ديوان الشاعر :الشيخ:/ حسين مريع العبيدي

االحال محتار بين اثنين والاثنين غالين = كل الغلا بينهم مقسوم دايم بالتساوي
اثنين في منزلة وحدة سواة الخشم والعين = الكلل يامر وينهاني و نا فيهم رجاوي
وزنتهم وانهم عندي تساووا فالموازين = مااجوز عن واحد منهمواقول اني غناوي
ا اثنين متخالفين الطبع في الفكرة بعيدين = واحد ماله في الهوى والغالي الثاني هواوي
كيف اتصرف والم الشمل مابين الحبيبين = وانا على صلحهم واليامهم دايم شفاوي
مادمت مسئول عنهم كيف اوفق بين الاثنين = وامشي بهم خط واحد لاخلاف ولا شكاوي
العقل والقلب دايم في تنافس بينهم بين = الكل منهم يبا الثاني على دربه مخاوي
العقل قال العمر عدى على خمسة وستين = وان طعت قلب العنا يتعبك من كثر الهقاوي
قصده يزود ديونك وانت دوب اتسدد الدين = اللي فالاول عليك وللزيادة ماانت قاوي
جيت اساأل القلب قال العقل وين وحالنا وين= يبغيك تبعد عن الاحباب وتعود خلاوي
مايدري ان الحياة الحب مابين المحبين = الحب داوى جروح مايداوبها المداوي
هو مادرى ان الهوى والحب يوصل للثمانين = مادام راع الهوى حاله على الشدات قاوي
قل للعقل حل عنا خلنا مثل المجانين = ان كان وانك على فرق الحبايب كنت ناوي
رجعت للعقل قلت اخر علومك قال هالحين = بعد النظر والتحري جزت عن بعض الفتاوي
ان كان واليا الرصيد يسد فانت قدمك اسنين = بامهلك عشرين حتي ترضي القلب الشقاوي
ماقول لك جوز عن حب الغواني والمزايين = كان الهوى بالحلال اللي يلوم القلب غاوي
وان كنت مفلس ترانا مانبي نفض المواعين = ريح ركابك وقلبك لايوديك الدهاوي
وان صلوا الناس قوم وصل من ضمن المصلين = وان رقدوا نام جوز من التمني والمناوي

عديت في راس الطويل وسقت فكري بالهدو = مبزت انا الدنيا ولاها بالعجايب مذهلة
فكرت في حال البشر لاشرقو لاغربوا = احد علومه مقفية واحد علومه مقبلة
اللي يحبون التسامح للسماحة مهدوا = لين اصبحت في دارهم كل الصعاب مذللة
واللي يحبون المشاكل في مشاكلهم غدوا = يولعون النار من كثر الحسد والبلبلة
بعض البشر ساروا على درب الهداية واهتدوا = واللي سلك درب الهداية ما حد عنها حوله
الياذكر رب البرية بالشهادة وحدوا = والله عطاهم حاكم(ن) عادل في قوله واعمله
حكم الملوك الي على نهج العدالة قد مشوا = يستنبطون الحكم من شرح الايات المنزلة
من عدلهم نالوا سعادتهم وللناس اسعدوا = والشعب مرتاح الضمير ولا هموم(ن) تشغله
هم بسهرون الليل يوم ان المخاليق ارقدوا = والامن سايد والعرب متمرجلة بالمرجلة
لافيه لا سارق ولا مفسد ولا ناس اجحدوا = حق اليتامى والفقير ومال قاصر وارملة
والبعض الاخر من جهلهم قالوا انتم يالبدو = مثل الغنم يرعاكم الراعي وهو فوق جمله
وحنا سعدنا بالحضارة نقتبس منها القدو = نختار حاكمنا ولامنا نوينا نفصله
نحدد المدة ويقبلها وحنا له رعو = نحرفه ونصرفه ونطلعه وننزله
قلت البداوة للعرب من قدم لو راحوا وجو = نعتز باحوال البداوة والعلوم مجملة
تاريخنا مشهور من عهد الجدود اللي مضوا = مانقبل الفوضا ولا نقبل فعايل مخجلة
حنا قبايل والقبايل بالقوانين اقتدوا = وليا بدت بعض النوايب ياخذون الاولة
البدوا دايم يحفظون العهد لامن عاهدوا = ثورة ونقض عهود قطعا مالها معنا صلة
حنا بدو والبدو في كل المواقيف اصمدوا = دون اللوازم ننثني من مرحلة لا مرحلة
حنا حلال الله حللناه والناس اشهدوا = وما حرمه ربي حرام ولا احد منا حلله
حنا لياقلوا ولاة الامر طيعوا واسمعوا = قلنا لهم سمعا مدام ان الامور معدلة
والملك لامنه تنصب كل شعبه رددوا = ماهو غريب الياجلس حاكم على كرسي هله
جكامنا بالفعل جابوها ولاجتهم هدوا = من شانها داسوا على كل الامور المعضلة
هم عزنا هم درعنا لاجات عدوة من عدو = حامي حما يرعى الحما و الدار ماهي مهملة
الياحكو حكامنا كل المناعير اسكتوا = واليا ارتفع راس الملك كل الرؤوس منزلة
ارواحنا واموالنا لملوكنانعم الفدو = والشعب دايم خير حكامه يعم ويشمله
بني بنوه ملوكنا منه البشر تعجبوا = لاقال بسم الله بدى مبناه لين يكمله
وانتم ليا طال البنا جوه الطغاه وهددوا = تظاهروا ثم دمروا ماعمروا بالقنبلة
ثم انهبوا مال (ن) مجمع في بنوكه واشردوا = ويعايرون اهل العلا حي نزل فالمسفلة
والله مانشمت بهم لكنهم فينا بدوا = قالوا حكم رجعي وهو جا من رسالة مرسلة
ياهيه وين انتم وحنا وين يالربع اركدوا = شتان مابين العلوم الغانمة والمهزلة
ماانتم كمانا ياهل الثورات هيدوا واهجدوا = الفرق شاسع بيننا واهل البصر ماتجهله
اهل المواقف في مواقفها ولا عنها حدوا = واهل المشاكل غارقة من مشكلة في مشكلة
يالله يالمعبود كيد الحاسدين اليا احسدوا = واللي يعادي امة الاسلام يالله تخذله
ودار العروبة صونها من كل شر وكل سو = واحفظ بلدنا ما تجي فيه الفتن والزلزلة

