ديوان الشاعر عبدالعزيز الزويهري

أبغاك قاضي على دعـواي=و تشوف منه الذي غلطان
ملزوم تنصف معي بالراي=في اللي أعدّه بلا نقصـان
يا مرحبا بك على مبـداي=والحق ثابت وله ميـزان
وامشي معايه على ممشاي=ياتيك حكمي على البرهان
مرسول جاني بِعَزف الناي=لو تسمعه حَرّك الوجـدان
بذلت له الجهد في مسعاي=و اليوم غيّر حروف الدان
لو اللحن وافـق الحـدَّاي=ما غيَّر الحرف والألحـان
وما دمت لاهل الوفا شرَّاي=على السبب تعدل الميزان
حرفي نقشته بختم امضاي=و لاني على نقشته ندمان
المسألة تحتـوي مبـداي=و البحر ما يجهله ربّـان
مبدا القضية حسب مرآي=فالعرف ما بينكـم شتـان
واصدرت لك فالأمر فتواي=اطوي سجله على ما كان

في بُعدَك الليل يا طوله=فيه الألم من ألم فرقـاك
حتى مكاني وما حولـه=حزين عايش على ذكراك
غاب الفرح واختفى زوله=والقلب كله أمل يلقاك
حزني مدينة كبر دولة=أعيش همي بلا دنياك

في بوح صمتي سكون الليل=و ظلام يخفي دموع العيـن
و نجوم تشهد مآسي الويل=تصرخ تقول المواصل وين
الـقـلـب لا تـتـعـبـه بـلـحـيـل=أصل الهوى سلاح ذو حدين
مـره تشـوف العـنـا بالكـيـل=ومـره تـذوق الحـلا والزيـن

لي قلـب بـالآه مشقينـي=في محطة الهم يهمس همس
عـن الفـرح دوم معمينـي=عايش على ذكريات الأمس
تبغانـي احلـف لـك بدينـي=واللي فرضها الفروض الخمس
بالـهـم كـنـك مخاويـنـي=وباللي فؤادك يحـس احـس
مـن آه قلبـك سهـر عينـي=مهتم مـن همكـم يـا أنـس
الحـزن أوضـح عناويـنـي=واضح وضوح القمر و الشمس

اللي ملك قلبي بأشواقه=غايب عن العين له مده
يا كيف بتحمل فراقـه=و الروح متعلقة بوده ؟
يا متعب البعد اعماقه=سيور الايام له شده
ومدام الاشواق سباقه=ياتيك او ترتحل بعده

وين التقي فيك يا خلي=أتعبتني و خالق النعمة
كل ما اتصل هاتفك قلي=التغطية خارج الخدمة

جيت في منامي و صحاني=شوقي يقول الحبيّب جـاك
حسبي على الحلم بكانـي=يا ليته عن واقعي ما أخفاك

سلام وافـي وعليـه عتـاب=من قلب دايم و هـو يطريـك
النـوم كحّـل لـك الأهـداب=في لازمك يا فتى وش فيـك
يا مرحبـا و الملاقـا طـاب=و استانس القلب بين ايديـك
لو كان تدري عن المنصـاب=مالمتنـي بالـذي خافـيـك
عسى البقا و افتـح الأبـواب=و العلم هاته عسـى نعفيـك
معدود من خيـرة الاحباب =من عرق دمي رضى برويك
لي قلب مـن دورة الأسبـاب=ينبض بالأهات ليـن يدميـك
في صفحة الهم ليّـه كتـاب=فيه الأسـى بالبكـا يعميـك
أبكـي لحالـك و قلبـي ذاب=و يا ليت عندي دوا و أشفيك
لكـن ليّـه رجـا وحسـاب=لعـل رب القـدر يرضـيـك
ما عاد ليّه أمل يـا أصحـاب=غير الولـي يرفـق بغاليـك
و اللي رجا خالقه ما خـاب=اللي بجـزل النعـم يجزيـك

من هم في هم جانـي هـم=يلعب في قلبي على كيفـه
يامرني و آنـا اقلـه تـم=كل ما اعتلى في الفكر طيفه
لوكان قلبك غلبك ولم=وبردالهوى جاك مع صيفه
حاول ولاتتركه ياعم=ملعب كلٍ معه سيفه
من قبلكم حالنا منسم=جرد علينا الزمن سيفه
جاير علينا وياكم كـم=فبحور تاهت مجاديفه

انظر في حالي بعين الـود=وشوف المفارق كواني كي
أصبحت بين المواتى أنعد=لاني بميت و لانـي حـي