الشاعر الصقار بدر الحويفي الحربي رحمه الله

قصيدة وشيلة الصقار لشاعر بدر الحويفي







حكمه بيد غيري ولا ابرمت منطوق=هزيت راسي والضمير امحروقي
من يوم جهال الولع جا لهم سوق=اللي يحسبون البواشك شروقي
الطير له ناس تعرفه ومرموق=اللي ولعهم بالصقارة عموقي
يسوقهم حب الولع للولع سوق=خص ليا قامت تلوح البروقي
كان اجنبوا لمسوا مداليج ساحوق=وشمال من غرب الصحن للحدوقي
بارض مراتعها تفهق بها النوق=كبار الظهور مقوسات العنوقي
لاهل الولع فيها مساهيج واطروق=وقت الخضار وللبذيرة بهوقي
العام لي معهم علاقة ومعلوق=واليوم اوادعهم وقلبي يتوقي
ينحاه مع درب الولع حب واخفوق=وعلى الصقارة والنشامى شفوقي
قلبي على شوف القرانيس مفتوق=اللي طلبهن يعطبنه لحوقي
اللي بهن ريشة مريعي وغرنوق=ومن القطا فيهن نوايق رنوقي
مسرولات اكعوبهن حجل واسبوق=حرش الكفوف مدلجات الشدوقي
واصدورهن جثلات والمتن مفهوق=واقحوفهن مثل الكهوف الطبوقي
والريش طلق ادقاق والبوز مذلوق=والروس بيض وبالمواسي دقوقي
عقد محازمهن لهن سلف اشنوق=فج المناخر ضافيات الشنوقي
منهن زعيم الجول ماهو بمعتوق=من ضربهن كنه برمح مخشوقي
دفق الحمر منهن على القاع مدفوق=مثل الخناجر مزرهن للعروقي
انسى سوالفهن ولا جيت ابروق=يشر عليهن يالنشامى خفوقي
لاكن حصل لي من ظروف الدهر عوق=وانا عليهن يذرف الدمع موقي
حل الولع يوم الولع قطف زملوق=واليوم راع الطير صدره يضوقي
يصبح ويمسي ضايق الصدر مخنوق=تضيق من قل الهداد الخلوقي