الوقت علمني

الوقت علمني وكثر التجاريب=وسايرت وقتي وابتدعت المعاني
وابوك ياهالوقت مافيك تطبيب= وانا حظرت وقافك اللي دعاني
قافاً يشوّقني لروس المراقيب= واكوي به اللي فالضماير كواني
بعض الكلام اقوى من السيف ومصيب= لكن مايثّر بقلب الهداني
اللي يوّدي فالسواليف ويجيب= وليا هرج ضيّق عليّ المكاني
أحدٍ فزوعـه لـي حـش العراقيـب=واحدٍ ليـا منـه فـزع لـي شفانـي
ياكثر من نحسن به الظن ويخيب= السن يضحك والجوارح تعاني
وين انت ياصقراً قوي المخاليب= وين انت ياعوني وفرحة زماني
عامين غايب ماترد المكاتيب= وانا مسجلها من اقصى المحاني
تعال وانظر في طعون الاصاحيب= تنزف وفاء ومفطحاتٍ سماني
اباتصبر واكمد الجرح ويطيب= هماً بقلبي ساطياً واحتواني
ويكفيني الله عالم السر والغيب= اللي علي نهج الشريعه هداني