جنـب خطوتهـا دمـوع اهدابهـا

مسكين ياقلب الغضي من ضيق باله والعـذاب=تشكي همـوم و همهـا فـي وقتهـا يشقابهـا
تذكر هموم الوقت واللي صار في لحظة عتاب=فزت معاليـق الضمايـر يـوم تذكـر مابهـا
وقامت روابع خاطري متسلسله مثل السحـاب=تسرد عن اللي شافت اعيونـي ولا ترضابهـا
أحزانها وهمومها صفحات في وسـط الكتـاب=تقرى الهمـوم اللـي بلاويهـا علـى كتٌابهـا
ذابت عيونه من دموعه والسبب جور الصعاب=قدام عيني ثـم عجـزت لا تحكـم اعصابهـا
مالومها في حزنها من بعـد طـوٌل بالغيـاب=نوماسها في وقتنـا القاسـي واعـز احبابهـا
غاب وتغيب عن نظرها والسبب ماله جـواب=غربة زمان أتشوفهـا مابيـن أعـز أقرابهـا
في عيدها وقت الفرح غاب الفرح من بعد غاب=وفي موقها لمع الحـزن و أحزانهـا تزهابهـا
راحت وقفت والوعد من بيننـا مالـه حسـاب=تسحب خطاها والأمل فـي دربهـا يسعابهـا
تمشي على درب الأمل لو الامل دربه عـذاب=أتبع خطاها جنـب خطوتهـا دمـوع اهدابهـا
أشوف بحر الحزن قدامي وبحـره كالسـراب=يوم اتبع أخطاها أشوف الحـزن حتـى بابهـا