بسم الله ابدي واخذ الصدق مقياس = في شكر نعمة يوم جات اسعدتنا
حنا دعينا الله من صدق الاحساس = يشفي ملكنامن ظروف الهدتنا
والحمد لله عاد سالم من الباس = قايد مسيرتنا ملك مملكتنا
هذا العزيز اللي على الدوم مقباس = الياذكرنا سيرته ولعتنا
هذا الحكيم اللي بنا للوفا ساس =اليا بناها بنيته شرفتنا
هذا الزعيم اللي كما صقر قرناس = بيت المعزة عزته عززتنا
قرم ليا حمي الوغا حد الاضراس = لارز راسه نكست روس اذتنا
شهم كريم ومدته تنفع الناس = من يوم جانا مدته معه جتنا
يوم ان بعض الناس يشكون الافالاس = يد ه الكريمة بالهبات اغمرتنا
حياك ربي عد ماهب نسناس= عود حميد ونجدة وانجدتنا
في غيبتك جت في الفكر لذعة الماس = وجيتك من بعد الغياب انقذتنا
لوكان في الحلة صناديد حراس = عضودك اللي في الغياب احتمتنا
الله يديمك تاج دايم على الراس = خيمة مضلة بالسعد ضللتنا
واعيد اكررها على طيب الانفاس = اتعيش ياللي رفعتك رفعتنا
ويحفظ لنا ال سعود للخير نبراس = ملااذنا يوم النوايب نصتنا

