ديوان الشاعر غالب الظاهري

غبرت عجاجته قبل عن عيني يغيب = واتعبتنا يوم ثّور علينا غبارها
مابغينا نشكي اعراضها عند الطبيب= مابغينا تنتشر بالحياه اخبارها
كل عله مالها الا المياسم واللهيب= كل عله كويها .. كويها من نارها
والجروح تطيب واحيان صعبه ماتطيب= خصاً اللي قالت القلب هذا دارها
بشروها في كيان ٍ كأنه للصعيب = يوم حطت ثقلها فيه صار ستارها
لو يشيبن الليالي جروحه ماتشيب =أن كتمت اسرارها وأن فضحت اسرارها
والصحيب اللي لقاله بدل حيه صحيب=والله أن اقفايته مايعالج عارها
لو يجيب من ادهى الاعذار والله لو يجيب=عند فقد الطيبه ماتفيد اعذارها
خل عيب اللي يقولون جابت شق جيب = كلمة ٍ في هالزمن ضيعوا مقدارها
لو لعيب الناس ينزل ملك ويقول عيب= كان تلقى صغارها تحت ظل كبارها
أضعف الأيمان ما اشوف عيبك يالحبيب=عقب صحبة وقت مدري وش اللي دارها
ذا سؤالي لك ولكن دخيلك لا تجيب=اكتشفت العيب في حالتي واطوارها
كنت اظنك كل ماقلت لك وينك قريب=لو تمرك ضيقة الصدر تاخذ ثارها
وكنت اقول اللي يحطك سند له مايخيب= يوم اشوفك صوبها مانحرفت ايسارها
ذيب والله بس ماكل ذيب يعد ذيب = الذيابه تختلف بالحياه ادوارها
فيه منها اللي يخاوي عقب عشره وطيب= وفيه منها اللي تجر العوا لصغارها
والعوا ماهو علىشان ماتاجد حليب =ودها تاكل لحم من رعية جارها
والرعيه دونها الراعي اللي مايغيب = بندقه يعرف هدفها وضبط عيارها
ماتهزه لا الذيابه ولا صوت القنيب=الذيابه لاعوت ينتهي مشوارها
وأنت ياللي تسمع السالفه خلك لبيب=افهم القصه قبل يجرفك تيارها
القضيه كلها دون شك ودون ريب= ماحصلت ليه والاسباب يوم اختارها
اشتكى لي واحدن خافقه منها صويب=رجل عانا من سببها وذاق امرارها
قال تكفى هالمعاناه والجرح العطيب=خل نبض القلب عندك يحس بنارها
وانت شاعر تقدر اترجم الحزن الرهيب=في قصيده راحت المشتكين اظهارها
قلت ليت الناس ياخوي ماتخطي تصيب=كان تلقى كل الاخطا بعيد ديارها
التهاون دايم يهوّن الشي الغريب =لين يسهل في عقول البشر وانظارها
من يقف في وجه سيلٍٍ محدر مع شعيب= غير من يبني سدودٍٍٍ طويل جدارها
والبناء ماهو سوالف حبيبٍ مع حبيب=البناء يبغى رجالٍ تشد اعمارها
بعدها نضمن لك ان الفضايل ماتغيب= الغياب لكل خصله يغيب انصارها