تسمو كما فكره وتأصل أحساسه

بعد رحلة عناء الدراسة ومشوارها الطويل والمتعب...تبداء رحلة ودوامة البحث عن وظيفة
ولعل الكثيرين يعانون من هذا الامر وهذا ماحدى بأحد الاقارب بأن يطلب مني ان اركب معه بقارب البحث ومن اجله كتبت ابيات لصديق عزيز لعل ان تكون بشائر الامل والعمل على يديه وخصوصا انه من أهل الطيب الذين يحرصون على الطيب ....أتمنى ان مانقدم ينال الرضى والاستحسان.....

البارحة ماطبق الجفن بنعاس=سهير فكرن ما سهر بالوناسه
يطري على فكري من الهم هوجاس=ساعة بدأ المشوار عقب الدراسه
ويبقى الأمل دايم يطغى على الياس=بالصاحب اللي دق صدره ورأسه
أرسل سلامي مع ذعاذيع نسناس=للصاحب اللي طاب اصله وساسه
أجمل سلامن للمشاعر والاحساس=تسمو كما فكره وتأصل أحساسه
رسائل الغالي من الرأس للراس=وأنت حكيم الرأي راعي كياسه
أقبل رسائل صاحبن حيل حساس=أستفزعك من بين أهله وناسه
لو كان له نفسن تحده عن الناس=نفسه عزيزه وبالزمان أنتكاسه
أبغاك تطرق لي على كل الاجراس=وتصبر على طول العنا والعساسه
منصاك اللي يكسب الطيب نوماس=خطو العديم اللي زهى بالرياسه
اللي علومه غانمه مالها قياس=اللي مع الفزعه تزايد حماسه
والعرف والمعروف للناس نبراس=وكلن يفصل بالهقاوي مقاسه
جهدك ومجهودك مع كل من ساس=وخبرت سنينك بالبشر والسياسه
والله كريمن والمخاليق حراس=الله يسهلها بيسر وسلاسه