ديوان الشاعر بدر الهبيري

يامل قلبن كل ماملت فيه افتر =واليا جبرته راغ واهتزت اركانه
كم لي وانا اجيبه واوديه لين احتر=حتى خشيت النار تعلق بشريانه
الناس بردانه وانا موجسن لي حر=وشلون اقاسي حر والناس بردانه
يامن على ضوّه عقب ماترمّد كر=دوك الخفوق وشيل من جال نيرانه
مثلي شلون يطيب وقته وفيه يسر=لا الوقت ذا وقته ولا الماد ميدانه
ودي بعيد آسج واهجلي مع بر=لكنها ضاقت على العين خليانه
يتعب وسيع البال كانه بدربه مر=مامرني في سالف الوقت وازمانه
لولا ضلوعي كان قلبن حملته فر=فرير حرن شلّع اليوم جنحانه
على شفا حفره توقفت وادرى الشر=لين استقرت حالتي بين نيبانه
عفت الوجيه البارده والزمان المر=ولاعاد اميز من عدوّه وخلانه
يلومني خبلن على مقعده ماقر=يدبك ورى خيبته والسود عنوانه
مايدري ان الوقت قبله لمثله غر =ولا اطلعنه من سواياه ذرعانه
طاح المطيح وشان وقته وشاف الضر=وكلن بوجهه صك بالحال بيبانه
من عقب كان ينافس القدر سعر الدر=ماعاد يسوى عندهم قدر حذيانه
ترى ماذبحني غير وقتن مداره فر=عز الرخوم وذل حره وعقبانه

انا ابغضت بعض الناس توّي وبعض الناس = اثاريه من عامين زلّـنّ مبغضني
أنا ماسمعته مير من طبعي الحساس = روحي بوسط الجوف عنها تخاطبني
لكن وانا بدرالهبيري عريب الساس = لحط الجفا بيني ومابين مغضبني
وامشي على فالي وانادمك يالهوجاس=على وحدتي قلب العنا قام يجذبني
عن ناس قامت بلسنتها تقول امواس = تجرح ضميري كل ساعه وتشذبني
الا يافهد يامسندي ياقوي الباس =طالت علي وقام وقتي يحاربني
هات القلم ياصاحبي واجذب الكرّاس=واليا بخلت بكلمتك لاتحاسبني
انا عطيتك شور من ضامري بقياس = وبشورك اللي عام الاول مغيّبني
انا احتريتك لين خيّم علي الياس =واليا عجز شرواك يامين يطربني
درت النضر بالناس من كل نوع اجناس=ولاقيت اللي مع الناس يشبهني

الله واكبر يازمان ٍ علينا = ماكمل الناقص الا جاوز التااام
لاقلت هانت يازمان ونسينا =رجعتنا للعام وامعافر العام
لكننا بالسابقين اقتدينا = والله يعوضنا بمقبلة الايام
مافيه دمعه في نواضر حدينا = الا عزفناها ترانيم وانغام
رغم الشقا وامعانده ماشكينا = نضحك ونخفي عبرة العين بلثام
نخفي مواجعنا وعنها لهينا = ماكنها فينا تلاويع وآلام
واليا انتهينا يازمان ابتدينا = ماجفت الدمعه من عيون الايتام
ولمين لامنا بغينا حكينا = يامن على درب الشقا درع وحزام
في ساعة ٍ من عمرنا مااهتنينا = دنيا مصارعها عطيبات واجسام
في مدرستها كاتبين وقرينا = وامجوّدين احروفها اظهار وادغام
ولامشت فينا على مابغينا = على مشاعرنا قضت حكم الاعدام
نعطي ومن لذاتها ماخذينا = على مواردها مقلّين واحيام
ياليتنا في قاعها ماوطينا = ولامشينا دربها غبن وايلام
دنيا شربنا مرها وارتوينا = والحظ فيها راقد ٍ مابعد قام
نسهر ولاعن فاجعتنا غفينا = عن الكرى مازالت العين بصيام
يالايمين بلومكم مادرينا = عن لومكم من دون لانقصد نيام
على طريق المنتحين انتحينا = لو انها ماتقدر المشي الاقدام
وبحل معضلة الليالي سعينا = ولانفعنا العزم فيها والاقدام
ياعونة الله وشبقى مالقينا = مع كل درب يلازمه عض الابهام
في حاجة ٍ نحتاجها واستحينا = نحتال فيها كل ماطيفها حام
على فرجها كل ساع احترينا = والحكمه ان الشر والخير مادام

