مريت مسنيٍّ من الوقت مهجور = دارٍ لهيب الشمس صرّم شجرها
من عقب ماكانت بساتين وازهور = يموج ريّان الورق في زهرها
مرابعٍ من فوقها المزن مزبور = تشرب من انصوب السحايب مطرها
تنصر بها الشيمة ويمنع بها الزور = تنوض بحكام الشريعة صورها
الصبح يِلبسها جمالٍ من النور = والليل يرسم بالروابي قمرها
اليوم جرد إسهالها كنها قور = حتايفٍ مثل الشباري حجرها
تشكي خفايا ضيقها اصدور لصدور = يطير من وقع المعاني شررها
لاباس ياقلبٍ من الوقت مكسور = خضر الغصون اليانعة من كسرها
كم واحدٍ عند الشدايد تقل سور = ترمي به الريح القوية خطرها
يقطع بحور ويعترض دربه ابحور = يطوي على هوج العواصف بحرها
وافي شبور ويدفعه علم واشعور = آيات حقٍ بيناتٍ اسورها
جتني تخطّا كنها درة الحور = غراء سواد الرمش يزهى حورها
كتبتها بسطور من فوقها سطور = اصوغ من جزل المعاني ادررها
ودعتها قافٍ من الشعر مجرور = على براويز الحقيقة سطرها
من رام دربٍ دونه البحر مسجور = ياطى على روس الأفاعي وأبرها
الله على قفرٍ من الوسم ممطور = دارٍ جديد النبت غطّى مغرها
تلعب بها الغربي نسانيس واخدور = على شذى زهور جميلٍ نظرها
سج القدم فيها على فجة النور = يجلى عن النفس العزيزة كدرها
من فوق مزغوفٍ على الدرب مامور = روسٍ يشاورها وروسٍ خصرها
مشى وكمّل كل واجب وميسور = قبل شعاع الشمس يبدي حمرها
على دليلٍ صادق العلم مخبور = عليه برمج رحلته واختصرها
العصر من الشم المراقيب واحدور = قرنة يسنّدها وقرنة حدرها
والليل حجّب زاهر الارض بستور = اسدل ستوره والفيافي سترها
خوة ارجالٍ معهم القلب مسرور = تبقى كما نقش الحروف بصخرها
ماكولهم رز الوليمة على طيور = وشرابهم مي السماء في انقرها
هاذي طراة العمر والطيب مذكور = وكلن يميل لرغبته لاذكرها

بيض الله وجهك