ديوان الشاعر(بخيتان البشري)

قلنا صدق حلم قاضيها = لكن انتم ماصدقتم

نمور فالجد نقصيها = مهما صمدتم وعاندتم

ودك ملِك دولة اعماقي = والقلب له كرسي السلطه
ومشاعري شعبك الباقي = على الولآء وعهد لك حطه

لك في خفى خافقي منزال = ومنزال في نون الاعياني
ولاحياني الله وعمري طال = منساك لو كان تنساني

لاشك ماعندي ادنى شك = إنك مثل ماني اشوفك
اشك ثوب الحقايق شك = وينفتق داخل كشوفك

تستشهد الحادثة بشهود = فالأصل لا تشوف لا تنطق
مهما يطول الزمن وتعود = يلقى بها القاضي المنطق

بعد رحل داخلي عقب = ذكرى رفيعةّ مقام وسوَم
اربع عشر من رجب يُكتب = تاريخها 0 والخميس اليوم

تكفى العتب لا يجيني منك = مالي على معاتبك مدخال
حمل العنا جيت اشيله عنك = ماجيت ازيده بعد ما مال

صعب المجاريح نحصيهم = وجروحهم مستحيل تعد
ومادامنا منهم وفيهم = قلنا نسوي حساب ورصد
واجب علينا نواسيهم = لو مالنا في سببها يد
واهل الهوى اللي نلاقيهم = طرحى جروح الجفا والصد
على المفاهيم نوصيهم = ما للهوى من خصيم وند
واهل الغلا لو تغليهم = يصعد سما ما انجرح به ود
سر المحبة يداويهم = لا ارخى الوصل ذاك هذا شد
ندمح خطاهم ونرضيهم = ولا كل قالة عليها نلد

ياليت تشرح لي الاسباب = يمكن بها تِقتنع نفسي
اللي بها تِقفل الابواب = حتى على (بر) معك ارسي

إن سلتني فالمنازل فوق = منازل اللي لهم مقدار
اهل المكانة واهل الذوق = ونذكرك معهم من الحُضْار
لو فالزمن التقي بك عوق = بتلتقي في فؤادي دار
وإن ماطرابك عليه شوق = تبقى مودتك مهما صار
ومهما تسوق المطايا سَوق = ما الفت لها والحمول انظار