شعر الغزل ماعاد له عندنا سوق = قفلت بابه فالسنين التوالي
ماعاد له معنى ولا عاد له ذوق = ولاعاد عند اهل الشعر له مجالي
االجيل ذا ماله على الشاعر احقوق = بعد الطبيعة روحت للزوالي
راح الجمال اللي يسوق الغكر سوق = اللي ليا شفته رسخ في خيالي
سحر الطبيعة ياخذ العقل برفوق = لاشافه الشاعر تغنى وقالي
يوم الغواني فيهن الزين مخلوق = غنيت من مابي ومما طرالي
الشعر الاسود فوق الامتان مفروق = اصل الجمال الشعر مابه جدالي
والوجه مثل البدر في ليل سمحوق = اليا بدا يضوي سواد الليالي
وعين (ن) تسوق السحر من داخل الموق = ترمي برمش فوقها له ظلالي
والعنق عنق الريم والخصر محزوق = كنه من المطعوم والزاد خالي
واليا مشى ممشاه دايم على الروق= لاريض(ن) مشيه ولا هو عجالي
اليانظرته صار في القلب خافوق = من زين ربات الحسن والدلالي
فكرت فيه وللشعر هزني شوق = اقوم واقعد لاتعدى اقبالي
من زود غرمي فيه غنيت طاروق = ابدع لحوني وارفع الصوت عالي
زين الطبيعة راح ماهو بملحوق= ماعاد تلقى في الطبيعة جمالي
بعد الطبيعي جا مزيف ومسروق = ماحن له قلبي ليا مابدالي
اام الجدايل شعرها اليوم محلوق = قص الشعر عادة في كل احتفالي
والوجه جابوا له من السوق مسحوق = مكياج حطنه لهن راسمالي
خلوه من كثر المساحيق محروق = اليا انتهى المكياج بان الخمالي
والخصر من زود الشحم تقل صندوق = تشكي وتبكي من حمول ثقالي
وليا مشت فوق السهل تشكي العوق = تحذف يمين ونوب تحذف شمالي
وصف(ن) ذكرته ماشمل كل مخلوق = لازال فالدنيا عزيز(ن) وغالي
استثني اللي قدرهم دايما فوق= حرار نسل احرار فول وتالي
ولاني بعشاق(ن) ولا لي معشوق = واستغفرك يارب ياذا الجلالي

الله هو الواحد الخلاق علام الخفيات ¬= عالم بجهر الاموروما تخبيه السراير
¬الله هو الواحد الفرد الصمد رب السموات = ورب الاراضي ومن فيهاومن في الجوى طاير
الله هو ربنا هومحصي الاحياء والاموات = هو منجي الناس من شرالنوايب والضراير
سبحانك الخالق المعبود لك كل العبدات = الشرك بك ذنب يحسب من كبيرات الكباير
تامر وتنهى اوامر مالنا عنهاخيارات = محد(ن) يخالف لامرك غيرعدمين الضماير
اياك ندعو ونرجي في الشدايد والمهمات = واللي طلب غير وجه الله يبشر بالخساير
ياخالق الميت من الحي والحي من الاموات = ومدبر الكون كله بين متجمد وساير
مانعبد الا انت يارحمان يارب البريات = اياك نعبد وباسمك نستجير من العزاير
يارب تحفظ بلدنا من شرور الانقسمات = ولا تولي علينا حاكما ظالم وجاير
يارب جنب بلدنا التفرقه والانشقاقات = لا ينقسم مجتمعنا عدة احزاب وعشاير
وتحفظ لنا ديننا الاسلام هو خير الديا نات = وتديم سترك علينا مانبي كشف الستاير
يامسلمين اتقو وخذوا من الدنيا عبارات = لا تغركم كثرة الاموال وكبار العماير
يامسلمين اتقو وخذوا من الماضي اشارات = كم واحد ينذبح واهله يهلون العباير
يامسلمين احذروا من علم بثته القنوات = ماجاء منه للعرب غير الندامه والحساير
من غيرنا ناخذ العبرة وتحضى بالسلامات = انضر يمين ويسار الرعب بين الناس داير
بعد انقسماتهم ومشاغبتهم والخيانات = الذبح فيهم مثل ذبح الغنم وسط الحضاير
اليوم حنا تحت حكم تمثل بالعدالات = حكم السعودي تقويه العزيمه والبصاير
حقن دمي الاوادم واعتمد حفظ الكرامات = ساوى مابين الخلايق في البراري والحواير
شفنا جموع الحجيج تحج وتنال المعونات = وفي سابق الوقت كم دارت عليهم من دواير
من باب مكه الى باب المدينه راحت وجات = افواج مستبشره بالخير ماشافوا كداير
ماهمهم غير تنفيذ المناسك والزيارات = بامن ا واما ن وطمانينة يؤدون الشعاير
وليا انقضى حجهم عادوا رفيعين المقامات = وعن عدل حكامنا راحوا يسوقون البشاير
يارب تحفظ لنا حكامنا اصحاب المروات = مادام حكامنا ال سعود مانخشى النذاير
اعوذ بالله من شخص يسوق الاتهامات = يقذف حراير رسول الله وهن خير الحراير
مانقبله والبراءة منه تبقى طول الاوقات = الفعل هذا مايرضينا ومنه الدم ثاير
اللي يحب النبي يكثر عليه من الصلاوات = مايتهم عرضه المصيون من كل الجراير
يكثر عليه الصلاه وتشمل اله والقربات = واصحابه الراشدين اللي معه وقت العساير

