ديوان قصائد الشاعر(بخيتان البشري)

حذراك تسمع من منافق ونمّام = إن كنت ذيب اللي تشوفه تقوله
أسمع من اللي فالمجالس له وسام = له عِرف تشهد له كمايل فعوله
ومن يلقف الهرجه ويأتي بها شمام = عقله خفيف ولو زهى الطول زوله
ترى الرخوم رخوم لو حظها قام = ومن يتّبعهم مايعرف الرجوله
يمشي يمن مقفي نهار الهدف شام = نفسه عن ثقات الرياجيل عُوله
يرجع وراء ويشوف مشيه لقدام = ويزيد بالأيام حدرة نزوله
دام الحياة أعراف وأقنان ونظام = خلك كما اللي ماتعثره ذلوله
إبعد عن دروب المذلة والأوهام = والرجل يتِكي لو ثقيلة حموله

ذكرتهم لو إنهم مذكروني=قلبي حداه لذكرهم صدق وده
ودو خبر عني وبه خبروني =اللي على قلبي تجنى ببُعده
قولو يقول إن الليالي عطوني =من مُرها الفين والفين لده
وإن الهجوس بحورها حيروني = الفكر ترخي به ومرة تشده
وآحسرتي وينه ولآ ياغبوني=اليوم شوفي يشتكي فيه وجده
ياصاحبي بالله لاتسهجوني=ترى غلاكم واصلٍ فوق حده
تكفون يكفيني ولاترهقوني = صاحبك دمعه لك مواريه خده
في حالتي ما اظنكم تتركوني = واللي بنبنا يالغلا لا تهده
ياليتكم لحظة بها تسعدوني =لو هي ثواني شوف عيني تسده
فاهم لكم ياليتكم تفهموني =بحر الغلا مابين جزره ومده
انتم دواي وعلتي عالجوني =ماعاد لي فالقلب كملة وارده
مير الحقوه بوصلكم ولحقوني=قبل تروح الروح من غير رده
وقدام اموت وباللحد يدفنوني= الحق غلا من هو لكم باح سده

تدرين وش قصة حياتي من سنين = مشكله من غث الأيام تشكيل
تراكمت ولشرحها كيف تقوين = عنوانها يكفيك دون التفاصيل
بيتي حزن وثيابي الهم والعين=شابت من اللي شافته من تهاويل
دربي ألم مدري أنا متجه وين =احاول أرقى مير حظي بي يميل
سماي تمطر بالآسى صار لي حين=وتسيل بجروح الزمن داخلي سيل
أروي ظما كبدي وحاليه مُرين = وزادي هموم الوقت بالزايد تكيل
أنورّ الظلمة شموع وقناديل = "ظلمة" 00 تولعها زنود البهاذيل
أظن ماقلته كفاية وكافين = حروف من دمي لحنها مواويل
تدرين هذا من حياتي عناوين = اخاف لو كملت ينهد بك حيل
عنوانها عندك ولو زدت تبكين = اغليك ماودي دموعك هماليل
يكفي ومايخفى مع الوقت بيبين = تكشف لك الأيام من دون تكميل

