ديوان الشاعر \ نافع الحربي

عند ما سمعت إن خالد نجا من القتل والمبلغ المطلوب تم لله الحمد والشكر أولا وأخرا
هاضت القريحة في هذه الأبيات :
لقد وقفت قبيلة حرب موقف بطولي يسجله التاريخ في حروفٍ من ذهب في عتق رقبة خالد
مقابل ثلاثون مليون , ومنهم رجال تميزوا وصاروا ابطال هذا الموقف ومن ضمنهم
صلاح الزبالي الذي قام في تسديد أخر المبلغ جزاه الله خير وعوضه عن ماله الجنة ,
لقد هاضت المشاعر وحضر الشعر ليتوّج هذا الموقف البطولي في هذه القصيدة :

كتبت في بيض الصحايف دموعي = بشعرٍ حضر لعتاق خالد تولم
يوم اعلنوا تمت فلوس الطموعي = وخالد نجا وصبح به الشمل ملتم
قام القلم بحروف حبره يزوعي = من مفرداتٍ بالمشاعر تداحم
ياقاف سجل كل حرفٍ بطوعي = شعرٍ بجزلات المعاني تفلهم
المبلغ اللي كان كثره يروعي = في قدرة الله ثم رجال الوفاء تم
نعم القبيلة طيبين الجموعي = حرب الحرايب فارجت كربة الهم
لبن الزبالي نوري ياشموعي = بالفزعة اللي في قرى المجد ترقم
قولٍ بلا فعلٍ قليل السنوعي = وقولٍ على فعلٍ به الحق يختم
ياحرب يارجال الوفاء ياربوعي = كل القبايل في وفاكم تكلم
المعجزة يشهدبها كل نوعي = ينطق بها الابكم ويسمع بها الصم
انتم كما غيثٍ كريم الرجوعي = ينثر على البيداء قراحٍ من اليم
من غب سيله للبشاير طلوعي = نبته على صدور الفيافي امعمّم
يرفع لكم في عاليات الفروعي = الموقف اللي طول الايام ماايذم
يوم ان خالد بين حق وقطوعي = ومصقلٍ جرحه اليا بان مالتم
خصمه عنيد ودون حقه جزوعي = حقه امصيب ويطلب الدم بالدم
استسلم الحربي لهمٍ يلوعي = منه الضماير في حشاها تصرّم
قصة حزن منها تذوب الضلوعي = تذوب منها مهجت الخال والعم
ابوه حدر الجاثمات الركوعي = ومّه حشاها من افراقه تحطّم
قاموا قبيلة حرب حبس الدروعي = مقام عزٍ غطرفت عقبه الأم
وقفت شرف لها تصن السموعي = اتعلم اللي للوفاء ماتعلّم
ياخالد بوع الأرض بالعيد بوعي = عيد بمان الواحد الحي الأرحم
كنك بروس النايفات المنوعي = امشمرخاتٍ عن طمان الوطى شم