ديوان الشاعر/ سعد المحمدي

الشيخ بندر في نهار الزومي= له ماقفٍ كل القبايل حكت فيه
حسب تقاليد العرب والسلومي= سعى ورب الكون وفق مساعيه
للجاه قدم روس قومٍ قرومي= لعتاق من حد المهند بناخيه
من بعد ياس وحل شبه معدومي=بالمال قرر بندر الفرم يفديه
قال افتحو للمال باب القدومي= اللي تبونه ياقصرانا نعديه
وحطوا عليه من الملايين كومي= تعجيز مدري ويش حنا نسميه
وقع على المبلغ ليوم محتومي= الحمل جاير والمصيبه توازيه
ثم قال ياحرب الكرم والعزومي= تكفون خالد زايد الهم يطويه
من الحفر لقصى حدود الجمومي= قامة قبايل حرب تجمع وتعطيه
حتى كمل مابين ليله ويومي= المبلغ المطلوب بيدين راعيه
وعم الفرح قلب العجوز الكضومي= اللي تخيل صورته ثم تبكيه
من ساهمو غير القبيله عمومي=ترفع لهم بيضاء على راس عاليه
ياعل عزك يالقبيله يدومي=تم الكلام وبلغة القول صافيه

مقدمه وقصيده لشاعر والاديب فايز موسى البدراني



أخي أبو تركي سعد المحمدي..
شاعر كبير بشاعريته وبأغراض شعره، ينبض وجدانه بمحبة القبيلة والاعتزاز بها، والذود عنها، والرد على من يحاولون النيل منها.. ولإعجابي بهذه السجايا، فقد هاضت القريحة المتواضعة بالأبيات التالية أهديها له ولكل من يسيرون على نهجه في هذا الموقع وغيره، مع المحبة والتقدير

يا سعـد لك كل شكرير وامتناني =وافتخر في نهج مثلك واحتفي به
شاقـني معناك يا جزل المعـاني =حـاجـة ما هي على مثلك غريـبة
ما تجيب من العلوم الا السماني =وان طرقت السهم طشيت الضريبة
عل يـفـداك الدويـني والهـداني = الهـزيـل اللي على ربعه مصيـبة
سر على مبداك ياسهيل اليماني =اضرب ابليس العور واكسر صليبه
واعتبرني من سواعدك المتاني =صاحب عند الشدايـد تعتـزي به
لو بغى الحاسد يقلل من كياني =من فـضل ربي يعـوّد بالغلـيـبة
منهجي والحمد للي له هداني =منهج الاسـلام والدين اقـتـدي به
واعتزي عزوة رفيعين المجاني= والدي من حرب وامي من عتيبة

ردي على الشاعر والاديب فايز موسى البدراني

الشكر لمنزل السبع المثاني = عالم الاسرار والنمل ودبيبه
له عبدنا في خفانا والبياني= جل شانه ناصر محمد حبيبه
ثم ترجم مابقلبي يالساني=للجزيله نكرب حبال النجيبه
مرحبا وهلين هيل وزعفراني=ياصديقٍ دايمٍ سباق طيبه
بالتواضع والصداقه شي ثاني=من وفاه وطيب خلقه نهتديبه
رايد التوثيق له قدر ومكاني=في سنام المجد له ماطا وهيبه
مامشى درب المذله والهواني= دايم الجزلات فايز من نصيبه
بالسماء حلق عن الدار الطماني=حر مايرضا على نفسه غليبه
حجته يقنع بها قاصي وداني=غير حاسد فيه شك وفيه ريبه
قبلنا دون القبيله يالحصاني=سم ساعه بالبعيده والقريبه
ياحزامي لختلف ممشى زماني=لاعوى في عالي المرقاب ذيبه
أبشر انا في قساها والياني= خصمنا يرجع رضا والا غصيبه
القبيله شانها يالقرم شاني=لين فوق الراس تركزلي نصيبه

تقاسيم وجه العـود تحكـي معاناتـه=
=عسى الله يعوضه جنة الخلد بعد الموت
بعد ماقصر شوفه وقلـت طموحاتـه=
=تذكر شبابه ونحنـا ثـم جرالصـوت
تقـدم بسنـه والمخاليـق شمـاتـه=
=مايقدر بيمناه الضعيفه يـزر الكـوت
له أعيال كلـن ملتهـي فـي ملذاتـه=
=وبوهم مايلقى بعد كبره ثمن للقـوت
شريكة حياته عينها يم مخباته=
=جماها بعد بيض الثنايا تقل تابوت
على العود ترفع صوتها بعد عثراته=
=خبيثة طبايع رمشها من كبر محتوت
على خده المجروح من كثـر عبراتـه=
=قرينا معاناته بوقـتٍ يشوتـه شـوت
تدور الليالي والمخاليق مواته=
=ولاتنفع الحسره بعد مايفوت الفوت