السلام عليكم

هذا اول مجالسي اكتبه وهو من باب حبي لهذا النوع من الشعر

اتمنى ان يحوز على رضاكم واستحسانكم

أبـن بخيـت قـال وأسمـه بخيتـان=اعـوذ بـك يالله مـن كـل شيطـان
علوم راعيها علـى الطيـب شفقـان=يقولهـا للـي علـى الطيـب يقـدون
لولانـي أكتـب لأجـل اهـون عليـه=والله ماكتـب فالشعـر لــو بلـيـه
حتـى ولـو فالنـاس لـه قابلـيـه=ما همنـي فالنـاس مهمـا يقولـون
أكتب ليا شفـت الفكـر فـي شتاتـي=أبيـات شعر(ن)مثـل سكـر نبـاتـي
وبحـور شعـري دايــمٍ والمـاتـي=والناس عن خافـي بعضهـا يتيهـون
بذات لانفسـي مـن الحـال ضاقـت=والأ خطيـت وخطوتـي بـي تاهـت
وياكم نفس(ن)طيـب العيـش عافـت=ادري بنفسي والعـرب كيـف يـدرون
أكتب واسلي خاطـري لـو بألابيـات=ورسم خطوط(ن) في حياتي عريضـات
ولاني بمتحسـف علـى كـل مافـات=ماني مـن اللـي للمخاليـق يشكـون
الوقـت ذقنـا فيـه حلـوه ومــره=والحـظ مـا يصفـي لنـا كـل مـره
ولا لـه حبـل فاليـد حتـى نـجـره=نمشي وكم ناس(ن)على الأرض يمشون
ومحتـار فسنيـن(ن) توالـى علينـا=والبعـض فيهـا مـا يعرفـون دينـا
ماغيـر لاالدنيـا ســوى قايميـنـا=ماكنهـم بكـرة عليـهـا يمـوتـون
المـال شاغلهـم وحــب التبـاهـي=والكـل منهـم فالمتـاهـات لاهــي
حتـي الربـا ماعـاد عنـه تنـاهـي=ولاعـاد فوعـود الرجاجيـل يوفـون
وشبـاب ضايـع واحسافـى عليهـم=الغـرب عنـا بالفـكـر محتويـهـم
نشقى ومانملـك سهـل فـي يديهـم=يأهـل العقـول الواعيـة لاتلومـون
الله يهديـهـم لحـسـن التـدابـيـر=ونشوفهـم يـم المساجـد مسايـيـر
ويوفق الأمـة علـى طاعـه وخيـر=ادعو معي يااللـي مـن الله تخافـون
هــذا ويـاكـم باقي(ن)ماذكـرتـه=موضوعنا موضـوع بـس اختصرتـه
ويالادمـي كسـرك ليـا ماجبـرتـه=يبقى وتبقى به مـع النـاس مرهـون
وأنا في ديني كـم قصـرت قصـرت=وياكم مـن ذنبـي ندمـت وتحسـرت
ويامـا ويامـا فـي ذنوبـي تفكـرت=يالله عفـوك يـوم عـنـي يقـفـون
واختـم كلامـي بالكـلام الحسيـنـي=صلـوا علـى المختـار يالسامعينـي
عـداد ماينطـق بهـا المسلميـنـي=قصدي وفاء ياللي على الطيب توفـون

يا الله ياللـي اطلبـه دوم وا رجيـه=يالخالـق المعبـود يـا ذا الجلالـي
إنك تثبتني على الـدرب لا اخطيـه=من قبـل يـوم فيـه مـر وحالـي
شفت الزمن صورة لقاضي واداعيـه=ومن خصمه القاضي بلـش بثقالـي
اخترت لي فالعز بيت(ن) ابى اؤيـه=والعز ربعـي حـرب درع وظلالـي
والطيب عند الناس ينشـاف راعيـه=مدام مشيـه مـع وجيـه الرجالـي
والطيب امده واخـذه دوم واعطيـه=ولا ابديت قولـي اتبعـه بالفعالـي
ولي نظرة(ن) فالرجل واعرف مواريه=يقلط على الماجـوب بعـد الدلالـي
وربعي لهم واجب ولا بد ما اوفيـه=هم مكسبي لو اعتلـى رأس مالـي
ودلوي بلا ربعـي تقطـع عراويـه=لو يـارد الجمـة صـدر بالحثالـي
وبوجودهم دلوي تصل به رواشيـه=آرد واصـدر عـد عـذب وزلالـي
والرجل يبعد عـن كثيـر المشاريـه=لـو الزمـن يقبـل بسـود الليالـي
ومن فارق ربوعه محد يلتفـت فيـه=يلقى مـع المقفيـن عم(ن)وخالـي
ونهايـة المشـوار تظهـر خوافيـه=وينكس لهم لو الزمـن بـه يطالـي
وعزاه مـن مالـه يحسبـه مقديـه=مايدري إن ريـال يصـرف ريالـي
وعزاه يالي واجـب الربـع طاويـه=هـذا فراشـك تفـرشـه للعيـالـي
راع الوفا والطيـب وثـق مباديـه=شتـان مابيـن القـرض والثمالـي
وجهٍ خلا شمس الحياء ماشرقت فيه=يصبح ويمسـي يغتسـل بالرمالـي
ورجلٍ لبس ثوب الردى وصار زاهيه=حطه علـى يسـراك بـه لا تبالـي
وناسٍ احد فنجال مـا يرتـوا بيـه=ولا ينتـرك مـرة مثيلـه حفـالـي
و احدٍ كماالقمـرا تفـرح مساريـه=و احدٍ سوات الليل يكسـى الجبالـي
ياهيه جاك العلـم لاتقـول ناسيـه=شرحت لك درسك من هجوس بالـي
وإعداد همـالٍ نشـا مـن مناشيـه=صلوا على المختـار فـأول وتالـي

