ديوان الشاعر غالب الظاهري

قمت افتش بين اوراقي
ووجدت هذه القصيده
التي تمت مجاراتها من قبل
الشاعر المبدع / نادر العماني

اشتدت الريح .. يا نادر .. وطار الرماد =حتى درينا هذاك الجمر وش يحتوي
اللي مع أول هبوب معرضٍ للنفاد= لو قالوا أنه حفيد النار ما ينقوي
ما قلت لابد ما يصبح عليهم هجاد= وجيههم تلتوي وقلوبهم تنكوي
تكرم ويكرم عن اللي قلت بعض العباد= وألا بعضهم يدورها ووجهه قوي
يستأهل اللي على وجهه يحط السواد= يستأهل اللي يعرّض جبهته للكوي
واجب اسوي على هذا ومثله مزاد =حتى انقذ اللي لقيته معي نعم الخوي
ألي متى ما نوصلها لراس الزناد= آلي متى والحيا يسكن بوجه ابدوي
ابشعل النار لو تحرق جميع الجراد= وابرفع الصوت لو صوتي يجيله دوي
أهم شي ارضي اللي ما التزم بالحياد= هم الذيابه يخلي كل ذيب يعوي
واللي يغمّض عيونه عن ربيع البلاد= بكره تحت شمسها لا بد ما ينشوي
والزرع طيبه يبين عند وقت الحصاد= وأنا اعرف الزرع من لونه قبل يستوي
ما عادها السالفه غلطه وكبوة جواد= بكره بعينك تشوف اكبر نجوم تهوي
أحدن رقاده سهر .. وأحدن رقاده رقاد = من يجمع أطراف ليله للصباح السوي
إن صاد به شارده يمكن يبيح السهاد = تزهى بها المفرده لو زينها معنوي
سر التمكن بعقل العقل قبل الفؤاد = بيت ٍ شرود ٍ يخل المهتوي يهتوي
ماهي حروف ٍ تزيد البعد عنك ابتعاد = أصحابها الاصل واللي ماوصل ثانوي
ابيات منسوجة ٍ ( من ثوب بانت سعاد) = وأفكار محصورة ٍ في فكرها الانثوي
يا غالب الطبع غالب والنصيب اجتهاد = والعزم لا بد ما يطوي المسافه طوي
اشتدت الريح ياغالب وطار الجراد = واللي ما يفهم يعذلونه ولا يرعوي
كل ٍ يقول أنه الفارس وراع الشداد = سيف ٍ مزيف وخيل ٍ مثل عرق ( ... )
ياهي فتوحات لا خالد ولا ابن زياد = الصوره البكر والنشر ومديح الذوي
واللي ملا مسمع الدنيا ضجيج ومداد = في زاويه مظلمه بالذاكره منزوي