ديـــــوان كســـرات ( الفـــــارس )

مابين فرقى الهوى الحارق=ومابين خوف العنى يجتاح
دمعة وفا كانـت الفـارق=دفتها ذكرى ليالي مـلاح

للود جمرة غظى عسره=وقّادهـا الليـل لاجنّـح
يقضيبه الاآه والحسـره=من كان في خطاه مترنّح

لاتزعل ان جيت ناصيني=ولاشدني منظرك فالقرب
من كثر ماطحت من عيني=ماعاد تقوى تشوف الدرب

الصاحب اللي لنا خوتـه=ماتبان في وقتها ( الشده )
احسن لنا فالرخـا قلتـه=اللي ( العدو ) وقتها يسده

محاوره تشرفت بها مع الشاعر القدير عبدالرحمن شريان الجحدلي ( الذراع )

الفـــــارس=
عد الزهور البهيـه مـا=شدت هواوي بطيب الفوح
سلام في مقصده يسمـى=شامل لكم يابعاد الشـوح
الــــــــــذراع=
عد المزن لاهمل بالمـا=عد الورق لا نما فالدوح
يامرحبا والفرح عـمّـا=أهلاً بكم ياسليم البـوح
الفـــــارس=
دام البقـى والصفـا ينمـى=حزّت جزيل النبا مايلـوح
امـا بعـد ودي بكلـمـى=ونكسب معك فالمثل مشروح
الــــــــذراع=
الود للآن ما تمّا=ياليت نبني عليه صروح
شوقي لمنطوقكم طمّا=على هوى خاطري و الروح
الفـــــارس=
مادامه الود لـي مرمـى=الدوح تطرب سماع النوح
انا غبنّي الهـوى اعمـى=والناس صوبه لهاف تروح
الـــــــــــذراع=
الناس ما تتبع الظلما=تتبع سنا البرق والمصلوح
والود مثل القمر مهما=نخفيه نور القمر مفضوح
الفـــــارس=
شوف القمر كيف له رسمى=ابداعها من طعن وجـروح
ولاشفت فاجـواءه البكمـى=غيره صدى صوتي المبحوح
الــــــــــذراع=
كل شي ينجاب بالحزما=ادخل مع الباب يا مجروح
داوي جروحك قبل تدما=وتصير بعد الرجا مطروح
الفـــــارس=
ظنك يبي يفيدني العزما=ويردّني لبابه المفتـوح
وسهيل للحين له قسمـى=ويجود في دربه المفسوح
الـــــــذراع=
إستخلف الله فما يحما=تلقا بداله عريب مزوح
إنسى هوا سهيل يا شهما=لاتميل عن ساحة المسموح

لـوّك تبـي للمحبـه اثبـاات=ابزهـل اثباتـهـا للعـيـن
لكنـك اقشـر قليـل الـذات=شف وين انا صرت وانته وين

في مباراة البحرين والسعوديه في تصفيات اسيا المؤهله الى المحلق ومن ثم الى نهائيات كاس العالم 2010 كانت
السعوديه بحاجة الفوز للتاهل لملاقاة نيوزلندا في الملحق وكانت النتيجه 1-1 حتى الدقائق الاخير من المباراه سجل
المنتخب السعودي الهدف الثاني في الوقت بدل الضائع وبينما الجمهور يحتفلون بتاهل المنتخب فاجاهم المنتخب
البحريني بهدف التعادل في الدقيقه الاخيره من الوقت بدل الضائع وقبل صافرة الحكم بثواني ليتاهل المنتخب البحريني
لملاقاة المنتخب النيوزلندي على حساب صقورنا الخضر لذلك قلت

لا يامباراه مجنونه=شللي حصل حزّت الصفري
بعد الصقر لدّ بعيونه=اعموه من حيث لايدري

مادمت تنكر ضفـاف الـود=قلي وش اعطيت من ودّك ؟؟
او يـد تـزرع حنـان ليـد=وتحصّل الشوك مـن يـدّك

مردود تشرفت به مع الانيــــق

الفـــــارس=
ليتك تفيـد الـذي ليلـه=يقضيه في الاه والتنحيب
وبيوم قلّـب محاصيلـه=وللحين نادم على التقليب
عبدالعزيز الزويهري=
ما فات يـودّع مراسيلـه=و يرحم فؤداه من التعذيب
إن كان بنطـاوع الميلـه=ما عشنا ليل الهنا بالطيب

( ربيــــع القــــلب )

من قال يشفي البحر لي غلب=ولا منـاظـر طبيـعـيّـه
وانتي ربيع الفكـر والقلـب=لاهفهـف الشـوق فجريّه