ياعيد ياكثر من وده بعثراتي=من داخل السور ناس وناس بالخارج
وانا رجال الوفى والطيب مرءاتي=رافع جنابي عن المسكين والمارج
دايم وبيضاء مع العالم سجلاتي=توفيق واحد الهم المبتلى فارج
واليوم كثرة من الحساد صدماتي= ياعيد زاد الضجيج وهرجة الهارج
سود النوايا تفتش في ملافاتي=عامين سيل الخطاياء صوبنا دارج
سليت سيفي وعارف وين ضرباتي=ولقيت بالماد عرج وفيه متعارج
شمنا عن اللي مايحمل ربع وقفاتي=وانا بوقتي مع الازمات متخارج

سفه السفيه اليا تكلم يغيضه= ويرفع مقامك عند ربعك والاجناب
فيه الفجوج تضيق لوهي عريضه= يفقد صوابه ويتعرض للانشاب
انا لقيته للنفوس المريضه= علاج عن كل الدعاوي والاطباب
ماتقبل السنه بترك الفريضه=يالبيضه اللي حولها جرة اغراب
على الجوارح يالقلوب البغيضه= لابد مايطلع خفى كل كذاب
شفت الخيال اللي معاكس نفيضه=يرعد قبل يبرق على تل وهضاب
سيله تعدى من جهتنا مفيضه=مابل قاع ومانفع عوج الارقاب
عطيت روس اقلام سلاق بيضه=قدام مبداء حرق قلبه والاعصاب

بين الصواب وبين عكس الاتجاه=انا لقيت التبع مثله يتبعه
وشد انتباهي سلك من كم العباه = ماجود دون الخمس فوق الاربعه
حوله من الواعين ريبه وشتباه= سمعت بالموضوع غلطة مطبعه
حبر القلم لونين في جنب الصفاه= ماقول شوف العين نسمع قربعه
يقوله اللي يعرف البير وغطاه= فطين مايعمي عيونه بصبعه
فصيح ماينشب لسانه في جماه= يوجع بطعناته وضيفه يشبعه
تم الكلام ومن يدور له لقاه= من شاعرٍ جاب الخبر من منبعه

قصيده موجهه لشاعر خالد الحصني

ياهاجسي عطني من الشعر مأجد=اختار جزل القول وترك هزيله
من غبةٍ من قاسها مالها حد=ماهي بعدٍ دم جمه نثيله
حركت راكدها مع الجزر والمد=واخذت عن هزل المعاني جزيله
ماني موردها على غير مارد= الناس عارف دمها بالفصيله
نصيتها شاعر ليا وصلته سد= شاعر يمثل بالمواقف قبيله
ياخالد الموضوع لو عنه ينصد=ماقول قرب للزناد الفتيله
النار في كبدي وهجها تزايد= والعين يامشكاي صارت عليله
اسباب علمٍ يازميلي موكد=سمعي بذاني هرج نافخ صميله
يبغى يروم المجد والحيل منهد=ومايقطع الفرجات ساحب شليله
حنا لهم يالقرم في كل مرصد= العام مافاد ابرهه كبر فيله
خذني على يمناك في ساعة الجد =مابور لابان العميل لعميله
نبغى نولعها حرايق من الغد= وراع الخطاء بالحال نكشف حصيله
من هازنا يوم المعارك تكبد =خسايرٍ يالقرم جدأ مهيله
ان ماوقفنا لهل المخطيه ند= كثرو علينا سالقين البليله
الصاع مثله صاع والمد بالمد= والهينه صاحبك ماتستويله

