضيوف اهل الكرم والمعاريف
بسوالفٍ ربي مقلل حلاها

كنه يسوي للمفاطيح تجريف
ساعه وكرشه بالحم ماملاها

ويشوف مامثله من السيف لسيف
ونقال هرج وكلمته ماحماها

وده يفرق طيبين ومواليف
ونفسه على الطفسات يتبع هواها

خبلٍ علومه بالمجالس مراديف
ان ماهدمها بالزمن مابناها

ورسايله دايم شتايم وتوليف
يرسل رسايل يلعنه من قراها

عجاب صالح الحنتمي