ديوان الشاعر غازي بن مغيران الزغيبي

ما يستوي المعذار عن حفل ثلاب = وليا دعا داعيه من رحب جيته
واكنسل ضروف المشاغل والاتعاب = واللي على بالي جميعه نسبته
ثلاب وخوانه لهم عندي احساب = ولكل منهم منزله ما غويته
اعيال من شرف وجوده للآداب = واضاف في سبكه وفي حبك بيته
وفي رفعة المعنى وفي قضعة الناب = وان ساق ركبه ما يقرب مبيته
جواهره دايم على افواه الالباب = مار ان سمعته سمع والا قريته
معناه ماهو طارف ن سره يجاب = يقصر عن ابعاده خطاة الصنيته
قبل التواصل بتويتر وواتساب = يا كثر من شعره سواة العميته
البيت مقعي لا مقادم ولا اطناب = تلعب ذعاذيع الهواء في اسديته
متوزعن طوله على خمسة اقطاب = وفلجانه اطرف هميد وهتيته
من خط له حرفين جابوا له أحزاب = ناسن ترى شعر النبط مبتليته
مرحوم ياللي غاب لاكان ما غاب = ماغاب مقداره ولاغاب صيته
محبوب مع ربعه ومع كل الاجناب = مثل اسلاح ينومسك لاقنيته
راعيه وقت الجد يدرى وينهاب = امذهب عقبه وحده اجليته
ومجرب فعله على فتل الاشناب = وليا بغيت اقول كيته وكيته
شعره بليغ ولا داخل فيه الاسهاب = ما فيه قاف اتقول ليته وليته
على القبيله ما فتح للقشر باب = وان قلت قولي بدلايل حميته
ما اقولها مراءي ولا لاحد مغتاب = والا شكوكي يحسب اني عنيته
تم الكلام اللي حسبنا له احساب = معناه من غال الجواهر نقيته
من شاعر يدرى القوافي والأسباب = لابس احرمي ما وصلت البهيته
وصلاة ربي عد ما ذعذع الهاب = على نبي الخلق حيه وميته