ديوان قصائد الشاعر(بخيتان البشري)

بعد نسنس الغرياف في عالي المزبان =تهيضت وأطياف الهوى في حراوية
وجاشت هجوسي والفكر ينِشد الألحان = ويرسم من أيام الهوى والهواوية
ذكرت الهنوف اللي لها حشمة لها سلطان = على قلبي الولهان روحي بها حية
حياتي بعدها غيرت كفة الميزان = ذليل الهوى مطعون والجوف به كية
رماني زماني ونجبرت افقد الخلان = اغـني بصوت الذيب والاعب الحية
كتبت الشعِرْ والحرف من دُرة المرجان= نظمت القاف لعيون المها والنداوية
أصيلة ولابتها لهم فالملاقا شان = الأمجاد طالوها نسب عز حربية
ولية وعليّه بالمودة وفا وإحسان = تصير اسرارنا فقلوبنا صفحات سرية
الا يافراقٍ جاء ولا كان فالحسبان = عليه الحسايف تلتقي كل صبحية
اداري جروحي بالمدامع وبالكتمان =عسى بالعمر لو يوم يمي لها جية
اعاني من الحرمان وتعاني الحرمان = ولاشي بِيديها ولاشي بيدية
ولو نطري النسيان يامصعب النسيان = يتوه الفكر والروح لاشك منهية
وش اللي حصل مدري ولادري وش اللي كان = ولكني ادري بالآمل عايشة بية
حروفٍ على الأوراق والشاعر بخيتان = تعبر عن شعوره والأيام مطوية
وتبقى لنا ذكرى قصيدة مع الأزمان = تداول مع العربان برموز مخفية
تبقى ولا نبقى بعد نلبس الأكفان = وذي سنة حياة الناس ودروب ممشية

احدٍ مع دروب النشاما له دروب = وأحدٍ لقي دربه مع أهل الرخامه
العز له مطلب وراعيه مطلوب = وله بين خلق الله رموز وعلامه
اللي بلبسه يحسبه صار مرغوب = المرجله ماهي بلبس و وسامه
المرجله للي له الطيب مصحوب = ودرب الوفا تاجه ويملك وسامه
دايم ورأيه فالرياجيل محسوب = وليا نطق يعطيك زبدة كلامه
حرٍ وبين الناس نشمي ولهلوب = حشيم ماياطى دروب الهيامه
وراع الرخامة فاللوازيم محجوب= في فاقة ربوعه تردى سهامه
وليّا وعد تذكر معه وعد عرقوب = وماده قريب ولا تعدى الجهامه
العلم شرق وجابته تنحي غروب = وفي مجلس العقال لف العمامه
هذا الزمن عجبة وعاجب ومعجوب = يالله زبنتك لاتجيني ملامه
استر عبادك واسألك تغفر ذنوب = ولاتجعل الدنيا لعبدك مرامه
وياربي استغفرك من ذنب وأتوب = وتجعل لعبدك بالشهادة ختامه
وعلى محمد عد ماحرف مكتوب = صلوا صلاة الله عليه وسلامه

الله يجازي راعي الذنب بالطيب =والله يسامح من تجنى علينا
هو عارف إنه في علو المراقيب=لكن مدري كيف ظنه خطينا
اليوم فكره به يودي به يجيب=والله يعلم كان سره عطينا
عقله لنا يخطي ومرة به يصيب =ولأجل الغلا مهما حكى ساكتينا
يحبنا قلبه وهو قاعد يعيب = قسى علينا يومنا ماقسينا
ياروح روحي ياعذي المشاريب=داخل عليك الله هوّن ولينا
غالي وتكوينا ونسعى مطاليب=والله في ضرك حشا ماسعينا
ارفق وخل احزان عن شوفك تغيب=ويبان وين إحنا معك واصلينا
والله تبقى مالنا عنك تجنيب=فعيوننا تبحر لك القلب مينا
ماعاد نقوى للمعاني بترتيب =ابكيتنا ودموعنا مغرقينا
حرام لوتدري بنار اللواهيب=اللي من سهومك تحوم وتجينا
إنك تقول آسف ظلمناك ياذيب= المعذرة فيما بدر طالبينا
شيبتني يازين قدام لاشيب =هذا وحنا بالغلا صادقينا
ابنتظر وش آخر العلم واهيب=بك خير دام القلب به ساكنينا
ماخاب ظني وانت ماظنك تخيب= وبنستمع وش يمنا قايلينا
وإن جبتها بالعكس تزويد تصعيب =اعلم على فرقاك لا ماسلينا
روّح وشمسك شارقة يوم ماتغيب= لو رحت عنّا باقية تحترينا
مانحتمل هجرك ولازود تعذيب = لكن ماحنا لكم جابرينا

شوفي لفكرٍ ماحوى ميز عقله = لعقودها مرهيت به يوم حلال
لو زان هرجه مايطابق لفعله = لو خيلته تنبي ملامح لرجال
ما كل عمله طابقت صرف عمله = ولا كل مانسمع من الهرج ينقال
ياكم مكيالٍ ليا كال طمله = وياكم مكيالٍ لراعيه كيّال
ترى الجمل مايشتكي ثقل حمله = دام الثقال الناس قالوا لها جمال
ماكل واحد للوفا فيه كُمله = درب الوفا لرجال تمشيه لو طال
ناسٍ تعشق الطيب وتلم شمله = ماتفرُقه تكسيه في كل الأحوال
مجلاسهم في عز ورجال صمله =على سمين وبن مع هيل ودلال
والسالفة لاجات ماجات ثمله = ينشط لها السامع وتشرح له البال
رجال تنقد من عُلومه ممله = اللي يدربيها من الجال للجال
من لا يصف حساب مافاد جمله =ومن لايقود جمال ماهو بجمال
وختامها عداد وبلن وهمله =صلوا على شفيعنا يوم الأهوال

