سلام تسليمت المسلم على اخوانه=وخلافها ناخذ الشعار مـن دانـي
اشوف عبدالله الغازي على احصانه=يمرنا والقـدم ياحـرب حفيانـي

يا مرحبا فيـك والشعـار تعبانـه=الله يسلط عليها الذيـب سرحانـي
خيلي ورمحي وكم شلتك على سنانه=انته سعد منت فـارس لا تحدانـي

دام البقى والهرم من طيب سيسانه=وبعض السواليف يارجال مجانـي
البايره مالها فـي سوقنـا خانـه=رفعت عنها مع الاجـواد نيشانـي

انا اشهد انك تبالك فك وصيانه=من حيلة الانقليز لحيل الافغاني
اتجيبها فاضيه وتروح مليانـه=اهم حاجه على لاحي وليحاني

الناس من ثوبك المسروق زعلانه=منته كفو تلبسه صح الله الساني
العود لعماك تـال الليـل دخانـه=اصبر على ماجرالك سر وعلاني

اثرك من يلحس المشهاب بلسانه=وليا نشدناه قال بليس وصانـي
لا تكسي ابو شنب والبنت عريانه=والراس مافوقه الا عرش بدراني

الصدق يزعلك يوم انجيب برهانه=لقيت تمر العرب من كل الالواني
الراس مافوقـه الا الله سبحانـه=وعلومك الباقيه من دون برهاني

يزعلني اللي تعقد الناس حجانـه=ادوين ما يعرف القاصي من الداني
الظاهر انك ضحية نـادل الحانـه=اللي يدفك من الاول على الثانـي

البيت مايندخل مـن دون بيبانـه=يالسني اللي لبسله ثوب علماني
حطيت راس القلم في ساحة الدانه=وسمعت صوتك تغير يالعريبانـي

اعلـوم زانـه وحريـه وزنـزانـه=ما نعرف المدعي من حضرت الجاني
يا دان دانه منعـرف ديـن لديانـه=و الخاتمه روح لا تزعل على شاني

علومنا طيبه والنفـس طربانـه=لاتغطي الراس دام الجسم عرياني
راحة علومك سوالف ناس سكرانه=حظي بري مانقول افلان سكراني