سافر وهيئ للسفر كل غالي = ترى السفرللناس رغبة وعادة
فج السهل وارقى على كل عالي = حوم الديار بكل عز وارادة
تحمل الشدة وسهر الليالي = خلك على الشدات عندك جلاده
واصبرلياطال الشقا والمطالي = كل يجي حظه بقدر اجنهاده
ترى العسل دايم في روس الجبالي = ماياصله راع الكسل والبلادة
لوكان نيله سهل ماكان حالي = ماجابه اللا من تعلا شداده
لوازاد فقرك ياعريب الخوالي = الجيب خالي والمطالب زيادة
ولاعاد تلقى مايسد العيالي = دور على درب الهدى والسعادة
ادخل على رجل كريم السبالي = واطلب منه دين على الله سداده
عود لابوك وقول يابن الحلالي = جيت اطلب ارضاكم رضاكم عبادة
انتم هلي باشرح لكم ماطرى لي = من مابحالي عفت نوم الوسادة
طالبكم الرخصة وهذا مجالي = قصدي سفر مافيه عيب ونقادة
ويسر لهم حق العشا والدلالي = وليادعوا لك ماتشوف القرادة
ثم ادرج الخطوة يمين وشمالي = اللي جفته الدار غير بلاده
واعرف خويك عند شد الرحالي = دور خوي يوصل الطيب ماده
يمكن تحقق فالسفر راسمالي = عرف الديار وعرفة اهل السيادة
وتفريج عن نفس بها الهم كالي = من همها عانت شديد النكادة
ولاتاقف اللا فالبروج الطوالي= واحذر تجي لك فالوطيات رادة
واكسب من الاسفار عرف الرجالي = مكرمين الضيف عند الوفادة
والحب خله لك طبيعة وفالي = ماخاب قلب دايم الحب زاده
الحب محمود على كل حالي = اللي تزود به تسهل مراده
قلب بليا حب محسوب خالي = وليا بذلت الحب نلت الاشادة
ترى الحياة الحب مابه جدالي = والموت في نقل الحسد والحقادة
الحب يسقيك القراح الزلالي = ياللي زرعت الحب تجني حصاده
قولي على حب العلوم الجلالي = حب الكرامة والشرف والريادة
اما الذي حبه ياحلوة تعالي = هذا دمار الحب هذا فساده
لصار بحثك فالسفر للمعالي = قسمك بياض الوجه ماهو سواده
ترجع لربعك بالعلوم الجزالي= بعد المغيبة جيتهم بالافادة
هذي سلوم الناس فاول وتالي = سلم الرجال اهل االصبر والركادة

مرت علينا ليالي والدهر فينا تجبر وجار = سبعة سنين(ن) مضت والناس عانو من صنوف الدهر
حرارة الجوزادت والهوا كله ملوث غبار= والارض ضاقت بعد يبست مراعيها وكل الشجر
قالواتغير مناخ الكون والحبس الحراري دمار = هذا خبر جابه التلفاز ينذر عن حدوث الخطر
والناس قامت تبيع وتشتري في علم ماله قرار= احد(ن) مصدق وراع العقل ينفي كل هذا الخير
العقل والدين قال الله ليا ماراد له حال صار = والجاهل اللي يصدق كل ماجابوه بعض البشر
الغيب يعلم به الخالق وله فالكون هدم وعمار = سبحانه اللي على ماراد فينا يستحق الشكر
ياجاهل (ن) في تصاريف الدهرخل العلوم الصغار = هذا دليلي واسوقه لك وفكر ياوسيع البصر
في ليلة(ن) من ليال العام يوم الله لطف بالديار = هبت علينا اليماني بالنسيم اللي يشيل الكدر
ساقت بخار المياه من البحار الى السما باقتدار = واهل التجارب يقولون اليماني يقتفيها المطر
ثم استمر النسيم وسرع ماشفنا السحاب الكبار = ودندن رعدها ولاح البارق اللي فيه خطف النظر
طاح المطر واستمر الغيث يهطل فالديار القفار = تجمع الوبل فالشعبان لين السيل منها حدر
اخضرت الارض والاشجار مخضرة وفيها الثمار = والبر فيه المراعي والعشب يزخر بزين الزهر
والطير غرد يجر الصوت بالالحان في كل دار = والبادية وسعوا مرحانهم من بعد زال القشر
واليوم حنا نشوف المزن في وسط السما له مسار = وحبس الحرارة لو انه زاد حده مايرد القدر
ماراده الله كان وقدرة الله فوق كل اعتبار = بعد القسا لين والله قال من بعد العسارة يسر
الله هو الواحد الفرد الصمد يختار كل اختيار = هذي تدابير خالقنا لنا عبرة لمن يعتبر
احد(ن) لياجاته الشدة يمل وحالته في انحدار = واحد(ن) على شدته صابروشأ ن الخيرين الصبر
يالله طلبناك ترحمنا وترزقنا الحيا والوقار = وتكثر الخير في الارض الوسيعة برها والبحر