الجزء الثاني من قصائدي عسى ان تنال اعجابكم

كان الثقة ماتت وعايش على الظن = والشك مستولي على كل فكرك
وقامت وساويسك علينا بها تشن = هجوم ماينفعك لكن ضرك
لا واحسافة قلت وضعك تحسن = ولا عاد عقلك للمشاكل يجرك
ومادام مازالت على رأسك تزن = حبيت عن رأئي اصرح واعرّفك
هذا قراري لك واضح ومعلن = ان عدتها ماشفت شيٍ يسرك
درب السنع مايحتمل قول لكن = خيرك جميل اليا كفى عنك شرك
وإن قلت انا0بقول ياهل ترى من = يامن حلاتك ماجلت فوق مُرك
تدري لو إنك بين الاضلاع تسكن = بلا ثقة ماينجبر يوم كسرك

الود ياللي فالهوى مخصصينه = حب وغرام 0 الود ولف ومحبه
بين البشر فقلوبهم محتوينه = أصله صفا ماهو ملام ومسبه
بين الاهل واقراب يافاقدينه = ونلقاه فالاصحاب او بالاحبه
الناس تحيابه وتحيا سنينه = ويحفظه قلب الذي خاف ربه
ومن يفقده بينك حواجز وبينه = اساسها من كُره فالقلب شبه
الله على بلوى جناها يعينه = نفسه دواها يملكُه كان كبه
ولا كل واحد منه نفسه حصينه = من هو يماشي صاحبه منه حبه
يانفس باب الود لا تقفلينه = اعرف هواك إن بتبعه احتطبه
إن ماخسرنا منه وش كاسبينه= الكُره من حبة بنوا منه قبه
ويالله تجعل ماخفى شايلينه =في قلوبنا من ودّ يبقى وثبه
وختامها عداد من هو يمينه = ماتكتبه فالعمر من حرف كتبه
صلاة ربي كاملة فوق امينه = اللي للأمة ود مدلول قلبه

بأهل الودايع ماتضيع الودايع = وعلم الوداعة عند راع الوداعة
وبأهل الذرايع لأجل سد الذرايع =ذاك الحكيم السيف يمناه طاعة
بعض العوايد ساسها بالشرائع =تبقى بأهلها ماعليها انقطاعة
واللي يجيب العلم ماله مراجع = ترجع على وجهه علومه رجاعة
بعض العرب فتنة ورأس المواجع =نفسه ضعيفة عاشها في مجاعة
لاجات بدعة من عيال البدائع = قال المثل من لاشراء الطيب باعة
أهل الطلايع باقية بالطلايع =وليل الظلام الفجر ينزع قناعة
سوق العرب يكتض بكثر البضايع=فيه الرخيص وفيه غالي بضاعة
يبقى الصنيع يخص قوم الصنايع= كم غير الله بين ساعة وساعة
الحر ياقع نايفات المواقع = ياهيه ماهو للنعامة طماعة

تربع قمة حروف المعاني لاكتبت الشعر = ولاتقبل هزيل او ماحوى مالا يحبونه
وخله مثل برقِ في سحابة لا ارعدت وامطر= نزل وبله عليهم بأعذب الالحان يقرونه
بيوته سيل تفرح به عيون وسرّها المنظر = وفيها من خيالك ريشة الرسام وفنونه
ودام المفردة ترقص على مسرح فكر يقهر = عوايق ماترده لين ياصل دُر مكنونه
يغوص بحور فيها الدُر والياقوت يوم ابحر = لجمهوره يجيب الجزل يكرم خاطر عيونه
ويجيد الشعر بانواعه ويبدع كل ماسطر = حروفه 0واشرقت شمس المعاني يوم يطرونه
ومتلقي وذايقته بها الاعجاب له يظهر= تنقى في كنوز الشعر تلقى من يهيمونه
وش اللي ينقص الشاعر إلى منه بغى يشعر = سهل لاجاب معنى يحتمي ماكان مضمونه

كان مايرتاح لك فالحب بال = وعشت حبك في زمانك هد حيل
أستمع ما أقول 0 لو الشرح طال = ينتهي 0 لو ما انتهى الليل الطويل
المودة لاحصل فيها انفصال = شوقها لا حط لقي الصد شيل
وانت ودّك مع عروق الدم سال = حسب ظني الغلا أكبر دليل
والقرار بترك مثلك لي مُحال = وفي قبوله يتضح لك مستحيل
لو على بالك طرأ هذا السؤال = كم بأهل الوّد شفنا من قتيل ؟
كان ترضى بالامر في كل حال = مثلما في داخلي " صبرا جميل"
كان تبغى للمحبة طيب فال = مابقى فالصدر من ضيقهِ تزيل
وفي وجودي للمقام اجعل مقال = لايجي زوّد الوّله من زوّد قيل
وفي رحيلي عيشبي حس الخيال = وانت تفهم يالجدي مقصد سهيل