زاد الكلام وحان نظم المثايل= وسميت بالرحمن من كل شيطان
بسمه بدينا قولنا بالجزايل =الطيبه نسعالها كل الاحيان
عيني على الجزلات دايم تخايل=ولااني على ذم المخاليق شفقان
اخاف يومٍ فيه للعبد سايل=للتف ساق بساق والجفن غرقان
في ساعةٍ مافيه حيل ومحايل=الا عمل صالح به يفوز الانسان
قلته وانا راسي على العز طايل=ماينحني شامخ مثل ضلع ورقان
اقدر الطيب بكل الوسايل= واسمح له الزلات في قدر الامكان
كل العلوم الهابطه والسفايل=اشوم عنها والرديه لرديان
وان شفت ثرثارٍ عن الدرب عايل=لابس شماغ وباقي الجسم عريان
عن الطريق يضيع وقت القوايل= لو تنصحه قال انت غاوي وغلطان
أركي عليه النار شين العمايل=لاما يدل الدرب راضي وزعلان
سوات كلب الجار راع الفشايل=ينبح علينا دون حجه وبرهان
زعلان من علمٍ عليه الدلايل=شمر شهوده عندنا وسط شرطان
انشد وتلقى العلم حتى بحايل= عند الرجال اللي بها صدق وايمان
وهرجك يضحك ماشطات الجدايل=ظيرت لك فعلٍ حشى مابعد كان
تبغى علينا يامحمد تحايل= وحنا نعرف الناس حضرٍ وبدوان
ضيف الله اللي تذكره ياهوايل= يوم المعارك راعي أسنان وعنان
شلفاه من خلف الضلوع النحايل=تقطع عروق القلب شريان شريان
جاكم وجمعك فوق كثره دخايل=الترك معكم جمعها تقل حيطان
مالك فخر ورتاح تحت الظلايل=في ماذكرته ونشد افلان وفلان
وذكرت مانع ياردي الفعايل= مافيه مانع فرم في وقت الاكوان
وشهادةٍ بالزور عيب وخمايل=يبقى الصحيح وراعي الزور خسران
انشدك ياراع الخطاء والرزايل=عن راس اخو صلفه سلايل كحيلان
عند العريمه واقرب الشك زايل=تعال شاهد بندقه وسط ديوان
ويوم اليالي بين ميل وعدايل=قوم الزغيبي قطعو بيت غضبان
قدامنا قاله عريب السلايل=في مجلسٍ من قومكم فيه شيخان
وجاموس راسه من على المتن مايل=يوم الهميليه تعشاه سرحان
دمه على متنه من الراس سايل=من فعل ابن راجح طنا كل فسقان
وبن جبر ناحٍ عليه الحلايل= حقايقٍ ماهي سواليف رعيان
رموه دون معبسات الشمايل =علمٍ عليه اشهود مافيه جحدان
وراع القناه عبيدكم فيه قايل=ابيات ترويها شبابٍ وشيبان
الاحمدي ثناء جميع الرحايل=قال ادفعوا والا غطاء الجمع دخان
بالغصب مافيها علينا فضايل=دفعتو الجزيه طويلات الارسان
عبيد ماذمه زبون الثقايل=حضي بري ماجحد فعل طير حوران
الناس كلن دون عانيه طايل=في حاضر الدنيا وفي ماض الازمان
وجمع النحيت متعبين الاصايل=مايذبحون الا شيوخٍ وفرسان
انشد وتلقى للشيوخ الاوايل=تاريخ واضح للعرب سر واعلان
ان ولعو للحرب روس الفتايل= في ديرة الاجناب ترعى بالاضعان
يوم القبايل بين صايل وجايل=حريبهم يرحل عن الدار عجلان
جيش الجنازه راح شرد وذلايل=اطيبهم اللي عقب الحزم حفيان
من بعد ماجاهم على الخيل صايل= انكف صليب الراي خاسر وسقمان
والفرم شيخ يتبعونه قبايل= سيفه يقص الراس من حد الامتان
اخوان حسناء طيبين الحمايل=افعالهم وسط الجزيره لها شان
من فعلهم في مرهفات الصقايل= عدوهم يصبح من الخوف سهران
ويوم القراين راح جمعك عزايل=من طاح مات ومن سلم راح ندمان
من فعل ابن حماد حرزالدبايل=عاف الطمع ريف المشاكيل سلطان
حنا قبيلة حرب قوم الصمايل= عز الرفيق وللعداء سم ثعبان
تاريخنا معروف مابه جهايل=وفعالنا قرو بها ناس عدوان
والا انت عن قول الحقيقه تذايل= من الحسد قلبك من العام مرضان
يالشمري للخيل نعطي نحايل=عبيد قاله يوم غنى باللاحان
ومنا نويشي ياهبيل الهبايل=عند الخوي ماقال خالي وصدقان
جلا الملام وكن وسطه ملايل=بعد اربعه وثنين في حد شامان
يمين خاله جبها بالمسايل=ماينجبٍ مثله من البيض صبيان
ودخيل عن جاره حياته بدايل = فداء قصيره في حياته بليهان
لو كل شيٍ نذكره بالكمايل =ماحصيت فعل محاربه كل خوان
عدونا منا يشوف النكايل= وصديقنا محشوم والطيب أمعان
هذا وشمر طيبين الخصايل= كبار الصحون موسعه كل مطعان
ماقول بالاجواد عيب وخمايل= لاوالذي مكن نبيه سليمان
لنا على شمر حقوق وجمايل=ولهم علينا مثلها شوف الاعيان
بعض السوالف ماوراها نفايل=منا ومنكم ياطويلين الايمان
وهياط مقطوع الرجاء والعقايل=ماغير الواقع ومايثير بركان
لاصار في صدره علوم وغلايل=حنا نرد الصاع مثني ومليان
نمشي سنود مانحب الحبايل= نفوسنا فيها معزه وشجعان
ماقف على الجرف الطويل المهايل=من خوف قول الناس مخطي وغلطان
من فوق راسك يامحمد مخايل=من برقها يالشمري تذعن اذعان
اما تدس الراس وسط العوايل=والا وقفت وصرت لرمي نيشان
خذ علم شاعر مايجيب الهزايل=الكلمه الهزله سماجه ونقصان
الناس قالو ماوراها حصايل=ونته بها غنيت في راس مابان
اليا طفح من غيض كيل المكايل =فنجالكم مشروب في كل ميدان
يا شلةٍ في مجتمعها حثايل=سفهان تدفعها على حرب سفهان
تم الكلام وماذكرته رسايل=والكذب مارجح للانذال ميزا ن