يوم الفؤاد اشتاق للمقصد اللي = كل سعى له يوم جا وقت مسعاه
سعيت انا قصدي حلال وحلي = شفي على اللي غاية القلب ومناه
طفت المداين من محل ال محلي = ماشفت رغبة فالقصور المبناة
ابغى دليل للمطالب يدلي = ومليت من كثر التعب والمعاناة
ولاحصل للمشكلة من يحلي = واحترت فامري مطلبي وين بلقاه
اخر مطافي صار للعقد حلي = فكرت والتفكير زانت نواياه
قلت العفو يارجل خفي وقلي = تقللي بعد العقل فالبلد تاه
ان كان وليا الحظ باينعدل لي = انصي ديار البدو ذباحة الشاه
وايقت راس النايف المستقلي = ضلع طيل ويتعب الزول مرقاه
مديت شيح العين في كل تلي = وفي كل وادي واترقب حلاياه
واني بعنق الريم يمشي تسلي = بين العشوب وزين الازهار تغشاه
بدوية فيها الحلا والتحلي = زاد الحلا لبس الثياب المضفاة
ابو جديل فوق متنه يهلي =يسحر سواده كل عين تحلاه
والعين من تحت الهدب تستظلي= ترمي قوي الحيل لازان مرماه
ماترمي اللا فارس مايكلي = كم شارب سود العيون اتعشاه
ومن السجايا كاسبة خير دلي = متعلمة كل العلوم المسماة
وان شافت الضيفان قامت تهلي = ماتدرق وسط البيوت المغطاة
بنت الصقور اللي تشيل المقلي = ولينها مطلوبنا اللي طلبناه

يامرحبا عداد وبل من سحابــــــــــــه = واعداد نبت العشب في صحراء وغابـــــــه
تشدا العسل مجناه من عالي هضابه = يامرحبا حييت ياعبدالمجيــــــــــــــــــــــــد
ديار حرب استبشرت بقدوم غالــــــي = من جيته جانا الفرح والهم زالـــــــــــــي
يامير طيبه مرحبا يا خير والـــــــــــي = قولوا معي حييت ياعبدالمجيــــــــــــــــــد
ياراعيا واهل المدينه لك رعيـــــــــه = واهل الهجر و المدن عندك فالسويه
يامعتزي بالمجد والعزوه قويــــــــــه = يامرحبا واهلين ياعبدالمجيـــــــــــــــــــد
حيا الا مير وحي من جا فالمسيــــره = خطوه عزيزه خيرها عم العشيـــــــــــــره
يانور والديره بنوره مستنيــــــــــــره = غا لين عندي من غلا عبدالمجيـــــــــــــــد
والثانيه عساك دايم فالوجــــــــــــود = والرايه العليا لكم طول المــــــــــــــــدود
يامزبن المظلوم ياكيد الحســـــــــود = نفخر بكم ياميرنا عبدالمجيـــــــــــــــــــد
يامير ياماشي على خطه سليمــــــه = وليا اتخذ رايه تقويه العزيمــــــــــــــــه
عمر تبوك وجا على حشمه وقيمــه = واليوم طيبه عزها عبدالمجيـــــــــــــــد
الدار تطلب منكم الشي الكثيـــــــــــر = وهو على اللي مثلكم ماهو عسيـــــــر
الكهربا ء والخط وعلاج الكسيـــــــــر = هذا طلبنا منك ياعبدالمجيــــــــــــــــــــد
واليوم فرحتنا عسى الفرحه تـــدوم = والكل عيد يوم شرفنا القـــــــــــــــــدوم
يامرحبا من حرب صبيا ن اللــــزوم =عدتم وعاد العيد ياعبدالمجيــــــــــــــــد