ياعنك ماتنفعك ربع الولايف = خلان حسنا كبها لاتخاويك
امخاوية بالذات حمر الشفايف = يغنيك عنهم واحدن من بنيخيك
ضلعن على صكات الايام نايف =وان دار وقتك بالقسا مايخليك
ماهو رفيقك يوم وشهور عايف =يذكرك لحتاجك ولستد ناسيك
يطويك طول العام طي الصحايف = وان حدته دنياه مرّك ويدعيك
خوّة مصالح كلبوها حسايف =عن لفحة القارص حشا ماتدفيك

ياموتري لاوَقفت المسحيّه=خوذ الزفلت وعقـّـب الفوّاره
واترك عليّ البنص والوزنيه = والهيجنه والقافيه والطاره
على طريقن مابه الحفريه =ولاصدوع ولاعمود اناره
وان خفت سواقن على دوريه=عليّ لا اسوقه على العبّـاره
والربع باكر يدفعون الديّه=ربعن على عظم الكسير جباره
مير احتملني حزّت الظهريه=اليا صليتك لابس النظاره
حطيت ابان يمين والماريه=خط المدينه متعب السبّاره
عقب التوانك كلها ممليه=والزيت قبله تارس المطـّاره
ماشي ولالي بالنكيفه نيّه=ولامعي عبري ولا زوّاره
معي عليم الوضح والمخفيّه=لا بوعصام ولازعيم الحاره
في ذمتي واقولها جهريه=ما ابقيت للمنقود دوس الباره
مير العرب في روسها جنيّه=تسرحبها تاره وتضوي تاره
ولامعي عمّا جرى خلفيّه=على نقاي وصفوتي ياجاره
لكن صليب الراس والنديّه=اقودلي غاره واناطح غااره
ولا استعير الدس والرمزيّه=على النقا واصدق واجل عباره
ماني وكالة عاجل اخباريّه=على مهبّات الهوى فرّاره
بالتغطيات الكوم والحصريّه=سواة ابوقلبين وجه الفاره
اللي يجيب السالفه عكسيّه=ويشجعونه ربعه الهذاره
بالوجه سمن وبالقفا شبريّه=به طبع ضبع مخالطته جعاره
على القدوع ودلّة العصريّه=كل اجودي شنكربه السناره
يابوعيون انظارها حدريّه=ترى الليالي طبعها دوّاره
ولاتفيد الجلسه السريّه =لامرّتك بصدوفها حشاره
لكن عساها ياولد حوليّه=تفتك بكم وجيوشها جرّاره
ولا انذكر في فتكها حنيّه=كم دار قوم ندوسها مرّاره
لاشك لو عمّرت فوق الميّه = تبقى حمارن مرضعته حماره

ملّيت من راع الكلام المزخرف = اللي علومه كلبوها هواالات
بالهرج نفسه حطها مثل حجرف = وابعد مداها للفضا والمجرّات
يفخر بنفسه حيل ياقوم واسرف = والمدح ماهو بهرجه واحتمالات
يبغى فعول ٍ ماتميل وتعجرف= لكنّ غن الليل يا ابا الدعايات
لا احتجت مالي من خزاينك مصرف = يرزقني المعبود رب السماوات
بالك تمادى بالمديح وتخطرف = تراك في حاجة دواليل واثبات
واللي معك لو قالوا اعز واشرف=ما افرقبكم كود افرق العنز والشاة