محاورة بين (بوش و بلير )

الله لايجـزاك بالخـيـر يـابـوش=ورطتنا فـي حـرب صـدام ورطـه
غرمتني وتقـول بتـرول وقـروش=بس الحقيقه روحتـي معـك غلطـه
يابلير رد العلم عن بوش إبن بـوش=الله خلقـنـا للمقـاريـد سـلـطـه
وأبـوي عنـده للرياجيـل دنبـوش=كـم واحـد شلنـا فلوسـه ونفطـه
أبوك والنعمين لكن انـت مربـوش=تمـوت بالبتـرول وتحـب شفطـه
صحيح عندك مال وسلاح وجيـوش=ميـر اتوقعلـك تدهـور وسقـطـه
يابلير كانك خفت يوم إحتمى الهوش=حـرام ماتاخـذ مـن النفـط نقطـه
قبلك ترى شيراك قـد راح مكـروش=شوفـه يصـرح كـل يـوم بمحطـه
وراك ماتعطـي لشيـراك عرمـوش=تـراه مشغلنـا بشيـلـه وحـطـه
وليا انتهى موضوعنا نرسل طـروش=ونجمـع المبلـغ مـن الربـع قطـه
شيراك هذا عنـده الفكـر مغشـوش=فرط علـي بمجلـس الامـن فرطـه
يـدزه اليابـان والصيـن ويطـوش=ومجهـز الفيتـو لتحقيـق شرطـه
يابوش انا مرهق وخايف ومدهـوش=وأنت تقول الحـرب خدعـه وخطـه
أسراي واسراك امتلى منهم الحـوش=عزالله أنـه اصابنـي منـك جلطـه
ماقلتلك كم فيـه إذاعـات ودشـوش=لاتكشف المعنى وانـا اقـول غطـه
وان قالوا انّا علوج واصحابنا جحوش=ماهمنـا الصحـاف واللـي يحـطـه