وليا خسرت الشعر ربعي تجارة

بديت نظم الشعر بايع ومبتاع=جاهل عليمي ما يعرف الشطاره
أبـا تعلَّـم منـك يازين الاطبـاع=وليا خسرت الشعر ربعي تجارة
وقام المهلي والمرحب بالاجماع=كلٍ يلبسني ثياب الوقاره
لكنِّ يا حيفاه أْرفَـل وطمَّاع=عزيِّت لا ماشي عيال النماره
ضوَّيت لي ثنتين وأمسيت في القاع =نفسٍ خبيثة والتكبر شعاره
حتى تخايللي على كل الاوضاع= أني عميد الشعر وأكبر كباره
وأني ملكت العلم من شتى الأنواع=والشعر للشعار مني شباره
وأنا طويل الكف والشبر والباع=والناس ما تعرف تثوِّر شراره
حديتهم بالقاف فازع وقراع=أهل القريَّه والقرى والقراره
وأخذت للباقي حجاره ومقلاع=ولا فيه غيري يمتلك له حجاره
ولا شفت من ربعي حميه ومفزاع=كلٍ بعد ما جيت غير مساره
قلت ابشروا بالذيب شاعر وبياع=ومنه مدحني يستحق البشارة
قالوا عسى ماجيت يالابس قنـاع=ياليت مثلك مدرق في الستـاره
ربعك تجيب العلم في كل الاصقاع=ما تشتري علـمٍ يجيب الخسـاره