أنا مخفي عليكم ياجماعة حظي المقرود = ولا ادري كيف سايسني وطعته لين وداني
إلى قمة جبال الهم هو قايد وأنا مقيود = وتركني قال لك شانك وأنا بالمثل لي شاني
وقلت الخوة اللي وصلتنا حالي المشهود = وقال الحظ قادك لين جابك يالعريباني
وقلت ارجوك يالحظ الردي ياراعي المنقود = وقال المعذرة امزح معك ماترك وحداني
وقلت الصلح فيما بيننا ياصاحبي ممدود = قال أنا مسير ياصحيبي واخدمك لله مجاني
أنا ما اطلبك تصرفني وعلمك لايجي به زود= أنا عايش معك لورحت للمريخ تلقاني
وقلت السالفة تاهت ونبغى نعرف المقصود = تمدد قال انا حظك ومالي واحدٍ ثاني

دربي طويل وتايهٍ فيـه ممشـاي=مثل الغريب اللي مضيـع دليلـه
يحدني وقتي على ضيـم دنيـاي=ورضيت بالمقسوم حتـى قليلـه
يا طول صبري وآآآآه يا كبر بلواي=أخفي عن العدوان همي واشيلـه
أخاف أبوح بسد قلبي وشكـواي=وتصير نفسي بين ربعـي ذليلـه
أضحك ودايم بسمتي تسكن شفاي=ومن شاف حالي قال محدٍ مثيلـه
وأنا بجوفي هم والنـار بحشـاي=والجرح ينزف والليالـي طويلـه
والعمر يمضي بي وحاير بمسعاي=محروم من طعم الحيـاة الجميلـه
الياس حل وماتت اليوم رجـواي=ولا عاد لي غير الصبر من وسيله
يا حظي الباير تعثر بـك خطـاي=يا حيلة الله ما بقـي فـيّ حيلـه
يا الله يا عالم بسـري ونجـواي=تزيل عـن قلبـي همـومٍ ثقيلـه

ياماحلا الضمة على بحر الأشواق = تروي عطش منهو على الشط مكسور
يكون به موج الغلا حيل غراق = مبني على فتح الأحاسيس وشعور
وتعانقة شدة على جاله عناق = ويصير حرف الجر للحال مجرور
حتى السكون يهيم في جو الآفاق = ويصبح على جو المحبين منثور
والمبتدأ يسبق خبر فالهوى شاق = والحال وصفه من بعد كشف دكتور
الحب فاعل مرتكز جوف الأعماق = ومفعول به ودٍ منقا من الزور
كتبت ماتملي ترانيم خفاق = وصغتها بالنحو والكسر مجبور
ياللي تطيق وقلبي اليوم ماطاق = ارحم وخل أيامنا فرح وسرور

يابنت يابنت الاجاويد فوقي=صبرك على الدنيا وصبرك عليه
يابنت حبك وسط قلبي يفوقي=كل الذي فالكون وانتي بنيه
بالله يا بنت الاجاويد روقي=ما للشقا فالطيب يابنت جيه
يابنت لو تدرين وش في خفوقي= كان الغلا في داخلك نرجسيه
جرح الشعور من اقرب الناس عوقي=واحساسي الصادق عروقه نديه
يابنت حبك طوق القلب طوقي=والله يسامح كل راعي خطيه
يابنت لك في داخلي كل شوقي=اقدم الأشواق لأجلك هديه
يابنت في حبك سبقت البروقي=واجر صوتي باللحن سامريه
يابنت لاغبتي تيبس عروقي=واعوم فبحور الهموم العتيه

عشنا مودة مالها حد محدود = لا وعد اخذنا مع بعضنا ولا عهود
وإفراقنا ماكان فالبال موجود = تكفيني الذكرى من أحباب غالين
مادري وش اللي عكر الجو تعكير= لاهو شكى مني ولا شفت تقصير
مكتوب راده ربنا لازم يصير= تكفيني الذكرى من أحباب غالين
جنة بها الأثمار وأنهار وعيون = راحت هشيم وفوقها عيون يبكون
عيا الفرح يبقى من اللي يحسدون = تكفيني الذكرى من أحباب غالين
كان الأمل وطموحنا ما يتحدد = وفي كل يوم شعور فينا يتجدد
ومن بعد ماحلمي وحلمه تبدد = تكفيني الذكرى من أحباب غالين
الكل منا يرسم الحال مره = فيه السعادة كل ساعة تمره
واليوم بعد الوقت عانيت مره =تكفيني الذكرى من أحباب غالين
ياليت يالأيام ماشفت جورك = آلله لو تدرين وش كان دورك
ومن بعد قلبي حطمه لي غرورك = تكفيني الذكرى من أحباب غالين
عساه يذكرني كما ما ذكرته = ولو ماذكر من طيب خاطر عذرته
لا يانسانيس الهبايب شكرته =تكفيني الذكرى من أحباب غالين
با اعيش به ذكرى فباقي سنيني = عساه متهني ولا هو حزيني
صعيب لو جيته وأصعب يجيني =تكفيني الذكرى من أحباب غالين