ديوان الغاز الشاعر : الشاكر أبو سامي

مادام وجهات النظر محذوفه =ويديك عن نقد الهدف مكفوفه
وش هي شروط الخيمه المألوفه = سلام في أولها وفي تاليها
والمعذره ياربعنا واخواني = مادام مالي رأي في الميداني
يطري على بالي مكان ثاني =ياوسع هالدنيا نسافر فيها
لغزي تحدي والتحدي وارد =رجل على ظهر المطيه شارد
له عين وحده مثل عين المارد = لا شب نار الحرب ماتطفيها

حلوا اللغز الخطير =لو بالسيف الشطير
لايروح ابه البعير = ولايطير ابه الحمام
ويش شيء يذكرا = في كتاب اللي قرا
له ست من العرا = ماسكاته بالزمام
مع ثنين مرافقين= باينين ومختفين
يظهرنه كل حين = يامسلّم ياسلام
لغزنا هذا كلام = بس عينك لاتنام
علم واكد والهمام = عجلوا به يالحشام

سلام ياقوم القناوات المعدة للغوز وللقصايد = من هاجس يمتد عرفه من قويات العقايد
مبني على توحيد رب العالمين ودين قايد = والله يعز الدين والحكام والشعب السعودي
والثانيه بنشد رجال المعرفة عن ورع سايد = في وسط بطن أمه حماها من دواليل المكايد
وتشوف راس الورع بادي كان ثوب الام بايد = ورع عزيز وفي ذرا ماجاه حر ولا برودي

أول العلم عالم علم والعالم الله = وآخر العلم قايد ثم فرقة شهيره
تجتمع كلها لو ماثبت ماتدلّه = وكل يوم ترى هالجمع بين العشيره
كان يكفي وجودك علمنا فاطن له = حل لغزي شمام وللعرب جاب غيره

والثانية وش بنت معروفة على مد العصور = من عصر أبونا آدم ومكتوبة على بيض السطور
ماتختفي ياربعنا والموت يقفاه النشور = والليله الحفلة كبيرة والعوارف جت بها

اشوف لي محبوب بين الرجاجيل = حبوه لاجل أمه شرف للمحبه
ياما حصل له من عناد وبهاذيل = وللحين صامد بين طلعة وطبه
ربعه قروم أهل عزوم ومشاكيل = وارقابهم لركابهم مشرهبه
وله أخو يذكر معه جيل ورى جيل = متلازمين بذكرهم مانكبه

أنا أغيب وارجع غصب مافي يدي حيله = ولا قلت لك مشغول لا . لا تصدقني
أنا شاغل بالي تناقيش منديله = مسوي بها نقشا مزركش يضايقني
في هذا الزمان اللي كثيرة تهاويله = أنا أحسّب أبوقه وهو صار بايقني
معي دوب ما طلت مشاعل قناديله = على مركز الاهداف يبغى يسايقني
يريد الطلوع أرجعه عن مناويله = ولا هو بحلو أرافقه أو يرافقني
مخلي عيوني شاخصه من تعاليله = عسى الله على فرقاه ربي يوفقني

أنا بنشدك يابدر العريمة وانشد الحضار = عن البنت الهنوف اللي خلقها الله في بنت أخرى
خلق فيها ثلاث أشياء وخلاها على مقدار = وسمى كل واحد باسم وأنتم بالمراد أدرى
جعلهم عبرة المسلم وحد يهدد الكفار = وردا للطغاه وحكمة في الصنع والأمرى
نريد البنت وأم البنت والجدة ولا تحتار = وكذاك اسم الثلاثة والهدف منهن بالاحرى

حكمة الله عظيمة والحكيم الحكيم = من يفكر بهالدنيا وباوقاتها
حي من حي يخرج من حديث وقديم = مختلف عنه باحياها وبامواتها
حي يمشي وحي في بلاده مقيم = حكمة الله في الدنيا وفي ذاتها

متشابكة في بعضها من ثلاثة حروف = والله تعالى ذكرها جل ذكر العليم
الجمع ينبيك عن ماضي وعنك معروف = في دائرة مستديرة من حديث وقديم
ومفرد الجمع أيضا من ثلاثة وشوف = واوعد بها الله قوم الكفر واهل الجحيم
أنا اختصرت المكرر والهدف لايطوف =إن كان وانك على كل المعاني حكيم