ديوان -الشاعر محمد الكنيـــــــــــدري

يامن بهجره جرحني جرح= وسبب لي الاه واشقاني
مع غيبته غاب كل الفرح= واستوطنت جملة احزاني

مر الهوى وانتهض جرحي= واختل قلبي عن اوزانه
ان طعت له واستعد فرحي= ويني انا وينها اوطانه

داعب خفوقي هواه بهمس= وبعمق الاحساس حسيته
وبعد امتنع باقتراب اللمس= غيره هوى ماتمنيته

يوم الوثايق كتبناها= وختم الهوى صادق الاقوال
كانت دروب ومشيناها= وشبنا هوى والدروب طوال

ماهو هوى قول ميت فيك= واعشقك واعشق ثرى ماطاك
قلب الشقي ينعشه صاليك=ياوجد روحي على مرباك

قلبي هوى وابتلاني حي= واسهرني الليل واشقاني
ويهل مزنه بهدر المي= واحرق ضمايه ولاسقاني

الله يرحم زمان اول= قفى وقفت معه ناسه
لاشكيت حالك بعد طول= كلن معك يصدق احساسه

هبت عليه هبوب عصير= واشغلني الشوق للديره
الله يذكر اهلنا بخير= في قربهم تنشري جيره

وش حدنا نتبع المقفين= ومدرك البيت بركانه
ويمضي علينا القسى من لين= ماتختلف عدلة اوزانه
ونحلف بعهده ليوم الدين=مانلتفت غير لاوطانه
ونمشي دروب الهوى لاهين=ونعصى لنا رب سبحانه

هذه النصيحه كتبتها لآبن اختي العزيز بندر منور القريقري حفظه الله

يبناخي الوقت قاسيته= من قبلكم عايشه وامشيه
ماجاز لي ماتمنيته= وقصر وفايه وانا موفيه
صبيت له شهد واسقيته= واصبحت ضامي على ساقيه
ونقض جروحي وداويته= ومافاد ني طب مستوفيه
ياكم صاحب وخاويته= ولاهو على مارجيته فيه
خلك كما الذيب في صيته= ماكل شاطر قدر يرميه
وارحم فمن هو توليته= لاتشب له نار وتكويه
ولابان خصمك وداعيته= عد الوثايق قبل تشكيه
ولاتمن في شي واعطيته=يعلم به الرب ماتخفيه
هذا كلامي وعديته= من قلب مخلص لكم مهديه
اما اتبعه واستقريته= والا كلامي لكم عديه
لجلك بناخي وعزيته= واجب عليه لكم بابديه