http://www.m-harb.net/vb/showthread.php?t=143779
على هرابط

الا يامحمد كان عظمك طري وهشاش=تعوذ من الشيطان وادرى عواقبها
لاترفع حساسك وانت قالو بليد ولاش=كثير الغباء نفسك على الذل يجلبها
على راسك اللي من صدوف الزمن منداش=ياكثر المصايب يوم هبت هبايبها
تجي دون داعي ثم تجلس بدون أفراش=مع الابه اللي عيبكم مايعيبها
غنيين عن شرواك يالخايب الغشاش=ترى الكاولي مامذهبه مثل مذهبها
ماعمري سمعت اهل الولع هدة الخفاش=حقايق قريت احروفها قبل مكتبها
بعد جيتها من كربلاء يالردي منحاش=على حد قولك ماصفت لك مشاربها
عطوك البطاقه يامحمد بها تعتاش= ماقالو على الجيران هايط وعذربها
تذم الرجال الطيبه وانت واحد ماش=سفيهٍ ركابك مع هل الغي تشعبها
رديه مقاضيبك وفكرك فكر حشاش=علومك طوال اعراض منته مرتبها
تدور على الشهره مع الناس بالمنقاش=ماباقي فناجيل العرب غير تشربها
وبعد جاك راع السيف والرمح والرشاش=ورعا البندق اللي ماتجنب مضاربها
عطيب الضرايب عملته كلها بالكاش=سبايك ذهب قصدي قنابل مذهبها
من اسبابها يمكن يصيبك وهن وخراش=ومع اصحابك الغالين بكره تخربها
ياراع الهزايل للهزيله ورى قشاش=تبعد قريبه والبعيده تقربها
قبيحه علومك والنطيحه لها نهاش=ياكلب المجازر نفسك الشين مطلبها
ترى كثر هرجك يابرق الريش يالبكاش=وساع البنايد مايقرب حظايبها
بعد قدرك اللي من حماقه علينا غاش=علي الحرام ارموش عينك لشيبها
انا دون ربعي محتزم يالردي بكلاش=ومعي حربةٍ من دم جوفك مخضبها
حزامي قبيلة حرب لفعولها شواش=ليا قيل حرب الراس ياصل كواكبها
ذرى من زبنا حقنا صعب مايناش= قبيله عريبه يامحمد مناسبها
نزلنا الحجاز ونجد يوم النفوس اعطاش=ماحد ردنا يوم الطمع عن مناكبها
تبعنا هوا حرش العراقيب يالقراش=على ظمرٍ روس المناعير ترهبها
وانا داري انك راس ظبيٍ مافيك اعراش=عيال الحمايل مادسم شواربها
تزعمة شله رميها عن هدفها طاش=عديمه ضمايرها عسى الله يخيبها